Companies

Maruti Suzuki દેશભરમાં કરશે ₹77,500 કરોડનું રોકાણ, ગુજરાતમાં 3 નવા પ્લાન્ટ સ્થાપશે

Maruti Suzuki Indiaએ FY27 માટે મૂડી ખર્ચ 40% વધારી ₹14,000 કરોડ કર્યો છે. કંપની FY31 સુધી ₹77,500 કરોડનું રોકાણ કરીને ઉત્પાદન ક્ષમતા વધારવા, નવા મોડલ લાવવા અને ગુજરાત સહિત નવા પ્લાન્ટ વિકસાવવાની યોજના ધરાવે છે.

desk@kuberanow31 Aug 2026

Maruti Suzuki India આગામી પાંચ વર્ષમાં મોટા વિસ્તરણની તૈયારી કરી રહી છે. કંપનીના Managing Director અને CEO Hisashi Takeuchiએ 45મી વાર્ષિક સામાન્ય સભામાં જણાવ્યું કે FY27થી FY31 દરમિયાન કંપની કુલ ₹77,500 કરોડનો મૂડી ખર્ચ કરવાની યોજના ધરાવે છે. FY27 માટે જ મૂડી ખર્ચ ગયા વર્ષના લગભગ ₹10,000 કરોડથી 40% વધારી ₹14,000 કરોડ કરવામાં આવશે.

ક્યાં થશે ₹77,500 કરોડનો ખર્ચ?

કંપની આ રોકાણનો ઉપયોગ ઉત્પાદન ક્ષમતા વધારવા, નવા વાહન મોડલ વિકસાવવા, Research & Development, પ્લાન્ટની જાળવણી, વેચાણ અને માર્કેટિંગ માળખું, Logistics અને Carbon-Neutral Manufacturing માટે કરશે.

ઉત્પાદન ક્ષમતા 40 લાખ વાહન સુધી

ગુજરાતના Hansalpurમાં ચોથો પ્લાન્ટ અને હરિયાણાના Kharkhodaમાં બીજો પ્લાન્ટ શરૂ થયા બાદ Maruti Suzukiની વાર્ષિક સ્થાપિત ઉત્પાદન ક્ષમતા 29 લાખ વાહન સુધી પહોંચી છે. તેમાં Hansalpurની ક્ષમતા 10 લાખ, Manesarની 9 લાખ અને Kharkhoda તથા Gurugramની 5-5 લાખ વાહનની છે. કંપની હવે આ ક્ષમતા વધારી 40 લાખ વાહન પ્રતિ વર્ષ સુધી લઈ જવા માગે છે.

Sanandમાં ત્રણ નવા પ્લાન્ટની યોજના

ઉત્પાદન ક્ષમતા વધારવાની યોજનામાં ગુજરાતની મોટી ભૂમિકા રહેશે. Maruti Suzuki ગુજરાતના Sanandમાં આવનારી નવી સુવિધામાં ત્રણ પ્લાન્ટ સ્થાપવાની યોજના ધરાવે છે. દરેક પ્લાન્ટની ક્ષમતા 2.5 લાખ વાહન પ્રતિ વર્ષ રહેશે. આ ઉપરાંત Kharkhodaમાં પણ બે નવા પ્લાન્ટ ઉમેરવામાં આવશે.

એક જ લાઇન પર EVથી CNG સુધી વાહન બનશે

કંપની પોતાના નવા પ્લાન્ટને એવી રીતે તૈયાર કરી રહી છે કે એક જ ઉત્પાદન લાઇન પર Electric Vehicle, Strong Hybrid, CNG અને Petrol-Diesel આધારિત વાહન બનાવી શકાય. FY31 સુધી ઘરેલુ Passenger Vehicle વેચાણમાં EVનો હિસ્સો 15%, Hybridનો 25%, CNGનો 35% અને Biofuel સાથેના Petrol વાહનોનો હિસ્સો 25% રહેવાની કંપનીની અપેક્ષા છે.

આગામી 5 વર્ષમાં 7 નવી SUV

Maruti Suzuki આગામી પાંચ વર્ષમાં 7 નવી SUV રજૂ કરવાની યોજના ધરાવે છે. હાલ કંપની Fronx, Brezza, Jimny, Grand Vitara અને Victoris સહિત પાંચ SUV મોડલ વેચે છે. નવા મોડલ દ્વારા કંપની SUV બજારમાં પોતાનો હિસ્સો વધારવા માગે છે.

નાની Electric Car પણ આવશે

કંપનીએ FY26માં પોતાની પ્રથમ Electric SUV e Vitara રજૂ કરી હતી.અત્યાર સુધી Maruti Suzukiએ e Vitaraના 43,000થી વધુ વાહનની નિકાસ કરી છે અને ભારતમાં આશરે 8,500 વાહન વેચ્યા છે. કંપનીનું કહેવું છે કે દેશમાં EV Charging Infrastructure વધુ વિકસશે ત્યારે તે પોતાના પોર્ટફોલિયોમાં નાની Electric Car પણ ઉમેરશે.