જુવારના ભાવ ભડકે બળ્યા! પાક માત્ર 25% રહેતા ભાવ 20% વધ્યા
દેશમાં ખરિફ જુવારના ઉત્પાદનમાં ભારે ઘટાડાને કારણે બજારમાં ભાવ 15થી 20% સુધી વધ્યા છે. મહારાષ્ટ્ર, કર્ણાટક અને ગુજરાત સહિતનાં ઉત્પાદક રાજ્યોમાં ઓછા વાવેતર અને વરસાદની અસર જોવા મળી છે. કર્ણાટકમાં સરકારી ખરીદીથી બજારમાં પુરવઠો ઘટ્યો છે, જ્યારે ઊંચા ભાવને કારણે ભારતીય જુવારની નિકાસને પણ અસર પહોંચી છે.

Jowar Prices Rise : દેશમાં જુવારના ઉત્પાદનમાં મોટો ઘટાડો થતાં અનાજ બજારમાં ભાવ ઝડપથી વધી રહ્યા છે. ભારતના કુલ જુવાર ઉત્પાદનમાં લગભગ 70% હિસ્સો ધરાવતા ખરિફ પાકને અલ નીનો અને પ્રતિકૂળ હવામાનની અસર પહોંચી છે. પરિણામે આ સિઝનમાં ખરિફ જુવારનો પાક સામાન્ય ઉત્પાદનના માંડ 25થી 30% જેટલો રહેવાનો અંદાજ છે. ઓછા ઉત્પાદન અને બજારમાં પુરવઠાની ખેંચને કારણે નવરાત્રીથી અત્યાર સુધીમાં જુવારના ભાવમાં સરેરાશ 15થી 20%નો વધારો નોંધાયો છે. બીજી તરફ રવિ સિઝનના પાક અંગે પણ હજુ અનિશ્ચિતતા જોવા મળી રહી છે.
મહારાષ્ટ્રથી ગુજરાત સુધી જુવારના પાકને મોટો ફટકો
વાશી APMC બજારના હોલસેલ વેપારી અને ગ્રોમાના કારોબારી સભ્ય અરવિંદ લોડાયાના જણાવ્યા પ્રમાણે, દેશમાં સૌથી વધુ જુવારનું ઉત્પાદન કરતા મહારાષ્ટ્રમાં ગત ચોમાસા દરમિયાન વાવેતર માંડ 10% જેટલું રહ્યું હતું. બીજા ક્રમના ઉત્પાદક રાજ્ય કર્ણાટકમાં લગભગ 20%, આંધ્રપ્રદેશમાં 5%, રાજસ્થાન અને ઉત્તરપ્રદેશમાં 15થી 25% તથા ગુજરાતમાં 10%થી પણ ઓછું વાવેતર નોંધાયું હતું.ઓછા વાવેતરને કારણે જુવારનું ઉત્પાદન ઘટ્યું છે. આ ઉપરાંત ઉત્તરપ્રદેશમાં ઊભા પાક પર વરસાદ પડતાં પાકને ભારે નુકસાન થયું હતું. અરવિંદ લોડાયાના જણાવ્યા અનુસાર, નવરાત્રી દરમિયાન ખરિફ જુવારની નવી આવકો શરૂ થઈ ત્યારથી અત્યાર સુધીમાં બજારભાવમાં 20% સુધીનો વધારો થયો છે.
જુવારના ભાવમાં મોટો ઉછાળો, સોલાપુરની જુવાર ₹9,000 સુધી પહોંચી
વાશી APMC બજારના હોલસેલ વેપારી કેવલ પાસડેના જણાવ્યા મુજબ, જુવારની વિવિધ જાતોના ભાવમાં મોટો તફાવત જોવા મળી રહ્યો છે. હાલમાં વાશી બજારમાં મધ્યમ ગુણવત્તાની CH-5 અને CH-9 જુવારની સાથે આંધ્રપ્રદેશ અને કર્ણાટકની જુવારના ભાવ પણ ઊંચા સ્તરે ચાલી રહ્યા છે. સોલાપુર ગુણવત્તાની નવી જુવારની આવકો સામાન્ય રીતે ફેબ્રુઆરીમાં શરૂ થાય છે. ગત સિઝનમાં સોલાપુર જુવારની આવકો શરૂ થઈ ત્યારે ભાવ ₹4,000થી ₹4,500 પ્રતિ ક્વિન્ટલ હતા, જે હાલમાં વધીને ₹7,000થી ₹9,000 સુધી પહોંચી ગયા છે.

