Bullet Train Project: અમદાવાદમાં બુલેટ ટ્રેન નીચેથી પસાર થશે રેલવેની ટ્રેનો

Bullet Train Project: પશ્ચિમ રેલવેનો અમદાવાદ મંડળ રેલવે માળખાકીય સુવિધાઓના આધુનિકીકરણ, પરિચાલન ક્ષમતાના વિસ્તરણ તથા મુસાફરોને વધુ સારી રેલવે સુવિધાઓ ઉપલબ્ધ કરાવવાની દિશામાં સતત મહત્ત્વપૂર્ણ પગલાં લઈ રહ્યો છે. આ જ ક્રમમાં અમદાવાદ રેલવે સ્ટેશનના વ્યાપક પુનર્વિકાસ અને યાર્ડ રિમોડેલિંગનાં કામો અંતર્ગત એક મહત્ત્વપૂર્ણ સિદ્ધિ હાંસલ કરવામાં આવી છે. સ્ટેશન પર નવનિર્મિત બ્રોડગેજ લાઇન નંબર 16, 17 અને 18, જે પ્લેટફોર્મ નંબર 10, 11 અને 12 સાથે સંબંધિત છે, તેનું રેલવે સંરક્ષા કમિશનર (CRS), પશ્ચિમ સર્કલ, મુંબઈ દ્વારા સુરક્ષા નિરીક્ષણ કરવામાં આવ્યું હતું.

આ મહત્ત્વપૂર્ણ નિરીક્ષણની સાથે જ અસારવા રેલવે સ્ટેશન અને સાબરમતી ‘એ’ કેબિન વચ્ચે નવનિર્મિત બ્રોડગેજ બાયપાસ લાઇન (Y-કનેક્ટિવિટી)નું પણ રેલવે સંરક્ષા કમિશનર દ્વારા નિરીક્ષણ કરવામાં આવ્યું હતું. આ પરિયોજનાઓથી અમદાવાદ વિસ્તારની રેલ પરિચાલન વ્યવસ્થા વધુ મજબૂત બનશે તથા ભવિષ્યમાં ટ્રેનોના સુચારુ સંચાલનની ક્ષમતામાં વધારો થશે.

આ ઉપરાંત અમદાવાદ રેલવે સ્ટેશન અને કાંકરિયા ડેપો વચ્ચે પાંચમી રેલવે લાઇનનો વિકાસ પણ વિસ્તારની રેલ પરિચાલન ક્ષમતા વધારવાની દિશામાં એક મહત્ત્વપૂર્ણ પહેલ છે. તેનાથી રેલવે ટ્રાફિકના વધુ સારા વ્યવસ્થાપન, ટ્રેનોની સુચારુ અવરજવર તથા ઉપલબ્ધ રેલવે માળખાકીય સુવિધાઓના વધુ અસરકારક ઉપયોગમાં મદદ મળશે.

નિરીક્ષણ દરમિયાન રેલવે સંરક્ષા કમિશનર, પશ્ચિમ સર્કલ, મુંબઈના ઈ. શ્રીનિવાસ, અમદાવાદ મંડળના મંડળ રેલવે પ્રબંધક વેદ પ્રકાશ, મુખ્ય વહીવટી અધિકારી (નિર્માણ) પ્રદીપ ગુપ્તા સહિત રેલવેના નિર્માણ અને ઓપન લાઇન વિભાગોના વરિષ્ઠ અધિકારીઓ ઉપસ્થિત રહ્યા હતા. આ ઐતિહાસિક સિદ્ધિ અંગે અમદાવાદ મંડળના મંડળ રેલવે પ્રબંધક વેદ પ્રકાશે જણાવ્યું હતું કે, “અમદાવાદ રેલવે સ્ટેશન પર બુલેટ ટ્રેન સ્ટેશનની નીચેથી ભારતીય રેલવેની ટ્રેનોના પરિચાલન માટે નવાં પ્લેટફોર્મ અને બ્રોડગેજ રેલવે લાઇનોનું બાંધકામ પૂર્ણ થવું એ ભારતીય રેલવેના આધુનિકીકરણની દિશામાં એક ઐતિહાસિક સિદ્ધિ છે.

