કેપિટલ ગૂડ્સ સેક્ટરની કામગીરી પહેલા અર્ધવાર્ષિક સમયગાળામાં નબળી, બીજા ભાગમાં રિકવરીની આશા

નવી દિલ્હીઃ ભારતના કેપિટલ ગૂડ્સ અને પાવર ઇક્વિપમેન્ટ સેક્ટરે પહેલા અર્ધવાર્ષિક સમયગાળામાં નબળી કામગીરી બજાવી હતી, જ્યારે બીજા ભાગમાં તે રિકવરી નોંધાવે તેમ માનવામાં આવે છે. મલ્ટીયર થર્મલ પાવર ઓર્ડરિંગ સાઇકલ પાવર ઇક્વિપમેન્ટ ઉત્પાદકોને તેના કારણે વર્ષના બીજા ભાગમાં રાહત થઈ જાય તેમ માનવામાં આવે છે, એમ 360 વન કેપિટલના રિપોર્ટમાં જણાવાયું છે.

અહેવાલે જણાવ્યું હતું કે ઓર્ડર ઇનફ્લો મજબૂત રહ્યો છે. તેમા વાર્ષિક ધોરણે 19.2 ટકાના દરે વૃદ્ધિ જોવા મળી છે. આ સેક્ટરના ઉત્પાદનોની માંગ રેસિડેન્સિયલ રિયલ એસ્ટેટ, ક્વિક કોમર્સ, માઇનિંગ, ફૂડ એન્ડ બેવરેજીસ, ફાર્માસ્યુટિકલ અને ડેટા સેન્ટરમાં જોવા મળી રહી છે, જે રોકાણનો પ્રવાહ મજબૂત હોવાનું દર્શાવે છે.

કેટલીક કંપનીઓ મજબૂત આવકવૃદ્ધિ દર્શાવે છે. તેના પગલે ઇલેક્ટ્રિકલ ઇક્વિપમેન્ટની માંગ જોવા મળી રહી છે. આ ઉપરાંત કેટલીક એન્જિનિયરિંગ, પ્રોક્યોરમેન્ટ અને કન્સ્ટ્રકશન (ઇપીસી) કંપનીઓ મધ્યપૂર્વની વર્તમાન કટોકટીના લીધે મુશ્કેલીનો સામનો કરી રહી છે. હવે જે કંપનીઓનું મધ્યપૂર્વમાં એક્સ્પોઝર વધારે છે તેમના પર આ કટોકટીની વધુ અસર થઈ રહી છે.

ઉદ્યોગનો કાર્યકારી નફો અને કરબાદ નફો 2.2 ટકા અને 12.8 ટકાના વાર્ષિક ધોરણે વૃદ્ધિ પામ્યા છે. ડીલિવરેજિંગના ટેકાથી નીચા વ્યાજખર્ચે કરબાદ નફો કાર્યકારી નફા કરતાં વધુ ઝડપે વૃદ્ધિ પામી રહ્યો છે. જ્યારે કાર્યકારી નફા માર્જિન કોમોડિટીના ઊંચા ખર્ચના કારણે વાર્ષિક ધોરણે 69 બેસિસ પોઇન્ટ ઘટ્યા છે. અહેવાલે જણાવ્યું હતું કે વીજ માંગમાં થયેલા વધારાના લીધે બેઝલોડ જનરેશન જરૂરી છે. તેના લીધે થર્મલ સાઇકલ સ્ટ્રોંગ રહેશે.

અહેવાલે જણાવ્યું હતું કે થર્મલ પાવર ઓર્ડર આગામી કેટલાક વર્ષ સુધી મજબૂત રહે તેવી સંભાવના છે. તેનું કારણ એ છે કે રાજ્યો દ્વારા નવા ટેન્ડરો જારી કરવામાં આવ્યા છે અને મધ્યમથી લાંબા ગાળાના ખરીદ કરારો દ્વારા વીજએકમો વીજપુરવઠો સુનિશ્ચિત કરી રહ્યા છે.