Pulses Stock : દાળોના સંગ્રાહખોરો પર સરકારની લાલ આંખ, દર સપ્તાહે આપવો પડશે સ્ટોકનો હિસાબ

દેશમાં મોંઘવારી સતત વધી રહી છે ત્યારે દાળોના ભાવને નિયંત્રણમાં રાખવા અને સંગ્રાહખોરીની આશંકા ખતમ કરવા માટે કેન્દ્ર સરકારે સ્ટોક નિરીક્ષણ વ્યવસ્થા આકરી કરી દીધી છે. ગ્રાહક બાબતોના મંત્રાલયે વેપારીઓ, ડીલરો, સ્ટોકિસ્ટો, આયાતકાર, મિલર્સ, જથ્થાબંધ વેપારી અને રિટેલર્સ સહિત બધા જ સ્ટોક રાખનારા એકમો માટે દાળોના સ્ટોકની સાપ્તાહિક જાહેરાત ફરજિયાત કરી દીધી છે. આ બધાએ ગ્રાહક બાબતોના વિભાગના ઓનલાઈન પોર્ટલ પર પ્રત્યેક સપ્તાહે તેમની પાસે ઉપલબ્ધ દાળોના સ્ટોકની માહિતી આપવી પડશે.

ગ્રાહક બાબતોના વિભાગના સચિવ નિધિ ખરેએ દાળ કારોબાર સાથે સંકળાયેલા વેપારીઓ, ડીલરો અને સ્ટોકિસ્ટો સાથે બેઠક કરીને બજારમાં દાળોની ઉપલબ્ધતા અને સ્ટોકની જાહેરાતની સ્થિતિની સમીક્ષા કરી હતી. આ બેઠકમાં તેમણે સ્પષ્ટ કર્યું કે, તહેવારોની મોસમ પૂરી થયા પછી દાળોના ભાવમાં તિવ્ર વધારાનું કોઈ ઔચિત્ય નથી. સરકાર બજારમાં પર્યાપ્ત પૂરવઠો સુનિશ્ચિત કરવા અને ભાવને સ્થિર રાખવા માટે સતત નિરીક્ષણ રાખી રહી છે.

સંગ્રાહખોરી અને ઈરાદાપૂર્વક ઊભી કરવામાં આવતી અછત પર રહેશે નજર

મંત્રાલયે સ્પષ્ટ કર્યું કે દાળોનો સ્ટોક રાખનારા બધા એકમોએ વિભાગના ઓનલાઈન પોર્ટલ (https://fcainfoweb.nic.in/psp/) પર પ્રત્યેક સપ્તાહે સ્ટોકની વિગતો માહિતી આપવી ફરજિયાત રહેશે. આ વ્યવસ્થાનો આશય દાળોના પૂરવઠામાં પારદર્શિતા વધારવા, સ્ટોકની વાસ્તવિક સ્થિતિનું આકલન કરવું અને જરૂર પડતા સમયસર હસ્તક્ષેપ કરવાનો છે.

નિધિ ખરેએ બીગ ચેઈન રિટેલર્સ, આયાતકારો, મિલર્સ, વેપારીઓ, ડીલરો અને સ્ટોકિસ્ટોની સાથે અલગ અલગ બેઠકો પણ કરી હતી. તેમાં સપ્લાય ચેઈનના વિવિધ સ્તરો પર ઉપલબ્ધ સ્ટોકની સમીક્ષા કરાઈ હતી. સાથે જ ઈરાદાપૂર્વક અછત ઊભી કરવા, સંગ્રાહખોરી અને નફાખોરી અટકાવવા માટે નિયમિત નિરીક્ષણની જરૂરિયાત પર ભાર મૂક્યો હતો.

ઉત્પાદન અને આયાત સાથે પૂરવઠાની સ્થિતિ વધુ સારી રહેવાની આશા

સચિવે ખરીફ 2026માં અડદ અને અન્ય દાળોના વાવેતરના વિસ્તારમાં ઉત્સાહજનક સ્થિતિનો ઉલ્લેખ કર્યો હતો. તેમણે કહ્યું કે, રવી મોસમનું વાવેતર પણ સતત આગળ વધી રહ્યું છે. આ સિવાય નિયમિત આયાતથી ઘરેલૂ બજારમાં દાળોની ઉપલબ્ધતાને સમર્થન મળી રહ્યું છે.

મંત્રાલયે એ બાબત પર પણ ચિંતા વ્યક્ત કરી કે મંડીઓમાં દાળોના ભાવમાં આવેલા ઘટાડાનો લાભ ગ્રાહકો સુધી સંપૂર્ણપણે પહોંચી રહ્યો નથી. મિલર્સ, ડીલર્સ અને રિટેલર્સ તરફથી મંડીમાં ઓછા ભાવનો ફાયદો રિટેલ ગ્રાહકો સુધી પર્યાપ્ત રૂપે પહોંચાડવામાં નથી આવી રહ્યો. સરકારે વેપારીઓ પાસેથી નીચા ભાવનો લાભ ગ્રાહકો સુધી પહોંચાડવાની અપેક્ષા રાખી છે.

ખાંડ અને ચોખાના ભાવ પર પણ નિયંત્રણ માટે લેવાયો નિર્ણય

1 ઓક્ટોબરથી ખાંડની સીઝન શરૂ થવાની સાથે સ્ટોક રાખવાની મર્યાદા વધુ આકરી કરતા 15 ઓક્ટોબરથી 30 નવેમ્બર સુધી ડીલરો માટે મહત્તમ 1,000 ક્વિન્ટલ અને 15 દિવસના વપરાશ જેટલો સ્ટોક રાખવાનો નિયમ લાગુ કરાયો છે. બીજીબાજુ મોટા ઔદ્યોગિક ગ્રાહકોને સપ્ટેમ્બરમાં 15 દિવસના બદલે 30 દિવસનો સ્ટોક રાખવાની મંજૂરી અપાઈ છે, પરંતુ વધારાનો સ્ટોક માત્ર એડવાન્સ ઓથોરાઈઝેશન સ્કીમ અને ટેરિફ રેટ ક્વોટા હેઠળ આયાતી ખાંડથી લેવાની શરત રખાઈ છે. બીજીબાજુ અનાજ અને ચોખાની બાબતમાં 6 નવેમ્બરે સરકારે સમગ્ર દેશના વેપારીઓ, જથ્થાબંધ વિક્રેતા, રિટેલર્સ, મોટી રીટેલ ચેઈન અને મિલર્સ માટે પ્રત્યેક શુક્રવારે સ્ટોકની માહિતી આપવી ફરજિયાત કરાયું છે. તેના હેઠળ બાસમતી, નોન-બાસમતી પ્રીમિયમ, નોન-બાસમતી, પારબોઈલ્ડ, તૂટેલા ચોખા અને ધાનનો સ્ટોક જાહેર કરવાનો રહેશે.

આ પણ જૂઓ

Watch onYouTube