GST દરોમાં ઘટાડા છતાં ગુજરાતની GST આવકમાં 35%નો ઉછાળો

GST દરોમાં ઘટાડા છતાં ગુજરાતની કર આવકમાં મજબૂત વધારો નોંધાયો છે. સપ્ટેમ્બર 2026માં રાજ્યને GST હેઠળ ₹8,167 કરોડની આવક થઈ છે, જે સપ્ટેમ્બર 2025ની ₹6,050 કરોડની આવકની સરખામણીએ 35% વધુ છે. ચાલુ નાણાકીય વર્ષના પ્રથમ છ માસમાં પણ GST આવકમાં નોંધપાત્ર વૃદ્ધિ જોવા મળી છે.

સપ્ટેમ્બરમાં GST આવક ₹8,167 કરોડે પહોંચી

કેબિનેટ બેઠક બાદ પ્રવક્તા મંત્રી જીતુભાઈ વાઘાણીએ જણાવ્યું કે સપ્ટેમ્બર 2026માં ગુજરાતને GST હેઠળ ₹8,167 કરોડની આવક થઈ છે. સપ્ટેમ્બર 2025માં આ આવક ₹6,050 કરોડ હતી. આ રીતે એક વર્ષના સમાન સમયગાળાની સરખામણીમાં ગુજરાતની GST આવકમાં 35%નો વધારો થયો છે. આ જ સમયગાળા દરમિયાન રાષ્ટ્રીય સ્તરે GST આવકનો ગ્રોથ 14.7% રહ્યો હતો.

છ મહિનામાં GST આવક ₹49,858 કરોડ

ચાલુ નાણાકીય વર્ષ 2026-27ના પ્રથમ છ માસ એટલે કે એપ્રિલથી સપ્ટેમ્બર 2026 દરમિયાન ગુજરાતને GST હેઠળ કુલ ₹49,858 કરોડની આવક મળી છે.ગત નાણાકીય વર્ષના સમાન સમયગાળામાં GST આવક ₹38,540 કરોડ હતી. તેની સરખામણીએ ચાલુ વર્ષે GST આવકમાં 29%નો વધારો નોંધાયો છે.

GST ઉપરાંત અન્ય કરમાંથી પણ આવક

સપ્ટેમ્બર 2026માં રાજ્યના કર વિભાગને GST ઉપરાંત અન્ય કરવેરામાંથી પણ આવક મળી હતી. આ દરમિયાન VATમાંથી ₹2,930 કરોડ, વિદ્યુત શુલ્કમાંથી ₹1,102 કરોડ અને વ્યવસાય વેરામાંથી ₹24 કરોડની આવક થઈ હતી. GST સહિત સપ્ટેમ્બર મહિનામાં રાજ્ય સરકારના કર વિભાગની કુલ આવક ₹12,222 કરોડ રહી. રાજ્ય સરકારના જણાવ્યા અનુસાર વેપાર-ઉદ્યોગ માટેનું વાતાવરણ અને કરદાતાઓના સહયોગને કારણે રાજ્યની કર આવકમાં આ વધારો નોંધાયો છે.

આ પણ વાંચો : ખાંડની આયાત પર મોટી રાહત! ડ્યુટી ફ્રી Raw Sugarની મુદત 31 ડિસેમ્બર સુધી લંબાવી

આ પણ જુઓ:

Watch onYouTube