દિવાળી પહેલાં ખિસ્સા ખાલી! RBI આપી શકે મોટો ઝટકો, વધી શકે Repo Rate

દિવાળી પહેલાં લોન લેનારા લોકો માટે RBIની આગામી MPC બેઠક મહત્વની બની શકે છે. ઓક્ટોબરની બેઠક પહેલાં રેપો રેટમાં વધારાની ચર્ચા તેજ થઈ છે. Business Standardના પોલમાં 10માંથી 8 અર્થશાસ્ત્રીઓએ 25 બેસિસ પોઈન્ટના વધારાનો અંદાજ વ્યક્ત કર્યો છે. જોકે, અંતિમ નિર્ણય RBIની MPC બેઠક બાદ જ સ્પષ્ટ થશે.

5થી 7 ઓક્ટોબર સુધી MPC બેઠક

RBIની છ સભ્યોની મોનેટરી પોલિસી કમિટી (MPC)ની બેઠક 5થી 7 ઓક્ટોબર 2026 દરમિયાન યોજાવાની છે. બેઠક બાદ 7 ઓક્ટોબરે પોલિસીનો નિર્ણય જાહેર કરવામાં આવશે. RBIએ અગાઉની ચાર બેઠકોમાં રેપો રેટ 5.25% પર યથાવત રાખ્યો છે. આ પહેલાં 2025 દરમિયાન રેપો રેટમાં કુલ 125 બેસિસ પોઈન્ટનો ઘટાડો કરવામાં આવ્યો હતો. જો ઓક્ટોબરમાં 25 બેસિસ પોઈન્ટનો વધારો થાય છે, તો ફેબ્રુઆરી 2023 બાદ આ પ્રથમ રેપો રેટ વધારો હશે. ફેબ્રુઆરી 2023માં રેપો રેટ 25 બેસિસ પોઈન્ટ વધારીને 6.50% કરવામાં આવ્યો હતો.

મોંઘવારી RBI માટે મહત્વનો મુદ્દો

રેપો રેટ વધારાની સંભાવના પાછળ મોંઘવારીને મહત્વનું કારણ માનવામાં આવી રહ્યું છે. ઓગસ્ટ 2026માં રિટેલ મોંઘવારી વધીને 4.82% થઈ હતી. આ સાથે તે સતત ત્રીજા મહિને RBIના 4%ના મધ્યમ ગાળાના લક્ષ્યથી ઉપર રહી હતી. ખાદ્ય અને ઊર્જાના ભાવમાં વધારો મોંઘવારી પર દબાણ વધારતો પરિબળ રહ્યો છે. બીજી તરફ, ઓગસ્ટમાં હોલસેલ મોંઘવારી પણ વધીને 9.92% થઈ હતી, જે જુલાઈમાં 9.78% હતી. મોંઘા ક્રૂડ ઓઈલ અને ભૌગોલિક-રાજકીય તણાવને કારણે આગળ પણ મોંઘવારી પર દબાણ રહેવાની ચિંતા વ્યક્ત કરવામાં આવી છે.

મજબૂત ગ્રોથ સામે મોંઘવારીનું સંતુલન

ભારતીય અર્થવ્યવસ્થાની ગ્રોથ પ્રમાણમાં મજબૂત રહી છે. આવી સ્થિતિમાં RBI સામે મોંઘવારીને નિયંત્રિત કરવાની સાથે આર્થિક પ્રવૃત્તિ જળવાઈ રહે તે વચ્ચે સંતુલન સાધવાનો પડકાર છે. Business Standardના પોલમાં સામેલ અર્થશાસ્ત્રીઓએ આ પરિબળોને ધ્યાનમાં રાખીને ઓક્ટોબરમાં 25 બેસિસ પોઈન્ટના રેપો રેટ વધારાનો અંદાજ વ્યક્ત કર્યો છે.

રૂપિયા અને વૈશ્વિક વ્યાજદર પણ મહત્વના

આ વર્ષે ભારતીય રૂપિયો અમેરિકન ડોલરની સરખામણીમાં આશરે 6% નબળો પડ્યો છે. અમેરિકા સહિતની કેટલીક મોટી અર્થવ્યવસ્થાઓમાં વ્યાજદરમાં થતા ફેરફારોને કારણે ભારત અને અમેરિકા વચ્ચેનો વ્યાજદરનો તફાવત પણ RBI માટે મહત્વનો પરિબળ છે. વ્યાજદરનો તફાવત વિદેશી રોકાણના પ્રવાહ અને રૂપિયાની સ્થિરતા પર અસર કરી શકે છે.

રેપો રેટ વધે તો EMI પર શું અસર થશે?

જો RBI રેપો રેટમાં વધારો કરે છે તો બેન્કિંગ સિસ્ટમમાં લોનની કિંમત વધી શકે છે. ખાસ કરીને રેપો-લિન્ક્ડ ફ્લોટિંગ રેટ હોમ લોન અને અન્ય લોન પર તેની અસર થઈ શકે છે. જોકે, EMIમાં વાસ્તવિક ફેરફાર સંબંધિત બેન્કના વ્યાજદર અને લોનની શરતો પર નિર્ભર રહેશે.

આ પણ વાંચો : ગુજરાતીઓએ PPFને કેમ તડકે મૂકી NPSમાં રોકાણ કરવા લગાવી દોટ?

આ પણ જુઓ :

Watch onYouTube