Crude Oil: હોર્મુઝમાં જહાજ પર હુમલા બાદ બ્રેન્ટ ક્રૂડ $107ને પાર

સ્ટ્રેટ ઓફ હોર્મુઝ અને અખાતી વિસ્તારમાં જહાજો તથા પાવર હાઉસ પર થયેલા નવા હુમલાથી ક્રૂડ ઓઇલના પુરવઠા અંગે ચિંતા વધી છે. સોમવારે બ્રેન્ટ ક્રૂડ 3% વધીને પ્રતિ બેરલ $107.74 અને WTI ક્રૂડ 2.88% વધીને $102.93 પર પહોંચ્યું હતું. સાઉદી અરેબિયાની મહત્વની ઓઈલ પાઇપલાઇન બંધ થતાં વૈશ્વિક પુરવઠાના આશરે 4% હિસ્સા સામે જોખમ ઊભું થયું છે.

હોર્મુઝમાં જહાજ પર હુમલો

બ્રિટનની દરિયાઈ સુરક્ષા સંસ્થા UKMTOના જણાવ્યા પ્રમાણે હોર્મુઝની ખાડીમાંથી પસાર થઈ રહેલા એક જહાજ પર હુમલો કરવામાં આવ્યો હતો. જોકે, તમામ કર્મચારીઓને સુરક્ષિત બહાર કાઢવામાં આવ્યા હતા. વિશ્વના ઓઈલ અને ગેસ પરિવહન માટે હોર્મુઝનો જળમાર્ગ અત્યંત મહત્વ ધરાવે છે. હોર્મુઝની ખાડી નિશાન બનતા વૈશ્વિક ઊર્જા પુરવઠો ખોરવાઈ જવાની સંભાવના વધી જાય છે. આ જ આશંકાના કારણે ક્રૂડના ભાવમાં ફરી 3%નો ઉછાળો આવ્યો છે.

સાઉદીની પાઇપલાઇન બંધ થતાં ચિંતા વધી

શુક્રવારે ઇરાક તરફથી આવેલા ડ્રોન હુમલા બાદ સાઉદી અરેબિયાની East-West ઓઇલ પાઇપલાઇન બંધ કરવામાં આવી હતી. આ પાઇપલાઇન સાઉદી અરેબિયાને હોર્મુઝનો માર્ગ ટાળીને અન્ય રસ્તેથી ક્રૂડની નિકાસ કરવાની તક આપતી હતી. વિશ્વના સૌથી મોટા તેલ નિકાસકારની આ પાઇપલાઇન બંધ થતાં વૈશ્વિક તેલ પુરવઠાના 4% જેટલા હિસ્સા સામે જોખમ ઊભું થયું છે. પાઇપલાઇન ક્યારે ફરી શરૂ થશે તે અંગે સ્પષ્ટતા ન હોવાથી બજારમાં અનિશ્ચિતતા યથાવત્ છે. ગયા સપ્તાહે ક્રૂડના ભાવમાં લગભગ 8%નો ઉછાળો આવ્યો હતો અને જુલાઈ બાદ પ્રથમ વખત ભાવ $100ની સપાટી પાર પહોંચ્યા હતા.

હોર્મુઝ અંગેની બેઠક મુલતવી

હોર્મુઝની સ્થિતિ અંગે અખાતી દેશો અને ઈરાન વચ્ચે ઓમાનમાં યોજાનારી બેઠક મુલતવી રાખવામાં આવી છે. ઓમાનના વિદેશમંત્રી બદ્ર અલબુસૈદીએ આ અંગે માહિતી આપી હતી. બેઠક મુલતવી રહેતાં તણાવ ઝડપથી ઘટવાની આશાને પણ ફટકો લાગ્યો છે.

ભારત પર શું અસર થશે?

ભારત પોતાની ક્રૂડ જરૂરિયાતનો મોટો હિસ્સો આયાત કરે છે. તેથી લાંબા સમય સુધી ઊંચા ભાવ રહે તો પેટ્રોલ-ડીઝલ, પરિવહન ખર્ચ, રૂપિયો અને ફુગાવા પર દબાણ વધી શકે છે.

આ પણ વાંચો: Gold Silver Price : ચાંદીમાં એક ઝાટકે આવ્યો રૂ. 10,000નો કડાકો

અમારી WhatsApp ચેનલમાં જોડાવા નીચે આપેલી લિંક પર ક્લીક કરો

https://whatsapp.com/channel/0029VbDPNhHISTkJEDTirJ16