વૈશ્વિક સ્તરે ઘટાડા છતાં ભારતીય બજારમાં સોનાના ભાવ 1.50 લાખ પર યથાવત

Gold Price:  આંતરરાષ્ટ્રીય કોમોડિટી માર્કેટમાં ચાલુ સપ્તાહે સોનાના ભાવમાં આશરે 3.4 ટકાનો તીવ્ર ઘટાડો નોંધાયો હોવા છતાં, ભારતીય બજારોમાં કિંમતો હજુ પણ ઊંચી સપાટીએ જળવાઈ રહી છે. વૈશ્વિક બજારમાં સ્પોટ ગોલ્ડ ઘટીને 4,140.6 ડૉલર પ્રતિ ઔંસ પર આવી ગયું છે, પરંતુ સ્થાનિક સ્તરે તેની ખાસ નરમાઈ જોવા મળી નથી.

બજારના વિશ્લેષકોના જણાવ્યા અનુસાર, સ્થાનિક બજારના ભાવ માત્ર આંતરરાષ્ટ્રીય વધઘટ પર નિર્ભર નથી હોતા. યુએસ ડૉલર સામે રૂપિયાની નબળાઈ, આયાત જકાત, સ્થાનિક કરવેરા અને આગામી તહેવારોને કારણે વધી રહેલી ઉપાડ જેવા પરિબળોને લીધે ઘરેલું સ્તરે કિંમતો ઊંચી રહી છે.

શહેરો પ્રમાણે 24 અને 22 કેરેટના ભાવ

દેશના વિવિધ શહેરોમાં સોનાના દરોમાં નજીવો તફાવત જોવા મળ્યો છે, જેમાં ઉત્તર ભારતમાં ભાવ સહેજ વધુ રહ્યા છે: દિલ્હી, જયપુર, લખનૌ, ચંદીગઢમાં 24 કેરેટ સોનું પ્રતિ 10 ગ્રામ રૂ. 1,50,460 અને 22 કેરેટ રૂ. 1,37,900 પર બોલાયું હતું. મુંબઈ, પુણે, કોલકાતા, ચેન્નાઈ, બેંગલુરુ, હૈદરાબાદમાં 24 કેરેટ રૂ. 1,50,290 અને 22 કેરેટ રૂ. 1,37,760 પર સ્થિર રહ્યા હતા. અમદાવાદ અને ભોપાલમાં 24 કેરેટનો ભાવ પ્રતિ 10 ગ્રામ રૂ. 1,50,360 તથા 22 કેરેટનો ભાવ રૂ. 1,37,810 રહ્યો હતો.

ચાંદીમાં મોટો ઘટાડો

બીજી તરફ, ચાંદીના બજારમાં પણ મોટી વધઘટ નોંધાઈ છે. સ્થાનિક બજારમાં ચાંદીનો ભાવ રૂ. 2,34,900 પ્રતિ કિલોગ્રામ નોંધાયો હતો, જ્યારે આંતરરાષ્ટ્રીય સ્તરે હાજર ચાંદી 60.36 ડૉલર પ્રતિ ઔંસ રહી હતી. નોંધનીય છે કે ચાલુ વર્ષે જાન્યુઆરીમાં ચાંદી રૂ. 4 લાખ પ્રતિ કિલોગ્રામની સર્વોચ્ચ સપાટીએ પહોંચી ગઈ હતી, જેની સરખામણીએ હાલના ભાવ તે રેકોર્ડ સપાટી કરતાં ઘણા નીચા સ્તરે આવી ગયા છે.

આ પણ જુઓઃ

Watch onYouTube