ભારતમાં બેરોજગારી ઘટીને છેલ્લા 6 મહિનાના સૌથી નીચા સ્તરે પહોંચી, ગામડાંમાં રોજગારમાં સુધારો

ભારતમાં રોજગાર ક્ષેત્ર માટે ઓગસ્ટ મહિનાના આંકડા રાહત આપનારા રહ્યા છે. સરકારી આંકડા મુજબ દેશનો બેરોજગારી દર ઓગસ્ટમાં ઘટીને 5% થયો છે, જે જુલાઈના 5.1% કરતાં ઓછો છે. આ છેલ્લા 6 મહિનામાં બેરોજગારીનું સૌથી નીચું સ્તર છે. આ સુધારો મુખ્યત્વે ગ્રામ્ય વિસ્તારોને કારણે થયો છે. ગામડાંમાં રોજગારની સ્થિતિ સુધરતાં દેશનો કુલ બેરોજગારી દર નીચે આવ્યો છે. જોકે, શહેરોમાં સ્થિતિ તેનાથી અલગ રહી છે.

ગામડાંમાં રોજગારમાં મોટો સુધારો

ગ્રામ્ય વિસ્તારોમાં બેરોજગારીનો દર જુલાઈના 4.5%થી ઘટીને ઓગસ્ટમાં 4.1% થયો છે. જાન્યુઆરી 2026 પછી ગ્રામ્ય બેરોજગારીનું આ સૌથી નીચું સ્તર છે. ગ્રામ્ય પુરુષોમાં બેરોજગારી 4.6%થી ઘટીને 4.3% થઈ છે, જ્યારે ગ્રામ્ય મહિલાઓમાં આ દર 4.3%થી ઘટીને 3.9% થયો છે. આ આંકડા દર્શાવે છે કે ઓગસ્ટમાં રોજગારની સ્થિતિમાં સુધારો મુખ્યત્વે ગ્રામ્ય ભારતના કારણે થયો છે.

શહેરોમાં બેરોજગારી વધી

બીજી તરફ શહેરી વિસ્તારોમાં બેરોજગારીનો દર થોડો વધ્યો છે. જુલાઈના 6.7%થી વધીને ઓગસ્ટમાં 6.8% થયો છે. શહેરોમાં પુરુષોની બેરોજગારી 5.9%થી વધીને 6.1% થઈ છે. મહિલાઓમાં બેરોજગારી લગભગ સ્થિર રહી છે. એટલે દેશના કુલ બેરોજગારીના આંકડામાં ઘટાડો થયો હોવા છતાં શહેરોમાં રોજગારની સ્થિતિમાં હજુ ખાસ સુધારો જોવા મળ્યો નથી.

લોકોની કામકાજમાં ભાગીદારી વધી

ઓગસ્ટમાં લેબર ફોર્સ પાર્ટિસિપેશન રેટ એટલે કે કામ કરતા અથવા કામ શોધી રહેલા લોકોનો હિસ્સો વધીને 55.6% થયો છે. જુલાઈમાં આ દર 55.4% હતો. ગ્રામ્ય વિસ્તારોમાં આ દર 58.0%થી વધીને 58.2% થયો છે, જ્યારે શહેરી વિસ્તારોમાં તે 50.4% પર સ્થિર રહ્યો છે. મહિલાઓની કામકાજમાં ભાગીદારી પણ વધી છે. સમગ્ર દેશમાં મહિલા ભાગીદારીનો દર જુલાઈના 34.4%થી વધીને ઓગસ્ટમાં 34.8% થયો છે. ગ્રામ્ય મહિલાઓમાં આ દર 38.8%થી વધીને 39.4% થયો છે.

આ પણ વાંચો: UPI Transaction Charges : UPIથી રૂ. 2,000થી વધુની ખરીદી પર તમને શું અસર થશે?

રોજગારમાં રહેલી વસ્તીનો દર પણ વધ્યો

Worker Population Ratio એટલે કે કુલ વસ્તીમાં રોજગારમાં રહેલા લોકોનો હિસ્સો પણ ઓગસ્ટમાં વધ્યો છે. આ દર જુલાઈના 52.5%થી વધીને 52.8% થયો છે. ગ્રામ્ય વિસ્તારોમાં આ દર 55.4%થી વધીને 55.8% થયો છે. જોકે શહેરી વિસ્તારોમાં તે 47% પર યથાવત રહ્યો છે. વર્ષના આધારે પણ સ્થિતિમાં સુધારો જોવા મળ્યો છે. ઓગસ્ટ 2025ની સરખામણીએ સમગ્ર દેશમાં કામકાજમાં ભાગીદારીનો દર 0.6 ટકા પોઈન્ટ વધ્યો છે, જ્યારે મહિલાઓની ભાગીદારી 1.1 ટકા પોઈન્ટ વધી છે. આ આંકડા PLFSની Current Weekly Status પદ્ધતિ પર આધારિત છે, જેમાં સર્વે પહેલાંના 7 દિવસ દરમિયાન વ્યક્તિની રોજગાર સ્થિતિને ધ્યાનમાં લેવામાં આવે છે.