Closing Bell: બજારમાં પ્રારંભિક તીવ્ર ઘટાડા પછી BSE Sensex 500 પોઇન્ટ નજીક વધીને બંધ આવ્યો

Closing Bell: બજારે સપ્તાહનો પ્રારંભ 300 પોઇન્ટના નોંધપાત્ર ઘટાડા સાથે કર્યા પછી એક સમયે લગભગ 609 પોઇન્ટનો ઘટાડો નોંધાવ્યા પછી બજાર દિવસના અંતે વધીને 500 પોઇન્ટની નજીક એટલે કે 483 પોઇન્ટ પર બંધ આવ્યું હતું. સોમવારે બેન્ચમાર્ક ઇક્વિટી ઇન્ડેક્સ સેન્સેક્સ અને નિફ્ટીમાં જોરદાર રિકવરી જોવા મળી હતી. સતત ચાર સત્રોના ઘટાડા બાદ, રોકાણકારોએ નીચા ભાવે ઉપલબ્ધ શેરોની ખરીદી કરતા બજારે શરૂઆતી નુકસાનમાંથી પુનરાગમન કર્યું હતું.

સેન્સેક્સ-નિફ્ટીમાં તીવ્ર વધઘટ

BSE સેન્સેક્સ 482.92 પોઈન્ટ અથવા 0.66 ટકાના વધારા સાથે 73,606.95 ના ​​સ્તરે બંધ રહ્યો હતો. NSE નિફ્ટી 153.20 પોઈન્ટ અથવા 0.68 ટકા વધીને 22,753.20 ના સ્તરે બંધ આવ્યો હતો. સવારના કારોબારમાં, સેન્સેક્સ 609.26 પોઈન્ટ અથવા 0.83 ટકા ઘટીને 72,514.57 પર આવી ગયો હતો, જ્યારે નિફ્ટી 212.65 પોઈન્ટ અથવા 0.94 ટકા ઘટીને 22,387.35 પર પહોંચ્યો હતો.

બીએસઇ સેન્સેક્સના 30માંથી 25 શેરો વધ્યા હતા અને પાંચ ઘટીને બંધ આવ્યા હતા. આ પાંચ ઘટેલા શેરોમાં બજાજ ફાઇનાન્સ, એચડીએફસી બેન્ક, મારુતિ, એચસીએલ ટેક, પાવરગ્રિડનો સમાવેશ થાય છે. જ્યારે એનએસઇના નિફ્ટીના 50માંથી 37 શેર વધ્યા હતા અને 13 શેર ઘટીને બંધ આવ્યા હતા. શ્રીરામ ફાઇનાન્સ, ટાટા કન્ઝ્યુમર, બજાજફાઇનાન્સ, એચડીએફસી લાઇફ, એચડીએફસી બેન્ક, સનફાર્મા, એચસીએલ ટેક, ટીએમપીવી, મહિન્દ્રા, પાવરગ્રિડ, નેસલે, મારુતિ અને બજાજ ઓટો ઘટીને બંધ આવ્યા હતા. તેમા શ્રીરામ ફાઇનાન્સ 4.62 ટકા અને ટાટા કન્ઝ્યુમર 2.84 ટકા તૂટ્યો હતો.

વેલ્યુ બાઈંગ

સતત ચાર સત્રોના ઘટાડા બાદ, રોકાણકારોએ નીચા ભાવે ઉપલબ્ધ શેરોની ખરીદી કરી હતી. પશ્ચિમ એશિયામાં તણાવને કારણે કાચા તેલના ભાવમાં થયેલો વધારો ફુગાવા અને કોર્પોરેટ કમાણી અંગે ચિંતાઓ વધારી રહ્યો છે, જેના પરિણામે ગયા અઠવાડિયે સ્થાનિક બજારો ઘટાડા સાથે બંધ થયા હતા. આ સપ્તાહ દરમિયાન નિફ્ટીમાં 2.4 ટકા અને સેન્સેક્સમાં 2.2 ટકાનો ઘટાડો નોંધાયો હતો.

ક્રૂડ ઓઇલના ભાવમાં નરમાઈ

શુક્રવારે ભારતીય બજાર બંધ થયા બાદ, બ્રેન્ટ ક્રૂડ ફ્યુચર્સ લગભગ છ મહિનાની ઊંચી સપાટી (117 ડોલર પ્રતિ બેરલ) પરથી ઘટીને 114.5 ડોલર પ્રતિ બેરલની આસપાસ ટ્રેડ થઈ રહ્યા હતા. જોકે, યમનના હુથી વિદ્રોહીઓ દ્વારા સાઉદી અરેબિયા પરના સતત હુમલાઓને કારણે તેલ પુરવઠા અંગેની ચિંતાઓ યથાવત રહી હતી.

FII દ્વારા ખરીદી

વિદેશી સંસ્થાકીય રોકાણકારોએ (FIIs) શુક્રવારે 887.65 કરોડ રૂપિયાના શેર ખરીદ્યા હતા. ઓક્ટોબર મહિનામાં અત્યાર સુધીમાં વિદેશી રોકાણકારોએ ભારતીય શેરબજારમાંથી 48,056 કરોડ રૂપિયા પાછા ખેંચી લીધા છે. જોકે, ગયા અઠવાડિયે વિદેશી પોર્ટફોલિયો રોકાણકારો (FPIs) દ્વારા કરવામાં આવતી વેચવાલીમાં નોંધપાત્ર ઘટાડો જોવા મળ્યો હતો અને બે ટ્રેડિંગ દિવસોમાં તેઓ ચોખ્ખા ખરીદદાર (નેટ બાયર) બન્યા હતા. એશિયન બજારો સકારાત્મક વલણ સાથે ટ્રેડ થઈ રહ્યા હતા, જેમાં હોંગકોંગનો હેંગ સેંગ સૂચકાંક પણ તેજીમાં હતો. યુએસ સ્ટોક ફ્યુચર્સ પણ ઊંચા સ્તરે ટ્રેડ થઈ રહ્યા હતા, જે વોલ સ્ટ્રીટ પર મજબૂત શરૂઆતના સંકેત આપે છે.

આ પણ જુઓઃ

Watch onYouTube