બ્રોકરો ટેકનોલોજી અને રિસર્ચ પર ભાર મૂકેઃ કમલેશ શ્રોફ

મુંબઈમાં શનિવારે યોજાયેલા ANMI આંતરરાષ્ટરીય કેપિટલ માર્કેટ કન્વેન્શનમાં બજાર સાથે સંકળાયેલા હિતધારકોને સંબોધતાં SEBI ચેરમેન તુહિન કાંતા પાંડેએ આગામી સમય માટે પાંચ મહત્ત્વના ક્ષેત્રોમાં સુધારાની દિશા સ્પષ્ટ કરી છે. આર્ટિફિશિયલ ઈન્ટેલિજન્સ (AI) ટેક્નોલોજી હવે મૂડી બજારમાં પણ પ્રવેશી રહી છે ત્યારે ટેક્નોલોજીના જવાબદારીપૂર્વક ઉપયોગ સાથે ભારતીય મૂડીબજારને વધુ ગહન, પારદર્શક અને રોકાણકારો માટે સુરક્ષિત બનાવવા સિક્યોરિટીઝ એન્ડ એક્સચેન્જ બોર્ડ ઑફ ઇન્ડિયા (SEBI) દ્વારા નિયમનકારી સુધારા, કોર્પોરેટ બોન્ડ માર્કેટના વિકાસ અને રોકાણકારોની સુરક્ષા પર ભાર મૂકવામાં આવી રહ્યો છે. તેના સંદર્ભમાં સેબીના ચેરમેને તકો અને પડકારો પર પ્રકાશ પાડ્યો હતો.

ANMIના નેશનલ પ્રેસિડેન્ટ કમલેશ શ્રોફે જણાવ્યું હતું કે બદલાતા બજારના માહોલમાં બ્રોકરોએ પણ તેમની પરંપરાગત કાર્યપદ્ધતિમાં ફેરફાર કરવો જરૂરી છે. માત્ર ઓછી બ્રોકરેજ ઓફર કરીને લાંબા ગાળે સ્પર્ધામાં ટકી શકાશે નહીં. બ્રોકિંગ ઉદ્યોગે હવે ટેક્નોલોજી, ગુણવત્તાસભર રિસર્ચ અને મૂલ્યવર્ધિત રોકાણ સલાહને પોતાની સેવાઓનો મહત્વપૂર્ણ ભાગ બનાવવો પડશે.

ડિસ્કાઉન્ટ બ્રોકિંગથી આગળ વધવાનો સમય

શ્રોફના જણાવ્યા પ્રમાણે બ્રોકિંગ બિઝનેસ હવે માત્ર ઓછી ફી અથવા ડિસ્કાઉન્ટ બ્રોકરેજ સુધી મર્યાદિત રહી શકશે નહીં. રોકાણકારોને વધુ સારી ટેક્નોલોજી, વિશ્વસનીય રિસર્ચ, જોખમ અંગે માર્ગદર્શન અને મૂલ્યવર્ધિત સલાહ આપનાર બ્રોકરો ભવિષ્યમાં વધુ મજબૂત સ્થિતિમાં રહેશે.

સરળ પરંતુ સ્માર્ટ નિયમનની જરૂર

બજારમાં નિયમન જરૂરી છે, પરંતુ નિયમો એવા હોવા જોઈએ કે જે વ્યવહારુ અને સરળતાથી અમલમાં મૂકી શકાય. રોકાણકારોની સુરક્ષાના ધોરણોમાં કોઈ સમાધાન કર્યા વગર કમ્પ્લાયન્સ પ્રક્રિયાને વધુ અસરકારક અને સરળ બનાવવાની જરૂરિયાત પર ભાર મૂકાયો હતો.

બજારનું વૈવિધ્યીકરણ વધારવું

ભારતીય રોકાણકારોની ભાગીદારી માત્ર ઇન્ડેક્સ ઓપ્શન્સ સુધી મર્યાદિત ન રહે તે પણ મહત્વપૂર્ણ છે. ઇક્વિટી કેશ સેગમેન્ટ, કોર્પોરેટ ડેટ, કરન્સી, કોમોડિટીઝ અને અન્ય ડેરિવેટિવ્ઝ સેગમેન્ટમાં રોકાણકારોની ભાગીદારી વધે તે માટે બજારના તમામ હિતધારકોએ કામ કરવાની જરૂર હોવાનું જણાવાયું હતું.

ટેકનોલોજી અને AI બનશે મહત્વપૂર્ણ સાધન

આર્ટિફિશિયલ ઇન્ટેલિજન્સ હવે મૂડીબજારના અનેક ક્ષેત્રોમાં પ્રવેશી રહી છે. AI આધારિત કમ્પ્લાયન્સ, સર્વેલન્સ અને રિસ્ક મેનેજમેન્ટ સિસ્ટમો ખાસ કરીને રિજનલ અને મિડસાઇઝ બ્રોકરોને મોટી સંસ્થાઓ જેવી ગુણવત્તાસભર સેવા આપવાની તક આપી શકે છે. ટેક્નોલોજીનો યોગ્ય ઉપયોગ ખર્ચ ઘટાડવા સાથે જોખમ નિયંત્રણ અને ગ્રાહક સેવા સુધારવામાં પણ મદદરૂપ બની શકે છે.

ઉદ્યોગ અને નિયમનકાર વચ્ચે સહયોગ જરૂરી

ANMIએ SEBI, નાણા મંત્રાલય અને સ્ટોક એક્સચેન્જો સાથે રચનાત્મક રીતે કામ કરવાની જરૂરિયાત પર પણ ભાર મૂક્યો હતો. બ્રોકિંગ ઉદ્યોગ અને નિયમનકારો વચ્ચે અસરકારક સંવાદ દ્વારા બજારની વાસ્તવિક મુશ્કેલીઓ સમજવી અને યોગ્ય ઉકેલ શોધવો જરૂરી છે. ઉદ્યોગ સંગઠનો બજારના વિવિધ હિતધારકો વચ્ચે પુલ તરીકે મહત્વપૂર્ણ ભૂમિકા ભજવી શકે છે.

કમલેશ શ્રોફ, નેશનલ પ્રેસિડેન્ટ, ANMI ન્યૂઝ ટેકઅવેઝ