ગુજરાત અને રાજસ્થાનમાં જુવારની માંગ વધી
વાશી APMC બજારના અનાજના દલાલ અને એનાલિસ્ટ દેવેન્દ્ર વોરાના જણાવ્યા પ્રમાણે, વડાપ્રધાનના મિલેટ પ્રમોશન અભિયાનથી લોકોમાં જુવાર સહિતનાં બરછટ ધાન્યો અંગે જાગૃતિ વધી છે. આ જાગૃતિની અસર ગુજરાત અને રાજસ્થાનના બજારોમાં પણ જોવા મળી રહી છે. બંને રાજ્યોમાં જુવારની માંગમાં વધારો નોંધાયો છે. દેવેન્દ્ર વોરાના જણાવ્યા મુજબ, ગુજરાત અને રાજસ્થાનના કેટલાક વિસ્તારોમાં જુવારનો પાક બજારમાં આવ્યાના એક મહિનામાં જ વેચાઈ ગયો હતો. ઓછા ઉત્પાદન વચ્ચે વધતી માંગને કારણે જુવારના ભાવને વધુ ટેકો મળ્યો છે.
કર્ણાટકમાં સરકારે ટેકાના ભાવે જુવાર ખરીદી
જુવારના બજારમાં પુરવઠાની ખેંચ ઊભી થવા પાછળ કર્ણાટકમાં સરકાર દ્વારા કરવામાં આવેલી ખરીદી પણ મહત્વનું પરિબળ છે. દેવેન્દ્ર વોરાના જણાવ્યા પ્રમાણે, કર્ણાટકમાં સરકારે પ્રતિ ક્વિન્ટલ ₹3,750ના લઘુત્તમ ટેકાના ભાવ (MSP) પર જુવારની ખરીદી કરી છે. સરકારી ખરીદીને કારણે ખુલ્લા બજારમાં ઉપલબ્ધ જુવારનો જથ્થો ઘટ્યો છે. તેની અસર બજારના પુરવઠા પર પડી છે અને ભાવમાં તેજી જોવા મળી રહી છે.
ભારતની જગ્યાએ યુગાન્ડાની જુવારની નિકાસ
ભારતમાં જુવારના ઊંચા ભાવની અસર આંતરરાષ્ટ્રીય બજારમાં પણ જોવા મળી રહી છે. વૈશ્વિક બજારમાં ભારતીય જુવાર મોંઘી પડતાં તેની નિકાસને અસર થઈ છે. ખાસ કરીને અખાતી દેશો અને આફ્રિકાના બજારોમાં ભારતીય જુવારના સ્થાને યુગાન્ડાની જુવારનું વેચાણ થયું હોવાનું વેપારીઓ જણાવી રહ્યા છે. આ સ્થિતિમાં ભારતીય નિકાસકારો સામે આંતરરાષ્ટ્રીય બજારમાં ભાવની સ્પર્ધાનો પડકાર ઊભો થયો છે.
વાર્ષિક 50 લાખ ટન ઉત્પાદન સામે આ વર્ષે માત્ર 25% પાકનો અંદાજ
ભારતમાં જુવારનું સરેરાશ વાર્ષિક ઉત્પાદન લગભગ 50 લાખ ટન રહે છે. જોકે, આ વર્ષે ઉત્પાદન સામાન્ય સ્તરના માત્ર 25% જેટલું રહેવાની ધારણા વ્યક્ત કરવામાં આવી છે. દેશમાં જુવારની કુલ 137 જાતો ઉપલબ્ધ હોવાનું અહેવાલમાં જણાવાયું છે. તેમાં સોલાપુર, સાડુ, માલદાંડી, જ્યુટ, દૂધમોગરો અને પંઢરપુરી જેવી જાતો ઉચ્ચ ગુણવત્તાની ગણાય છે. આ જાતોની ગુણવત્તા અને બજારભાવ લગભગ સમાન સ્તરે રહેતા હોવાનું વેપારીઓનું કહેવું છે.
આગામી દિવસોમાં જુવારના ભાવ કેવા રહેશે?
જુવારના બજારમાં હાલમાં ઓછું ઉત્પાદન, ઘટતો પુરવઠો અને વધતી માંગ જેવા પરિબળો અસર કરી રહ્યા છે. કર્ણાટકની સરકારી ખરીદીએ પણ બજારમાં ઉપલબ્ધ જથ્થા પર અસર કરી છે. બીજી તરફ રવિ સિઝનના પાક અંગે હજુ સ્પષ્ટ ચિત્ર સામે આવ્યું નથી. સોલાપુરની નવી જુવારની આવકો ફેબ્રુઆરીમાં શરૂ થવાની છે. આથી આગામી સમયમાં જુવારના ભાવ માટે રવિ પાકનું ઉત્પાદન, નવી આવકો અને બજારમાં ઉપલબ્ધ પુરવઠો મહત્વના પરિબળો રહેશે.
આ પણ વાંચો: ગુજરાતીઓએ દિવાળીમાં કરી વાહનોની ધૂમ ખરીદી, 15 દિવસમાં 1.26 લાખ રજિસ્ટ્રેશન
આ પણ જુઓ:
Also Read

શિયાળુ વાવેતર કરતા ખેડૂતો માટે અગત્યની ગાઈડલાઈન: બિયારણ-ખાતર ખરીદતા પહેલા આ નિયમો જાણો

Crude Prices : ક્રૂડ ઓઈલમાં મોટો કડાકો! બ્રેન્ટ $92ની નીચે, સપ્લાય વધવાની સંભાવના

Gold-Silver Price Today: સોનામાં ફરી તેજી, જાણો તમારા શહેરમાં શું છે ભાવ?

Expert Speaks : ચાંદીમાં 60%નો કડાકો! હવે વધુ તૂટશે કે આવશે રિકવરી?

Expert Speaks : સોનું 31 ટકા તૂટ્યું : હવે ખરીદીની તક કે વધુ ઘટાડાની રાહ જોવી?

Expert Speaks : સોનાની ચમક ફીકી, ફોર્સ્ડ સેલિંગ, મોંઘવારી અને ફેડના સંકેતોથી ભાવમાં તીવ્ર ઘટાડો

Crude Oil Price: સપ્લાય વધવાની આશા, બ્રેન્ટ $95.53 અને WTI $88.52




