આગામી સપ્તાહે IPO બજારમાં ધૂમ: ₹10,000 કરોડના 3 નવા IPOમાં રોકાણની તક, જાણો વિગતો

Upcoming IPOs: વર્ષ 2026 ના પ્રથમ 10 મહિના શેરબજારના રોકાણકારો માટે ખૂબ જ શાનદાર રહ્યા છે. આ સમયગાળા દરમિયાન પ્રાઈમરી માર્કેટ એટલે કે IPO બજારમાં જબરદસ્ત તેજી જોવા મળી છે. આંકડાઓ પર નજર કરીએ તો, અત્યાર સુધીમાં કુલ 303 કંપનીઓએ બજારમાં પોતાના IPO રજૂ કર્યા છે અને તેના માધ્યમથી રેકોર્ડ 1.66 લાખ કરોડ રૂપિયાનું ભંડોળ એકત્ર કર્યું છે. આમાંથી માત્ર મેઈનબોર્ડની 109 કંપનીઓનો હિસ્સો જ 1.57 લાખ કરોડ રૂપિયાથી વધુ રહ્યો છે. દિવાળીના તહેવારો દરમિયાન છેલ્લા 2 અઠવાડિયાથી IPO બજાર થોડું સુસ્ત અને શાંત હતું, પરંતુ હવે આગામી 16 નવેમ્બરથી શરૂ થતા નવા ટ્રેડિંગ સપ્તાહમાં આ બજાર ફરીથી ધમધમતું થવા જઈ રહ્યું છે. આગામી અઠવાડિયે રોકાણકારોને કમાણી કરવાની શાનદાર તક મળવાની છે, કારણ કે 3 નવી કંપનીઓ 10,000 કરોડ રૂપિયાથી વધુના IPO લઈને આવી રહી છે. આમાં 2 મેઈનબોર્ડ અને 1 SME (સ્મોલ એન્ડ મીડિયમ એન્ટરપ્રાઈઝ) IPO નો સમાવેશ થાય છે. ચાલો આ ત્રણેય કંપનીઓ વિશે વિગતે જાણીએ:

મહાનદી કોલફિલ્ડ્સનો મહાકાય IPO

આગામી સપ્તાહનો સૌથી મોટો અને ચર્ચિત IPO કોલ ઈન્ડિયાની પેટાકંપની 'મહાનદી કોલફિલ્ડ્સ' નો છે. આ મહાકાય IPO નું કદ 9,500 કરોડ રૂપિયાનું છે. રોકાણકારો આ કંપનીના શેરમાં 19 નવેમ્બરથી લઈને 23 નવેમ્બર સુધી પોતાની બોલી લગાવી શકશે. ખાસ ધ્યાનમાં રાખવા જેવી બાબત એ છે કે આ ઈશ્યૂ સંપૂર્ણપણે 'ઓફર ફોર સેલ' (OFS) છે. તેનો સીધો અર્થ એ થાય છે કે IPO દ્વારા મળનારા નાણાં કંપનીના ખાતામાં નહીં, પરંતુ પોતાના શેર વેચી રહેલા પ્રમોટર્સ (કોલ ઈન્ડિયા) પાસે જશે. આ ઈશ્યૂ મારફતે કોલ ઈન્ડિયા પોતાનો 10 ટકા હિસ્સો એટલે કે 661.8 મિલિયન ઈક્વિટી શેર વેચવા જઈ રહી છે.

ક્રિસ્ટલ ક્રોપ પ્રોટેક્શનમાં રોકાણની તક

મહાનદી કોલફિલ્ડ્સનો ઈશ્યૂ ખુલે તેના બરાબર એક દિવસ પહેલાં એટલે કે 18 નવેમ્બરના રોજ 'ક્રિસ્ટલ ક્રોપ પ્રોટેક્શન' નો IPO ખુલવા જઈ રહ્યો છે. ઈન્ટરનેશનલ ફાઈનાન્સ કોર્પોરેશન (IFC) નું સમર્થન ધરાવતી આ એગ્રોકેમિકલ્સ અને બિયારણ બનાવતી કંપની છે. આ ઈશ્યૂ 20 નવેમ્બરના રોજ બંધ થશે. કંપનીએ પોતાના શેરની પ્રાઇસ બેન્ડ 259 થી 272 રૂપિયા નક્કી કરી છે અને રોકાણકારોએ ઓછામાં ઓછા 55 શેરના એક લોટ માટે અરજી કરવાની રહેશે. આ 455 કરોડ રૂપિયાના IPO માં 355 કરોડ રૂપિયાના નવા શેર બહાર પાડવામાં આવશે, જ્યારે કંપનીના પ્રમોટર અંકુર અગ્રવાલ ઓફર ફોર સેલ દ્વારા 100.7 કરોડ રૂપિયાના મૂલ્યના 37.02 લાખ શેર વેચશે. નવા શેર થકી મળનારા ભંડોળમાંથી 270 કરોડ રૂપિયાનો ઉપયોગ કંપની પોતાનું દેવું ચૂકવવા માટે કરશે. ઓગસ્ટ 2026 ના અંત સુધીમાં કંપની પર 962.6 કરોડ રૂપિયાનું દેવું હતું. બાકીની રકમનો ઉપયોગ કંપનીના રોજિંદા વહીવટી કાર્યો માટે કરવામાં આવશે.

વાત્રાણા રેન્ટલ્સનો SME IPO

આ ઉપરાંત, આગામી અઠવાડિયે 'વાત્રાણા રેન્ટલ્સ' નામનો એક SME IPO પણ બજારમાં દસ્તક આપી રહ્યો છે. મટિરિયલ હેન્ડલિંગ ઈક્વિપમેન્ટ પૂરા પાડતી આ કંપનીનો 120 કરોડ રૂપિયાનો ઈશ્યૂ 19 નવેમ્બરથી 23 નવેમ્બર સુધી ખુલ્લો રહેશે. આ માટે કંપનીએ 232 થી 245 રૂપિયાની પ્રાઇસ બેન્ડ રાખી છે અને રોકાણકારોને એક લોટમાં 600 શેર મળશે. આ ઈશ્યૂ સંપૂર્ણપણે ફ્રેશ ઈશ્યૂ છે. તેમાંથી એકત્ર થનારા ફંડમાંથી 98.12 કરોડ રૂપિયાનો ઉપયોગ કંપની નવા મટિરિયલ હેન્ડલિંગ ઈક્વિપમેન્ટ, એરિયલ વર્ક પ્લેટફોર્મ અને બેટરીઓ ખરીદવા માટે કરશે અને બાકીનું ભંડોળ સામાન્ય કોર્પોરેટ હેતુઓ માટે વપરાશે.

આ પણ વાંચોઃ ઓટો સેક્ટરમાં તેજી: ઓક્ટોબરમાં ટુ-વ્હીલરનું વેચાણ 16.1% વધ્યું, SIAM એ જાહેર કર્યા આંકડા

આ પણ જુઓ

Watch onYouTube