₹2,000 સુધીના UPI વ્યવહારો પર પ્રત્યક્ષ કે પરોક્ષ ચાર્જ નહીં લાગે, કેન્દ્રની સ્પષ્ટતા

UPI હવે સામાન્ય ખરીદીથી લઈને નાના વેપારીઓની આવક સુધીની મુખ્ય ચુકવણી વ્યવસ્થા બની ગયું છે. સરકારની સ્પષ્ટતાથી નાની રકમના વ્યવહારો ચાર્જમુક્ત રહેશે, પરંતુ ₹2,000થી વધુની વેપારી ચુકવણી અંગે આગામી નીતિ પર નજર રાખવી જરૂરી રહેશે. નાણાં મંત્રાલય દ્વારા જાહેર કરાયેલા નિયમો મુજબ, નાની રકમના ડિજિટલ વ્યવહારોને ચાર્જમુક્ત રાખવામાં આવ્યા છે. આ જોગવાઈ ચુકવણી કરનાર અને રકમ સ્વીકારનાર—બંને પક્ષને લાગુ પડશે. દુકાનમાં QR Code દ્વારા ₹2,000 સુધીની ચુકવણી કરવા બદલ ગ્રાહક કે વેપારી પાસેથી વ્યવહાર ચાર્જ વસૂલી શકાશે નહીં. આ નિયમ RuPay આધારિત ડેબિટ કાર્ડથી થતી ચુકવણીને પણ આવરી લે છે. તેનો હેતુ નાના વેપારીઓ અને સામાન્ય ગ્રાહકો માટે રોજિંદા ડિજિટલ વ્યવહારોને સસ્તા અને સરળ રાખવાનો છે.

નવા નિયમથી ₹2,000થી વધુના UPI વ્યવહારો પર તાત્કાલિક ચાર્જ લાગુ થયો નથી. કાયદાકીય ફેરફારથી સરકારને ભવિષ્યમાં મોટી વેપારી ચુકવણી માટે Merchant Discount Rate એટલે કે MDR અંગે અલગ વ્યવસ્થા બનાવવાનો માર્ગ મળ્યો છે, પરંતુ ચાર્જના દર કે અમલ અંગે હજુ કોઈ અંતિમ નિર્ણય જાહેર થયો નથી. સામાન્ય વ્યક્તિથી વ્યક્તિ વચ્ચેના UPI નાણાં ટ્રાન્સફર પણ ચાર્જમુક્ત રહેવાની સ્પષ્ટતા કરવામાં આવી છે. ₹2,000 સુધીના વ્યવહારો ચાર્જમુક્ત રહેવાથી આવા વેપારીઓને ડિજિટલ ચુકવણી સ્વીકારવાનો વધારાનો ખર્ચ નહીં થાય. મોટી કિંમતની વેપારી ચુકવણી અંગે ભવિષ્યમાં MDR લાગુ થાય તો તેનો પ્રભાવ મુખ્યત્વે ઊંચી રકમના વ્યવહારો ધરાવતા વેપારીઓ અને ડિજિટલ ચુકવણી કંપનીઓ પર પડી શકે છે.

આ પણ વાંચો: બજાર આજે લીલા નિશાન સાથે ખુલ્યુ, સેન્સેક્સ 500થી વધુ પોઈન્ટ ઉછળ્યો