દેશમાં પ્રથમ વખત મુંબઈ–અમદાવાદ હાઈસ્પીડ રેલ પરિયોજના અંતર્ગત વિકસાવવામાં આવેલા અમદાવાદ બુલેટ ટ્રેન સ્ટેશનની નીચે ભારતીય રેલવેની પરંપરાગત ટ્રેનોના પરિચાલન માટે પ્લેટફોર્મ નંબર 10, 11 અને 12 તથા સંબંધિત રેલવે માળખાકીય સુવિધાઓ વિકસાવવામાં આવી છે. આ આધુનિક રેલવે એન્જિનિયરિંગ અને વિવિધ રેલવે પ્રણાલીઓ વચ્ચેના તકનીકી સમન્વયનું એક અનોખું ઉદાહરણ છે. આવનારા સમયમાં આ પ્લેટફોર્મ પરથી એક્સપ્રેસ ટ્રેનો, વંદે ભારત એક્સપ્રેસ તથા લોકલ પેસેન્જર ટ્રેનોનું પરિચાલન કરી શકાશે. તેનાથી અમદાવાદ રેલવે સ્ટેશનની પરિચાલન ક્ષમતામાં નોંધપાત્ર વધારો થશે તથા મુસાફરોને વધુ સુવિધાજનક અને સરળ રેલવે સેવાઓ ઉપલબ્ધ કરાવવામાં મદદ મળશે.

અમદાવાદ રેલવે સ્ટેશન પર બુલેટ ટ્રેન સ્ટેશનની નીચેથી ભારતીય રેલવેની ટ્રેનોના પરિચાલનની આ વ્યવસ્થા માત્ર એક તકનીકી સિદ્ધિ નથી, પરંતુ ભારતીય રેલવેની ભવિષ્યની આધુનિક, સુરક્ષિત અને સંકલિત રેલ પરિવહન વ્યવસ્થા તરફનું એક મહત્ત્વપૂર્ણ પગલું છે. આ પરિયોજના આધુનિક ભારતના બદલાતા રેલવે માળખાકીય વિકાસ અને ભવિષ્યની પરિવહન જરૂરિયાતોને અનુરૂપ રેલવેની વિકાસયાત્રા દર્શાવે છે.”

બુલેટ ટ્રેનની નીચેથી રેલ પરિચાલનની ઐતિહાસિક પહેલ

અમદાવાદ રેલવે સ્ટેશન પર ચાલી રહેલા પુનર્વિકાસનાં કામો અંતર્ગત આધુનિક અને અત્યાધુનિક રેલવે માળખાકીય સુવિધાઓ વિકસાવવામાં આવી રહી છે. આ પરિયોજનાની મુખ્ય વિશેષતા એ છે કે ભારતીય રેલવેમાં પ્રથમ વખત બુલેટ ટ્રેન સ્ટેશનની નીચેથી પરંપરાગત ટ્રેનોના પરિચાલનની વ્યવસ્થા વિકસાવવામાં આવી રહી છે.

અમદાવાદ રેલવે સ્ટેશન પર પ્લેટફોર્મ નંબર 10 ને હાઈસ્પીડ રેલ પરિયોજનાનાં નિર્માણનાં કામોને કારણે જુલાઈ 2022થી બંધ કરવામાં આવ્યું હતું. હવે નવી બ્રોડગેજ લાઇનો અને સંબંધિત પ્લેટફોર્મની માળખાકીય સુવિધાઓનું નિર્માણ પૂર્ણ થવાથી પ્લેટફોર્મ નંબર 10, 11 અને 12 પર ફરીથી રેલ પરિચાલન શરૂ કરવાની દિશામાં મહત્ત્વપૂર્ણ પ્રગતિ થઈ છે. રેલવે સંરક્ષા કમિશનર પાસેથી જરૂરી સુરક્ષા મંજૂરી મળ્યા બાદ તથા નિર્ધારિત તકનીકી અને પરિચાલન સંબંધિત ઔપચારિકતાઓ પૂર્ણ થયા પછી આ પ્લેટફોર્મ પરથી પેસેન્જર ટ્રેનોનું પરિચાલન શરૂ કરી શકાશે. તેનાથી અમદાવાદ રેલવે સ્ટેશનની પરિચાલન ક્ષમતામાં વધારો થશે અને મુસાફરોને વધુ સારી રેલવે સુવિધાઓ ઉપલબ્ધ કરાવવામાં મદદ મળશે.

