લો બોલો, ખાંડના ભાવ વધતા Blinkit-Zepto સહિતના પ્લેટફોર્મે ખરીદી પર લગાવી મર્યાદા

તહેવારો પહેલાં ખાંડના વધતા ભાવની અસર હવે ગ્રાહકોની ખરીદી પર પણ દેખાવા લાગી છે. Blinkit, Zepto, BigBasket અને Swiggy Instamart જેવા ઝડપી ડિલિવરી પ્લેટફોર્મે કેટલાક શહેરો અને બ્રાન્ડમાં એક ગ્રાહક કેટલી ખાંડ ખરીદી શકે તેની મર્યાદા નક્કી કરી છે. બીજી તરફ સરકારના સત્તાવાર આંકડા મુજબ 25 ઓગસ્ટે દેશમાં ખાંડનો સરેરાશ છૂટક ભાવ ₹63.97 પ્રતિ કિલો હતો.

ક્યાં કેટલી ખાંડ ખરીદી શકાય?

દિલ્હી-NCRમાં Blinkit પર કેટલીક બ્રાન્ડમાં એક ઓર્ડર દીઠ મહત્તમ 5 કિલોનું એક પેક ખરીદી શકાય છે.પુણેમાં કેટલીક બ્રાન્ડ માટે એક કિલોના માત્ર ત્રણ પેક સુધી મર્યાદા જોવા મળી છે. BigBasketએ કેટલીક બ્રાન્ડ માટે એક કિલોના પાંચ પેક સુધી ખરીદી મર્યાદિત કરી છે, જ્યારે દિલ્હી-NCRના કેટલાક વિસ્તારોમાં Swiggy Instamart પર માત્ર બે કિલો સુધી ખાંડ ઓર્ડર કરવાની છૂટ આપવામાં આવી રહી છે. Zepto અને કેટલાક મોટા રિટેલ સ્ટોરમાં પણ જથ્થો ઝડપથી ખૂટી ન જાય તે માટે ખરીદી મર્યાદિત કરવામાં આવી છે.

ખાંડના ભાવ કેમ વધી રહ્યા છે?

સરકારે 21 ઓગસ્ટે જણાવ્યું હતું કે 20 જુલાઈએ ખાંડનો ભાવ ₹48.18 પ્રતિ કિલો હતો, જે 20 ઓગસ્ટ સુધી વધીને ₹55.70 થયો હતો. સરકારના જણાવ્યા મુજબ ભાવ વધવા પાછળ અપેક્ષા કરતાં ઓછું ઉત્પાદન, તહેવારો પહેલાં વધતી માંગ, ખરાબ હવામાનથી શેરડીના પાકને નુકસાન, વૈશ્વિક સ્તરે ખાંડનો તંગ પુરવઠો અને કેટલાક સ્થળે સંગ્રહખોરી જેવા પરિબળ જવાબદાર છે. 25 ઓગસ્ટે ગ્રાહક બાબતોના વિભાગના દૈનિક આંકડા મુજબ દેશનો સરેરાશ છૂટક ભાવ વધુ વધીને ₹63.97 પ્રતિ કિલો નોંધાયો હતો.

આ પણ વાંચો : આયાત નિયમોમાં રાહત મળતા ખાંડના ભાવ 18% ગગડ્યા, ગ્રાહકોને હાશકારો

ભાવ રોકવા સરકારના મોટા પગલાં

ખાંડની ઉપલબ્ધતા વધારવા સરકારે 10 લાખ ટન કાચી ખાંડની કરમુક્ત આયાત કરવાની મંજૂરી આપી છે. આ ઉપરાંત દેશભરના ખાંડ વેપારીઓ માટે 1 ઓગસ્ટથી 30 નવેમ્બર સુધી 400 ટનની જથ્થા મર્યાદા નક્કી કરવામાં આવી છે. 1 સપ્ટેમ્બરથી મોટા ઔદ્યોગિક ગ્રાહકો પણ પોતાની 15 દિવસની જરૂરિયાતથી વધુ ખાંડનો જથ્થો રાખી શકશે નહીં. સરકાર મિલોમાં જથ્થાની તપાસ પણ કરી રહી છે.

ગ્રાહકો માટે શું અર્થ?

હાલ ખરીદી મર્યાદા દરેક શહેર કે દરેક બ્રાન્ડ માટે એકસરખી નથી. તે ઉપલબ્ધ જથ્થા પ્રમાણે બદલાઈ રહી છે. સરકાર આયાત, જથ્થા મર્યાદા અને વહેલી પિલાણથી પુરવઠો વધારવાનો પ્રયાસ કરી રહી છે. એટલે આગામી સપ્તાહોમાં આ પગલાંની અસર બજારમાં પહોંચે તો ખાંડના ભાવ અને ઉપલબ્ધતા પરનું દબાણ ધીમે ધીમે ઘટી શકે છે.

અમારી WhatsApp ચેનલમાં જોડાવવા અહીં ક્લિક કરો

https://whatsapp.com/channel/0029VbDPNhHISTkJEDTirJ16