Jioની મેગા એન્ટ્રીથી અન્ય કંપનીઓએ IPO પાછળ ધકેલ્યા

IPO: શેરબજારમાં IPO લાવવા માટે કંપનીનો બિઝનેસ અને મૂલ્યાંકન જેટલાં મહત્વનાં છે, એટલો જ મહત્વનો મુદ્દો યોગ્ય સમયનો પણ હોય છે. એક જ સમયે વિશાળ ઇશ્યૂ ખુલ્લો હોય તો બીજી કંપનીઓ માટે રોકાણકારોનું ધ્યાન મેળવવાની સ્પર્ધા વધી શકે છે. Jio Platformsના IPOની આસપાસ પ્રાઇમરી માર્કેટમાં આવી જ સ્થિતિ જોવા મળી છે. ₹30,213 કરોડના Jio Platforms IPOને કારણે કેટલીક IPO લાવવાની તૈયારી કરતી કંપનીઓએ પોતાના ઇશ્યૂ પાછળ ધકેલ્યા છે. બજારમાં એક કહેવત પ્રચલિત છે કે ઝડપથી આવતી ટ્રેનની સામે ઊભા ન રહેવું, આ કંપનીઓનો અભિગમ પણ કંઈક એવો છે.

Jio પહેલાં ઇશ્યૂ પૂરા કરવાની પણ દોડ

કેટલીક કંપનીઓએ Jio સાથે ઇશ્યૂ ન ટકરાય તે માટે તારીખ પાછળ ધકેલી હતી, તો કેટલીક કંપનીઓએ Jioની ઑફર શરૂ થાય તે પહેલાં પોતાનો IPO પૂર્ણ કરવાનું પસંદ કર્યું હતું. અહેવાલ મુજબ, Zetwerk Manufacturing Businessesનો ₹5,012 કરોડનો IPO આ સમયગાળાના મોટા ઇશ્યૂમાં સામેલ હતો. 15થી 19 ઑક્ટોબર દરમિયાન ખુલ્લો રહેલો આ ઇશ્યૂ 3.06 ગણો સબસ્ક્રાઇબ થયો હતો. આ મહિનામાં અગાઉ આવેલા અન્ય ઇશ્યૂમાં Fusion CXનો ₹702 કરોડનો IPO અને Tonbo Imaging Indiaનો ₹852 કરોડનો IPO પણ સામેલ હતા.

ઇશ્યૂની સફળતા માટે યોગ્ય સમય કેમ જરૂરી?

બજાર નિષ્ણાતોનું માનવું છે કે Jio Platformsની મેગા ઑફરના પગલે બજારમાં રોકડની ખેંચ પ્રવર્તશે. તેના લીધે બેન્કરોને ચિંતા છે કે નવેમ્બરમાં IPOની ભરમાર હોવા છતાં તેને સંપૂર્ણપણે કેવી રીતે ભરવા તે મોટો સવાલ છે. આ સંજોગોમાં ઘણા બધા IPO અંડરરાઇટ કરવા પડે તો નવાઈ નહીં લાગે.

નવેમ્બરમાં આવનારા IPO

ઑક્ટોબરની સાવચેતી બાદ નવેમ્બરમાં પ્રાઇમરી માર્કેટની પ્રવૃત્તિ વધવાની અપેક્ષા છે. સૂત્રો પ્રમાણે, આશરે 15 IPO દ્વારા સંયુક્ત રીતે ₹28,000 કરોડ એકત્ર કરવાની તૈયારી છે. આ યાદીમાં Milestone Gears, Avaada Electro, MK Sons Fine Jewels, Swarna Baby Products, Integris Medtech, AGS Health, Learnfluence Education અને Eastman Auto & Power સહિતની કંપનીઓ નવેમ્બર મહિનામાં ઈશ્યૂ લાવી શકે તેવી સંભાવના છે. કંપનીઓનું આ આયોજન દર્શાવે છે કે કેટલીક કંપનીઓએ IPOનો વિચાર છોડવાને બદલે તેના સમયપત્રકમાં ફેરફાર કરવાનું પસંદ કર્યું છે.

Jio સાથે Paras Healthcareનો ઇશ્યૂ ખુલ્લો

Jio Platformsનો IPO 21થી 23 ઑક્ટોબર દરમિયાન સબસ્ક્રિપ્શન માટે ખુલ્લો છે. તેની સાથે ₹1,450 કરોડનો Paras Healthcare IPO ખુલ્લો રહેલો બીજો ઇશ્યૂ છે. Jio Platformsને બાદ કરતાં ઑક્ટોબરમાં અત્યાર સુધીમાં નવ IPO દ્વારા આશરે ₹12,000 કરોડ એકત્ર થયા છે. તેની સરખામણીએ ઑગસ્ટમાં 23 IPOએ ₹22,453 કરોડ અને સપ્ટેમ્બરમાં 34 ઇશ્યૂએ ₹39,381 કરોડ એકત્ર કર્યા હતા.

આ પણ વાંચો: રાજકોટની Antala Industriesનો IPO આવશે ટૂંક સમયમાં

આ પણ જુઓ:

Watch onYouTube