સપ્ટેમ્બરમાં મૂડીબજારમાં તડાકો, પણ ભડાકો તો હજી બાકી છે...

IPO News: શેરબજારમાં સપ્ટેમ્બરમાં IPOની ભરમાર રહી હતી. જો કોઈ એમ માની લે કે મૂડીબજારમાં IPOનો પ્રવાહ સપ્ટેમ્બર પૂરતો જ સીમિત હતો તો તે ભૂલ કરે છે. સપ્ટેમ્બરમાં આવેલી તેજી તો હજી શરૂઆત હતી. આગામી દિવસોમાં બજારમાં કુલ 4.48 લાખ કરોડના IPO આવવાના છે, કુલ 237 કંપનીઓ આટલી રકમના આઇપીઓ લઈને આવશે. IPO નો આ આંકડો હજી પણ વધી શકે છે. તેમા રિલાયન્સ જિયોનો આઇપીઓ સૌથી મોટો લગભગ 37,000 કરોડથી પણ વધુ રકમનો હશે.

આ 237 કંપનીમાંથી કુલ 120 કંપનીઓને IPO માટે સેબીની મંજૂરી મળી ગઈ છે. આટલા મંજૂર થયેલા ઇશ્યૂની રકમનું કદ 2,34,323 કરોડનું હોવાનું મનાય છે. બીજી 117 કંપનીઓએ પેપર ફાઇલ કર્યા છે, પરંતુ તે હજી પણ મંજૂરીની રાહ જોઈ રહ્યા છે. આ 117 કંપનીઓ વેઇટિંગમાં છે તે કુલ 2,13,669 કરોડની રકમ એકત્રિત કરશે.

સેબીએ મંજૂર કરેલા IPOમાં જોઈએ તો જિયો પ્લેટફોર્મનું કદ સૌથી મોટું રૂ. 37,700 કરોડ છે. તેના પછીના ક્રમે અવાડા ઇલેક્ટ્રોનું કદ રૂ. 7,600 કરોડ છે. જ્યારે ઓયોની પેરેન્ટ કંપની ઓરેવલ સ્ટેઝના IPOનું કદ રૂ. 6,650 કરોડ છે. ઝેપ્ટો અને ઇન્ફ્રા માર્કેટના ઇશ્યુનું કદ અનુક્રમે રૂ. 5,106 કરોડ અને રૂ. 5,000 કરોડ છે.

હવે સેબીની મંજૂરીની રાહ જોઈ રહેલા IPOમાં જોઈએ તો ફોનપેના ઇશ્યૂનું કદ રૂ. 12,000 કરોડ છે. જ્યારે આઇનોક્સ ક્લીન એનર્જી અને મહાનદી કોલફિલ્ડ્સના ઇશ્યુનું કદ 10,000 કરોડ-10,000 કરોડ છે. ઉલ્લેખનીય છે કે સપ્ટેમ્બરમાં કુલ 34 કંપનીઓ આવી હતી અને તેણે કુલ રૂ. 39,380 કરોડ એકત્રિત કર્યા હતા. જો સેબી IPOને નકારે તો કુલ ભંડોળની રકમ ઘટી શકે છે અને વધુ બીજા IPOને મંજૂરી આપે તો આ રકમ પાંચ લાખ કરોડે પહોંચી જશે તો પણ આશ્ચર્ય નહીં થાય.

આ પણ જુઓઃ

Watch onYouTube