હાઈકોર્ટના ચુકાદા પર હવે વિલંબ નહીં: ગુજરાત સરકારે નક્કી કરી ટાઈમ-બાઉન્ડ SOP

ગુજરાત સરકારે હાઈકોર્ટના ચુકાદાઓના અમલમાં થતા વહીવટી વિલંબને ઘટાડવા માટે મહત્વનું પગલું લીધું છે. રાજ્યના તમામ વહીવટી વિભાગો માટે નવી Standard Operating Procedure (SOP) નક્કી કરવામાં આવી છે. હવે હાઈકોર્ટનો ચુકાદો મળ્યા બાદ તેને સ્વીકારવો, તેની સામે અપીલ કરવી અથવા જરૂરી હોય તો કોર્ટ પાસેથી સમયવધારો માંગવો. આ તમામ પ્રક્રિયા નિયત સમયમર્યાદામાં પૂર્ણ કરવાની રહેશે.

હાઈકોર્ટના ચુકાદા બાદ નિર્ણય લેવાની પ્રક્રિયા સ્પષ્ટ

નવી SOP મુજબ જો સંબંધિત વહીવટી વિભાગ હાઈકોર્ટના ચુકાદાને સ્વીકારે છે, તો નાણાં વિભાગ દ્વારા નક્કી કરાયેલી પ્રક્રિયા અનુસાર જરૂરી કાર્યવાહી કરવી પડશે. જો વિભાગને ચુકાદા સામે અપીલ કરવી યોગ્ય લાગે, તો વિભાગીય અભિપ્રાય સાથે કાયદા વિભાગની સલાહ લેવાની રહેશે અને નિયત સમયમર્યાદામાં લિટિગેશનની પ્રક્રિયા શરૂ કરવી પડશે. સાથે જ કાયદા વિભાગ દ્વારા 29 જૂન 2024ના રોજ જાહેર કરાયેલા નિર્દેશોનું પાલન કરવાની જવાબદારી પણ સંબંધિત વિભાગની રહેશે.

અપીલની દરખાસ્તમાં દસ્તાવેજો અપલોડ કરવા પડશે

અપીલ માટેની દરખાસ્ત તૈયાર કરતી વખતે ઈ-ફાઈલમાં નોંધાયેલી નોંધ સાથે સંબંધિત દસ્તાવેજોને ઈ-સરકાર પ્રણાલીમાં અપલોડ કરવા અનિવાર્ય બનાવવામાં આવ્યા છે. સંદર્ભિત દસ્તાવેજો અને માહિતીની સ્પષ્ટ હાઈપરલિંક આપવાની રહેશે. ઉપરાંત, સક્ષમ અધિકારીની સહીવાળી ચેકલિસ્ટમાં વિલંબના કારણો સહિત જરૂરી વિગતો નોંધવાની રહેશે. આ પ્રક્રિયાથી અપીલની દરખાસ્તમાં દસ્તાવેજોની સંપૂર્ણતા અને પ્રક્રિયાની સ્પષ્ટતા જાળવવાનો પ્રયાસ કરવામાં આવ્યો છે.

સમયમર્યાદા ચૂકી તો જવાબદારી નક્કી થશે

સરકારે સ્પષ્ટ કર્યું છે કે સમયમર્યાદાના અંતિમ તબક્કામાં કાયદા વિભાગ સમક્ષ દરખાસ્ત મોકલવાથી થતા બિનજરૂરી વિલંબને અટકાવવાની જવાબદારી સંબંધિત વિભાગની રહેશે. જો કોઈ કિસ્સામાં નિયત સમયમર્યાદાના ઉલ્લંઘન માટે કોઈ અધિકારી જવાબદાર જણાશે, તો લાગુ નિયમો અનુસાર જરૂરી કાર્યવાહી કરવાની જવાબદારી વિભાગના વડાની રહેશે.

સમયસર અમલ શક્ય ન હોય તો કોર્ટ પાસેથી સમયવધારો

કેટલાક કિસ્સાઓમાં વ્યવહારુ કારણોસર હાઈકોર્ટના આદેશનો નિર્ધારિત સમયગાળામાં અમલ કરવો શક્ય ન હોય શકે છે. રેકોર્ડ ઉપલબ્ધ ન હોવો, સેવા સંબંધિત જરૂરી માહિતીનો અભાવ અથવા ચુકાદા અનુસાર નિર્ણય લેવાની પ્રક્રિયા પડતર હોવા જેવી સ્થિતિમાં વિભાગ સમયવધારો માંગી શકે છે. આ માટે સંબંધિત વિભાગે હાઈકોર્ટમાં Miscellaneous Civil Application for Time Extension દાખલ કરવાની રહેશે. મહત્વનું એ છે કે આ અરજી મૂળ ચુકાદામાં હાઈકોર્ટ દ્વારા નિર્ધારિત સમયમર્યાદાની અંદર જ દાખલ કરવાની રહેશે.

ત્રણેય વિકલ્પો માટે ટાઇમ-બાઉન્ડ સિસ્ટમ

નવી SOP હેઠળ હાઈકોર્ટના ચુકાદા બાદ અમલ, અપીલ અથવા સમયવધારો ત્રણેય પરિસ્થિતિ માટે વહીવટી પ્રક્રિયા સ્પષ્ટ કરવામાં આવી છે. તેનો હેતુ ન્યાયિક આદેશોના અમલમાં બિનજરૂરી વિલંબ ઘટાડવાનો અને સમયમર્યાદા અંગે જવાબદારી વધુ સ્પષ્ટ કરવાનો છે.

આ પણ વાંચો : માત્ર રોકાણ નહીં, પરિવારની આર્થિક સુરક્ષા; પોલિસી લેતા પહેલાં આ બાબતો સમજો

આ પણ જુઓ :

Watch onYouTube