Vibrant Gujarat : 22 દેશ, 8 શહેર અને 6 સેક્ટર્સ! ગુજરાતનું મેગા ઇન્વેસ્ટમેન્ટ મિશન

Vibrant Gujarat 2027: ગુજરાતમાં રોકાણને વધુ વેગ આપવા માટે રાજ્ય સરકારે વાઈબ્રન્ટ ગુજરાત ગ્લોબલ સમિટ 2027 પહેલાં વૈશ્વિક સ્તરે મોટું અભિયાન શરૂ કર્યું છે. ઓક્ટોબર અને નવેમ્બર 2026 દરમિયાન ઉચ્ચસ્તરીય પ્રતિનિધિમંડળ 22 દેશોમાં ઉદ્યોગજગતના દિગ્ગજો, રોકાણકારો અને સંસ્થાઓ સાથે મુલાકાત કરશે. આ સાથે ભારતના 8 મોટા શહેરોમાં પણ રોડ-શો યોજાશે. ‘વિકસિત ગુજરાત – શેપિંગ ગ્લોબલ ફ્યુચર’ થીમ હેઠળ VGGS 2027નું આયોજન 10થી 12 જાન્યુઆરી 2027 દરમિયાન ગાંધીનગરના મહાત્મા મંદિર ખાતે કરવામાં આવશે.

22 દેશોમાં રોકાણકારો સાથે સીધી વાતચીત

ગુજરાત સરકારનું ઉચ્ચસ્તરીય પ્રતિનિધિમંડળ ઓસ્ટ્રેલિયા, ન્યુઝીલેન્ડ, ફ્રાન્સ, જર્મની, નેધરલેન્ડ, ફિનલેન્ડ, ડેનમાર્ક, સ્વીડન, પોલેન્ડ, જાપાન, દક્ષિણ કોરિયા, વિયેટનામ, મલેશિયા, ઈન્ડોનેશિયા, સિંગાપોર, રશિયા, UAE, કતાર, ઓમાન, કેન્યા, ટાન્ઝાનિયા અને મોઝામ્બિકની મુલાકાત લેશે. આ દેશોમાં સેક્ટર આધારિત રાઉન્ડ ટેબલ બેઠકો ઉપરાંત અગ્રણી કંપનીઓ, સંસ્થાકીય રોકાણકારો અને ઉદ્યોગ સંગઠનો સાથે વ્યક્તિગત બેઠકો કરવામાં આવશે. પ્રતિનિધિમંડળ ઉદ્યોગ અગ્રણીઓને જાન્યુઆરીમાં યોજાનારી VGGS 2027માં ભાગ લેવા માટે આમંત્રણ પણ આપશે. મલ્ટીનેશનલ કંપનીઓ, રોકાણકારો, સરકારી એજન્સીઓ, ચેમ્બર ઑફ કોમર્સ, વેપારી સંગઠનો અને ભારતીય પ્રવાસી સમુદાય સાથે પણ ચર્ચા કરવામાં આવશે. આ મુલાકાતો દરમિયાન ભારતના UAE, ઓસ્ટ્રેલિયા, ન્યુઝીલેન્ડ, UK, EFTA દેશો અને યુરોપિયન યુનિયન સાથેના મુક્ત વેપાર કરારો દ્વારા ઊભી થતી વેપાર અને રોકાણની તકો અંગે પણ રોકાણકારોને માહિતી આપવામાં આવશે.

ભારતના 8 શહેરોમાં પણ રોડ-શો

આંતરરાષ્ટ્રીય મુલાકાતોની સાથે ગુજરાત સરકાર ભારતમાં પણ રોકાણકારો સુધી પહોંચશે. ગુવાહાટી, લખનઉ, બેંગલુરુ, હૈદરાબાદ, ચેન્નાઈ, કોલકાતા, ભુવનેશ્વર અને જયપુરમાં રોડ-શો યોજાશે. આ રોડ-શો દ્વારા આ શહેરોમાં કાર્યરત ભારતીય અને બહુરાષ્ટ્રીય કંપનીઓ સાથે સંપર્ક કરવામાં આવશે. અગાઉ પણ આવા રોડ-શો દ્વારા ગુજરાતને રોકાણના મહત્વપૂર્ણ સ્થળ તરીકે રજૂ કરવામાં આવ્યા છે. ગુજરાત સરકારના જણાવ્યા મુજબ, રાજ્ય પાસે મોટી બંદર ક્ષમતા અને વ્યૂહાત્મક દરિયાકિનારો છે. દિલ્હી-મુંબઈ ઇન્ડસ્ટ્રિયલ કોરિડોર (DMIC), ધોલેરા જેવા ઔદ્યોગિક કોરિડોર અને પાર્ક તથા GIFT City જેવી સુવિધાઓ રાજ્યના રોકાણ માળખાનો હિસ્સો છે. સેમિકન્ડક્ટર અને ઇલેક્ટ્રોનિક્સની ઇકોસિસ્ટમ તેમજ રિન્યુએબલ એનર્જી ક્ષેત્રે પણ રાજ્યમાં વિકાસ પર ભાર મૂકવામાં આવી રહ્યો છે.

