અમદાવાદની Hoccoને ₹4,000 કરોડનું વેલ્યુએશન મળશે?

આઈસ્ક્રીમ ખાવાના શોખીનોમાં લોકપ્રિય બની રહેલી અમદાવાદની બ્રાન્ડ Hocco હવે બિઝનેસને વધુ મોટો બનાવવા માટે તૈયાર છે. કંપની નવી ફંડિંગ રાઉન્ડથી મૂડી એકત્ર કરવાની તૈયારી કરી રહી છે. આ ફંડિંગ રાઉન્ડમાં કંપનીનું વેલ્યુએશન ₹4,000 કરોડ સુધી પહોંચાડવાનો પ્રયાસ કરવામાં આવી રહ્યો છે. Hocco નવા રોકાણકારોને કંપનીમાં માઈનોરિટી હિસ્સો આપીને ફંડ એકત્ર કરવાની યોજના બનાવી રહી છે. આ પ્રક્રિયા માટે KPMG સલાહકાર તરીકે જોડાયેલી છે.

Havmor બાદ Chona પરિવારની નવી આઈસ્ક્રીમ સફર

Hoccoની કહાની ગુજરાતની જાણીતી આઈસ્ક્રીમ બ્રાન્ડ Havmor સાથે જોડાયેલી છે. Havmorના માલિક Chona પરિવારે નવેમ્બર 2017માં Havmorનો બિઝનેસ દક્ષિણ કોરિયાની કંપની Lotte Confectioneryને ₹1,020 કરોડમાં વેચ્યો હતો. ત્યારબાદ નોન-કમ્પીટ સમયગાળો પૂર્ણ થયા પછી Chona પરિવારે 2019માં Hocco બ્રાન્ડ શરૂ કરી હતી. જોકે, કંપનીએ 2023થી આઈસ્ક્રીમનું કોમર્શિયલ ઉત્પાદન શરૂ કર્યું હતું.

ફંડનો ઉપયોગ ક્યાં કરશે Hocco?

કંપની અગાઉ પણ રોકાણ મેળવી ચૂકી છે. એપ્રિલ 2026માં Hoccoએ Sauce VCના નેતૃત્વમાં ₹100 કરોડનું ફંડિંગ મેળવ્યું હતું. આ ફંડનો ઉપયોગ કંપનીએ ઉત્પાદન ક્ષમતા વધારવા, ડિસ્ટ્રિબ્યુશન નેટવર્ક મજબૂત કરવા અને બ્રાન્ડની માર્કેટિંગ પ્રવૃત્તિઓ વધારવા માટે કરવાની યોજના બનાવી હતી. હવે નવી ફંડિંગ દ્વારા કંપની પોતાના બિઝનેસને વધુ વિસ્તૃત કરવા માંગે છે.

આ પણ વાંચો: બજારમાં નરમાઈ છતાં કોપરમાં તેજી કેમ?

આઈસ્ક્રીમ માર્કેટમાં Hoccoની વધતી હાજરી

Hoccoએ ટૂંકા જ સમયગાળામાં પોતાનું માર્કેટ નેટવર્ક ઉભું કર્યું છે. કંપનીનું ધ્યાન ખાસ કરીને ડિસ્ટ્રિબ્યુશન અને ગ્રાહકો સાથે સીધા જોડાણ વધારવા પર છે. કંપનીના પોર્ટફોલિયોમાં Hocco Creamery, Hocco Eatery, Hocco Foods, Huber & Holly, Hocco Kitchen અને Phab જેવી બ્રાન્ડ્સ સામેલ છે. Hoccoએ નાણાકીય વર્ષ 2026માં ₹532 કરોડની નેટ આવક નોંધાવી હતી. કંપનીનું લક્ષ્ય નાણાકીય વર્ષ 2027ના અંત સુધીમાં આવકને વધુ વધારવાનું છે.

આઈસ્ક્રીમ સેક્ટરમાં વધ્યો રોકાણકારોનો રસ

ભારતમાં આઈસ્ક્રીમ અને ડેઝર્ટ માર્કેટમાં છેલ્લા કેટલાક વર્ષોમાં રોકાણકારોની રસ વધ્યો છે. Hocco ઉપરાંત Amul, Vadilal, Mother Dairy, Naturals, NIC, Dairy Day, NOTO અને Go Zero જેવી બ્રાન્ડ્સ પણ આ ક્ષેત્રમાં સક્રિય છે. Hocco માટે આ નવી ફંડિંગ કંપનીના આગામી વિસ્તરણ અને માર્કેટમાં વધુ મજબૂત હાજરી બનાવવાની દિશામાં મહત્વપૂર્ણ પગલું બની શકે છે.

આ પણ જુઓ

Watch onYouTube