OTT પર દર્શકો કરોડોમાં, પણ કમાણીની કસોટી! નવા પ્લેટફોર્મ્સ પ્રાદેશિક અને વિશિષ્ટ કન્ટેન્ટના સહારે

OTT - Connected TV: મોબાઇલ હોય કે ઘરની મોટી ટીવી સ્ક્રીન—દર્શકો પાસે મનોરંજન માટે વિકલ્પોની અછત નથી. ફિલ્મો અને વેબસિરીઝથી લઈને ટૂંકાં વીડિયો તથા માઇક્રોડ્રામા સુધી અનેક પ્રકારનું કન્ટેન્ટ તેમની નજર અને સમય મેળવવા સ્પર્ધા કરે છે. આવી ભીડમાં નવું OTT પ્લેટફોર્મ શરૂ કરવું માત્ર સારી ફિલ્મો બતાવવાનો વ્યવસાય નથી; દર્શકને પોતાના પ્લેટફોર્મ પર લાવવો, રોકી રાખવો અને ચૂકવણી કરવા તૈયાર કરવો પણ એટલું જ મહત્વનું છે.

ભારતના OTT બજારમાં નવા પ્લેટફોર્મ્સની એન્ટ્રી ચાલુ છે. તેઓ કનેક્ટેડ ટીવી—CTVની વૃદ્ધિ અને બીજા કરતાં અલગ કન્ટેન્ટ પર દાવ લગાવી રહ્યા છે. જોકે, પ્રતિ યુઝર ઓછી સરેરાશ આવક અને તીવ્ર સ્પર્ધાને કારણે દર્શકોની સંખ્યાને કમાણીમાં ફેરવવી મોટો પડકાર છે.

પ્રાદેશિક પ્લેટફોર્મ્સ પણ વિશિષ્ટ દર્શકવર્ગ માટે જગ્યા બનાવી રહ્યા છે. અન્ય એક અહેવાલમાં સામે આવ્યું છે કે, AVR Cine-Max કન્નડ સિનેમા, જ્યારે Vihari OTT તેલુગુ ભાષામાં પ્રવાસ અને સાંસ્કૃતિક કન્ટેન્ટ પર ધ્યાન કેન્દ્રિત કરે છે. આ નવા પ્લેટફોર્મ્સ એવા સમયે લોન્ચ થઈ રહ્યા છે, જ્યારે બ્રોડકાસ્ટર્સ, સ્ટ્રીમિંગ પ્લેટફોર્મ્સ, સોશિયલ મીડિયા સેવાઓ અને માઇક્રોડ્રામા ઍપ્સ દર્શકોના સમય તથા ખર્ચ માટે એકબીજાની સામસામે ઊભા છે. સાથે કન્ટેન્ટનાં સ્વરૂપ અને તેના ડિસ્ટ્રિબ્યુશનનાં માધ્યમો પણ વધુ વિખરાઈ રહ્યાં છે.

66.5 કરોડ OTT દર્શકો, 20.7 કરોડનો CTV આધાર

Ormax Media અનુસાર, 2026માં ભારતમાં OTTના દર્શકોની સંખ્યા 665 મિલિયન એટલે કે 66.5 કરોડ હતી. કનેક્ટેડ ટીવીનો દર્શકવર્ગ 207 મિલિયન એટલે કે 20.7 કરોડ સુધી પહોંચ્યો હતો. FICCI-EYના અંદાજ મુજબ, 2025માં ભારતના OTT બજારે ₹27,000 કરોડથી વધુની આવક ઊભી કરી હતી. અલગ માપદંડ હેઠળ Media Partners Asiaએ 2025માં ભારતના ઑનલાઇન વીડિયો પરનો ખર્ચ $5 બિલિયન અંદાજ્યો હતો. કુલ કન્ટેન્ટ ખર્ચમાં ઑનલાઇન વીડિયોનો હિસ્સો 46% હતો, જ્યારે પરંપરાગત ટેલિવિઝનનો હિસ્સો 42% રહ્યો હતો. આમ, આ માપદંડમાં ઑનલાઇન વીડિયોએ પ્રથમ વખત પરંપરાગત ટેલિવિઝનને પાછળ છોડ્યું હતું.

ભારતમાં મોટી તક, પણ યુઝરદીઠ આવક ઓછી

એક ટ્રેડ એનાલિસ્ટે જણાવ્યું કે CTVની વૃદ્ધિ અને ચોક્કસ રસ ધરાવતા દર્શકો સુધી પહોંચવાની તક નવા પ્લેટફોર્મ્સને આકર્ષી રહી છે. વિશ્લેષકના મતે, આંતરરાષ્ટ્રીય બજારોમાં પણ અનેક વિશિષ્ટ OTT ઍપ્સ શરૂ થઈ રહી છે, પરંતુ ત્યાં ARPU—પ્રતિ યુઝર સરેરાશ આવક સારી છે. ભારતમાં બજારનું કદ મોટું હોવા છતાં ઓછી ARPU વ્યવસાય માટે મોટો પડકાર છે.

ભારતના OTT બજારમાં JioHotstar, Netflix અને Prime Video સહિત 50થી વધુ પ્લેટફોર્મ્સ કાર્યરત છે. નવા ખેલાડીઓ માટે પડકાર માત્ર દર્શકો મેળવવાનો નથી, પરંતુ તેમની પહોંચને નિયમિત આવકમાં ફેરવવાનો છે.

પ્રાદેશિક ભાષા કે વિશિષ્ટ કન્ટેન્ટ દર્શકોને આકર્ષવાનું કારણ બની શકે છે. પરંતુ સ્પર્ધાથી ભરેલા અને મર્યાદિત નફાના માર્જિનવાળા બજારમાં અલગ કન્ટેન્ટ અને સંભવિત મોટો દર્શકવર્ગ, માત્ર આ બે બાબતો નફાકારકતાની ખાતરી આપતી નથી.

આ પણ વાંચો: JioHotstar, Netflix અને Prime Video: જાણો OTT પ્લેટફોર્મની કમાણીનું ગણિત

આ પણ જુઓ:

Watch onYouTube