અમદાવાદ–કાંકરિયા ડેપો વચ્ચે પાંચમી રેલવે લાઇનથી વધશે પરિચાલન ક્ષમતા

અમદાવાદ રેલવે સ્ટેશન અને કાંકરિયા ડેપો વચ્ચે પાંચમી રેલવે લાઇનનો વિકાસ અમદાવાદ વિસ્તારના રેલવે નેટવર્કને વધુ મજબૂત બનાવવાની દિશામાં એક મહત્ત્વપૂર્ણ પગલું છે. આ વધારાની રેલવે લાઇનથી રેલ પરિચાલન માટે ઉપલબ્ધ માળખાકીય સુવિધાઓનો વિસ્તાર થશે. સાથે જ ટ્રેનોની અવરજવરનું વધુ સારું વ્યવસ્થાપન, પરિચાલન સંબંધિત અવરોધો ઘટાડવા તથા રેલવે ટ્રાફિકને વધુ વ્યવસ્થિત બનાવવામાં મદદ મળવાની અપેક્ષા છે. અમદાવાદ રેલવે સ્ટેશન પર યાર્ડ રિમોડેલિંગ અને વધારાની રેલવે લાઇનોનો વિકાસ ભવિષ્યમાં વધતી રેલવે ટ્રાફિકની જરૂરિયાતોને ધ્યાનમાં રાખીને કરવામાં આવી રહ્યો છે.

અસારવા–સાબરમતી બાયપાસ લાઇનથી મજબૂત બનશે રેલવે નેટવર્ક

અમદાવાદ વિસ્તારમાં રેલવે કનેક્ટિવિટીને વધુ મજબૂત બનાવવાના હેતુથી અસારવા રેલવે સ્ટેશન અને સાબરમતી ‘એ’ કેબિન વચ્ચે નવી બ્રોડગેજ બાયપાસ (Y-કનેક્ટિવિટી) લાઇનનું બાંધકામ કરવામાં આવ્યું છે. આ નવી લાઇન દ્વારા રેલવે નેટવર્કમાં વધારાની કનેક્ટિવિટી ઉપલબ્ધ થશે, જેનાથી વિવિધ રેલવે માર્ગો વચ્ચે ટ્રેનોના સંચાલનનું આયોજન કરવા તથા રેલવે ટ્રાફિકના વધુ સારા વ્યવસ્થાપનમાં મદદ મળશે. આ પરિયોજના અમદાવાદ વિસ્તારમાં ઉપલબ્ધ રેલવે માળખાકીય સુવિધાઓનો મહત્તમ અને અસરકારક ઉપયોગ સુનિશ્ચિત કરવાની દિશામાં મહત્ત્વપૂર્ણ ભૂમિકા ભજવશે.

