India Jewellery Exports October 2026 : ભારતીય જ્વેલરીની વિદેશમાં ધૂમ! ઓક્ટોબરમાં નિકાસ 34% વધી, ₹27,862 કરોડને પાર

ક્રિસમસના તહેવારની રજાઓ પહેલા મજબૂત ઓર્ડર મળવાના કારણે ઓક્ટોબરમાં ભારતની જેમ એન્ડ જ્વેલરીની નિકાસ 34.01 ટકા વધીને 2.92 અબજ ડોલર (રૂ.27,862.82 કરોડ) થઈ ગઈ. જેમ એન્ડ જ્વેલરી એક્સપોર્ટ પ્રમોશન કાઉન્સિલ (GJEPC) મુજબ ગયા વર્ષે સમાન મહિનામાં જેમ એન્ડ જ્વેલરીની કુલ નિકાસ 2.18 અબજ ડોલર (રૂ. 19,253.60 કરોડ) થઈ હતી. ચાલુ નાણઆકીય વર્ષમાં એપ્રિલથી ઓક્ટોબરના સમયમાં ભારતની જેમ એન્ડ જ્વેલરીની નિકાસ 7.28 ટકા વધીને રૂ. 17.22 અબજ ડોલર (રૂ. 1,63,961.74 કરોડ) થઈ હતી. ગયા વર્ષે સમાન સમયમાં તે 16.05 અબજ ડોલર (રૂ. 1,39,239.22 કરોડ) થઈ હતી.

હોંગકોંગ અને અમેરિકામાં નિકાસ વધી

ભારતના અગ્રણી નિકાસ બજારોમાં સામેલ હોંગકોંગમાં એપ્રિલથી ઓક્ટોબર 2026 દરમિયાન નિકાસ 18.80 ટકા વધીને 3.95 અબજ ડોલર થઈ ગઈ. બીજીબાજુ અમેરિકામાં નિકાસ 14.87 ટકા વધીને 3.61 અબજ ડોલર થઈ હતી. બેલ્જિયમમાં નિકાસ 30.02 ટકા વધીને 92.319 કરોડ ડોલર થઈ હતી. આ સિવાય સિંગાપુરમાં નિકાસમાં 22.38 ટકા, બ્રિટનમાં 17.89 ટકા અને કેનેડામાં નિકાસમાં 107.93 ટકાનો વધારો નોંધાયો હતો. જોકે, ભારતના સૌથી મોટા નિકાસ બજાર સંયુક્ત આરબ અમિરાત (યુએઈ)માં નિકાસ 10.27 ટકા ઘટીને 4.87 અબજ ડોલર રહી હતી.

વૈશ્વિક રજાઓના વાતાવરણ પહેલા મળ્યા ઓર્ડર

GJEPCએ કહ્યું કે, ઓક્ટોબરના નિકાસના આંકડા પર તહેવારોની તારીખોમાં ફેરફારની પણ અસર જોવા મળી રહી છે. ગયા વર્ષે ઓક્ટોબરમાં દિવાળી હોવાના કારણે આભૂષણ કારોબારના મુખ્ય કેન્દરોમાં કામકાજ બંધ રહ્યું હતું.તેનાથી વિપરિત આ વર્ષે દિવાળી નવેમ્બરમાં હોવાથી નિર્માતાઓ અને નિકાસકારોને વૈશ્વિક રજાઓના વાતાવરણ પહેલા મળેલા ઓર્ડર પૂરા કરવા માટે ઓક્ટોબરનો આખો મહિનો મળ્યો હતો.

GJEPCના ચેરમેન કિરીટ ભણસાલીએ કહ્યું, ઓક્ટોબરમાં જેમ એન્ડ જ્વેલરીની નિકાસમાં 34 ટકાની વૃદ્ધિ ઉદ્યોગની મજબૂતી અને આંતરરાષ્ટ્રીય બજારોમાં ઉપલબ્ધ તકોનો લાભ ઉઠાવવાની તેની ક્ષમતાનો ઉત્સાહજનક સંકેત છે. આ પ્રદર્શન એવા સમયમાં સામે આવ્યું છે જ્યારે દુનિયાભરના રીટેલ વિક્રેતા અને ખરીદાર વર્ષના અંતમાં રજાઓની મોસમની તૈયારી કરી રહ્યા છે. આ દરમિયાન પ્રમુખ બજારોમાં ઘરેણાંની માગ સામાન્ય રીતે વધી જાય છે.

નાણાકીય વર્ષ 2026-27માં નિકાસ 10 ટકા વધવાનો અંદાજ

GJEPC મુજબ એપ્રિલથી ઓક્ટોબર દરમિયાન નિકાસમાં 7.28 ટકાની વૃદ્ધિ ઉત્સાહજનક છે. આ સમયમાં અમેરિકન બજારમાં નિકાસ 14.87 ટકા વધી છે. છેલ્લા ત્રણ મહિનામાં નિકાસમાં સતત વૃદ્ધિ જોવા મળી છે. વર્તમાન ગતિ જળવાઈ રહે અને કોઈ મોટો અવરોધ ના આવે તો નાણાકીય વર્ષ 2026-27ના અંત સુધીમાં નિકાસમાં 10 ટકાની વૃદ્ધિ હાંસલ થવાની આશા છે. પોલિશ કરાયેલા હીરાની નિકાસ પણ ફરી એક વખત વધવા લાગી છે. ઓક્ટોબરમાં તેની નિકાસમાં 10.50 ટકાની વૃદ્ધિ નોંધાઈ હતી. આ વૈશ્વિક હીરા કારોબારમાં ધીમે ધીમે ગતિ પાછા ફરવાનો સંકેત છે.

આ પણ જૂઓ

Watch onYouTube