સેમિકન્ડક્ટરથી AI અને ગ્રીન એનર્જી સુધી ફોકસ

VGGS 2027માં ભવિષ્યના ઉભરતા સેક્ટર્સને ખાસ મહત્વ આપવામાં આવશે. તેમાં સેમિકન્ડક્ટર, આર્ટિફિશિયલ ઇન્ટેલિજન્સ (AI), ફિનટેક, ગ્રીન એનર્જી ઇકોસિસ્ટમ, ડેટા સેન્ટર્સ અને સ્પેસ ટેક્નોલોજીનો સમાવેશ થાય છે. સેમિકન્ડક્ટર ક્ષેત્રે સાણંદમાં માઇક્રોન અને કેન્સ સેમિકોનના પ્રોજેક્ટ્સનો ઉલ્લેખ કરવામાં આવ્યો છે, જ્યારે CG Power–Renesasનો OSAT પ્રોજેક્ટ પ્રગતિ હેઠળ હોવાનું જણાવાયું છે. ધોલેરામાં ટાટા ઇલેક્ટ્રોનિક્સ અને તાઇવાનની PSMC સાથે મળીને સેમિકન્ડક્ટર ફેબ શરૂ કરવાની યોજના છે, જેમાં ASML સાધનો અને ટેક્નોલોજી ભાગીદાર તરીકે જોડાયેલી છે. GIFT Cityમાં ફિનટેક અને ડેટા સેન્ટર રોકાણ માટેની સુવિધાઓ પર પણ ભાર મૂકવામાં આવ્યો છે. જ્યારે કચ્છના ખાવડામાં રિન્યુએબલ એનર્જી પાર્કને ગ્રીન એનર્જી ક્ષેત્રની મોટી તક તરીકે રજૂ કરવામાં આવ્યું છે. આ પાર્ક 72,000 હેક્ટરથી વધુ વિસ્તારમાં ફેલાયેલો છે અને તેની ક્ષમતા 37 GW જણાવવામાં આવી છે.

VGGSની બે દાયકાની સફર

વાઈબ્રન્ટ ગુજરાત ગ્લોબલ સમિટની શરૂઆત 2003માં કરવામાં આવી હતી. બે દાયકાથી વધુ સમયગાળામાં આ સમિટમાં વિવિધ દેશોના રાષ્ટ્રાધ્યક્ષો, CEO, નીતિ નિર્માતાઓ, સંસ્થાઓ અને રોકાણકારોને એક મંચ પર લાવવાનો પ્રયાસ કરવામાં આવ્યો છે. જાન્યુઆરી 2024માં યોજાયેલા VGGSના 10મા સંસ્કરણમાં 140થી વધુ દેશોમાંથી 61,000થી વધુ પ્રતિનિધિઓ અને 30થી વધુ ભાગીદાર દેશો જોડાયા હતા. હવે VGGS 2027 દ્વારા ગુજરાત સરકારનો ઉદ્દેશ્ય વધુ વ્યાપક વૈશ્વિક અને સ્થાનિક ભાગીદારી સાથે મોટા રોકાણને સપ્લાયર્સ, ટેક્નોલોજી ભાગીદારો અને કુશળ પ્રતિભા સાથે જોડાયેલી સંપૂર્ણ ઇકોસિસ્ટમમાં પરિવર્તિત કરવાનો છે.

આ પણ વાંચો : Indian Economy: વિકાસની રફ્તાર તેજ, પરંતુ રૂપિયાની નબળાઈથી $5 ટ્રિલિયનનું લક્ષ્ય દૂર!

આ પણ જુઓ:

Watch onYouTube