મીટરગેજથી આધુનિક બ્રોડગેજ નેટવર્ક સુધી

અમદાવાદ રેલવે સ્ટેશનનો રેલવે ઇતિહાસ અત્યંત સમૃદ્ધ રહ્યો છે. વર્ષ 2017 પહેલાં સ્ટેશનના પ્લેટફોર્મ નંબર 11 અને 12 પરથી મીટરગેજ ટ્રેનોનું પરિચાલન કરવામાં આવતું હતું. તે સમયે અમદાવાદ–હિંમતનગર મીટરગેજ રેલખંડ પર અમદાવાદ–ઉદયપુર ફાસ્ટ પેસેન્જર, અમદાવાદ–ખેડબ્રહ્મા પેસેન્જર, અમદાવાદ–હિંમતનગર પેસેન્જર, અમદાવાદ–નાંદોલ–દહેગામ પેસેન્જર તથા અમદાવાદ–ઉદયપુર એક્સપ્રેસ સહિત કુલ 8 જોડી પેસેન્જર સેવાઓનું સંચાલન થતું હતું. આ ઉપરાંત અમદાવાદ–મહેસાણા પેસેન્જર, અમદાવાદ–બોટાદ પેસેન્જર, અમદાવાદ–રાણુજ પેસેન્જર તથા અમદાવાદ–મહેસાણા એક્સપ્રેસ સહિત અન્ય 5 જોડી પેસેન્જર રેલવે સેવાઓ પણ સંચાલિત થતી હતી. આ રેલવે સેવાઓએ અમદાવાદને આસપાસનાં શહેરો, નગરો અને ગ્રામીણ વિસ્તારો સાથે જોડવામાં મહત્ત્વપૂર્ણ ભૂમિકા ભજવી હતી. સમય જતાં ગેજ પરિવર્તન, રેલવે નેટવર્કના વિસ્તરણ અને આધુનિક રેલવે માળખાકીય સુવિધાઓના વિકાસથી અમદાવાદ સ્ટેશનની પરિચાલન વ્યવસ્થામાં વ્યાપક પરિવર્તન આવ્યું છે. હવે નવનિર્મિત બ્રોડગેજ લાઇનો, આધુનિક પ્લેટફોર્મની માળખાકીય સુવિધાઓ તથા બુલેટ ટ્રેન પરિયોજના સાથે વિકસાવવામાં આવી રહેલી રેલવે સુવિધાઓ અમદાવાદ રેલવે સ્ટેશનની વિકાસયાત્રામાં એક નવો અધ્યાય ઉમેરશે.

સંરક્ષા મંજૂરી બાદ શરૂ થશે પેસેન્જર ટ્રેનોનું પરિચાલન

નવી રેલવે લાઇનોને પેસેન્જર પરિચાલન માટે તૈયાર કરવાની પ્રક્રિયામાં રેલવે સંરક્ષા કમિશનર દ્વારા કરવામાં આવેલું નિરીક્ષણ એક મહત્ત્વપૂર્ણ તબક્કો છે. પશ્ચિમ રેલવે દ્વારા રેલવે સંરક્ષા સંબંધિત તમામ નિર્ધારિત ધોરણો, તકનીકી આવશ્યકતાઓ અને પ્રક્રિયાઓનું પાલન કરવાની બાબતને સર્વોચ્ચ પ્રાથમિકતા આપવામાં આવી રહી છે. રેલવે સંરક્ષા કમિશનર પાસેથી જરૂરી મંજૂરી મેળવ્યા બાદ અને નિર્ધારિત ઔપચારિકતાઓ પૂર્ણ થયા પછી આ નવી રેલવે લાઇનો તથા સંબંધિત પ્લેટફોર્મ પરથી પેસેન્જર ટ્રેનોનું પરિચાલન શરૂ કરી શકાશે.

અમદાવાદ રેલવે સ્ટેશન પર નવી બ્રોડગેજ લાઇનો, અસારવા–સાબરમતી Y-કનેક્ટિવિટી તથા અમદાવાદ–કાંકરિયા ડેપો વચ્ચે વધારાની રેલવે લાઇનનો વિકાસ વિસ્તારની રેલ પરિચાલન ક્ષમતાને મજબૂત બનાવવાની દિશામાં મહત્ત્વપૂર્ણ પગલું છે. મીટરગેજના ઐતિહાસિક વારસાથી આધુનિક બ્રોડગેજ નેટવર્ક અને બુલેટ ટ્રેન જેવી અત્યાધુનિક પરિયોજનાઓ સુધી અમદાવાદ રેલવે સ્ટેશનની વિકાસયાત્રા ભારતીય રેલવેના આધુનિકીકરણ અને બદલાતા સ્વરૂપને દર્શાવે છે.

આ પણ વાંચો: ભારતમાં 89% રેલવે ટિકિટો ઓનલાઈન બુક, થર્ડ-પાર્ટી પ્લેટફોર્મનો હિસ્સો 28%

આ પણ જુઓ:

Watch onYouTube