કાર અને SUV માટે બદલાશે પ્રદૂષણના નિયમો! એપ્રિલ 2029થી BS-VII લાગુ કરવાની તૈયારી

ભારતના વાહન ઉદ્યોગમાં પ્રદૂષણ નિયંત્રણના વધુ કડક ધોરણો તરફ આગળ વધવાની તૈયારી શરૂ થઈ છે. સરકાર નવી કાર અને સ્પોર્ટ્સ યુટિલિટી વ્હીકલ્સ—SUV માટે એપ્રિલ 2029થી ભારત સ્ટેજ-VII એટલે કે BS-VII ઉત્સર્જન ધોરણો લાગુ કરશે તેમ સૂત્રો તરફથી વિગત મળી છે.

હવે નવા ધોરણો તમામ પ્રકારનાં વાહનો માટે એકસાથે લાગુ કરવાને બદલે તબક્કાવાર અમલમાં મૂકવાની યોજના સરકાર ધરાવે છે. કાર અને SUV બાદ નાના માલની ડિલિવરી કરતાં વાહનો અને પિકઅપ વાન માટે એપ્રિલ 2030થી નવા ધોરણો લાગુ કરવાનો પ્રસ્તાવ છે. ભારે વાહનોને એપ્રિલ 2031થી આ વ્યવસ્થા હેઠળ આવરી લેવાની તૈયારી છે.

અધિકારીના જણાવ્યા અનુસાર, માર્ગ પરિવહન અને હાઇવે મંત્રાલયે પ્રસ્તાવિત માર્ગદર્શિકાને મંજૂરી આપી છે. નવા BS-VII ધોરણો યુરોપનાં Euro 7 ઉત્સર્જન ધોરણો સાથે સંપૂર્ણપણે સુસંગત હશે. આ અંગેના ડ્રાફ્ટ નોટિફિકેશન આ અઠવાડિયે જાહેર થવાની અપેક્ષા વ્યક્ત કરવામાં આવી છે. આમ, દર્શાવેલી સમયરેખા હાલ સરકારની પ્રસ્તાવિત અમલ યોજના છે.

BS એટલે ‘ભારત સ્ટેજ’. આ ધોરણો વાહનોમાંથી બહાર નીકળતા પ્રદૂષકોની મર્યાદા નક્કી કરે છે. તેમાં કાર્બન મોનોક્સાઇડ—CO, નાઇટ્રોજન ઑક્સાઇડ્સ—NOx, હાઇડ્રોકાર્બન્સ—HC અને સૂક્ષ્મ રજકણો—PM જેવા પ્રદૂષકોનો સમાવેશ થાય છે. સરળ ભાષામાં કહીએ તો, વાહન કેટલું પ્રદૂષણ કરી શકે તેની મર્યાદા આ નિયમો દ્વારા નક્કી થાય છે. ભારતનાં વાહન ઉત્સર્જન ધોરણો યુરોપિયન ધોરણોને અનુરૂપ વિકસાવવામાં આવ્યાં છે. વધુ પ્રદૂષણ કરતાં વાહનોને તબક્કાવાર ઓછાં કરીને સ્વચ્છ ટેક્નોલોજીવાળાં વાહનો તરફ આગળ વધવું તેનો હેતુ છે.

હાલ દેશમાં એપ્રિલ 2020થી BS-VI ધોરણો અમલમાં છે. પ્રદૂષણ નિયંત્રણની પ્રક્રિયાને ઝડપ આપવા ભારતે BS-Vનો તબક્કો છોડીને સીધાં BS-VI ધોરણો અપનાવ્યાં હતાં. આ ધોરણો અનુસારનાં વાહનો ઓછું પ્રદૂષણ કરે છે અને તેમના માટે ઓછા સલ્ફરવાળું BS-VI ઇંધણ જરૂરી હોય છે. હવે BS-VII તરફની તૈયારી વાહન ઉત્પાદકો માટે આગામી મહત્વપૂર્ણ ફેરફાર બની શકે છે. જોકે, ચોક્કસ તકનિકી જોગવાઈઓ અને અમલની શરતો અંગે વધુ સ્પષ્ટતા ડ્રાફ્ટ તથા અંતિમ નોટિફિકેશનથી મળશે.

આ પણ વાંચો: UKમાં ભારતીય વિદ્યાર્થીઓનાં સપના પર લટકતી તલવાર! યુનિવર્સિટીઓએ એડમિશન ઑફર પાછી ખેંચી

આ પણ જુઓ:

Watch onYouTube