માત્ર 7 મહિનામાં 21,800 કંપનીઓ પર વાગ્યા તાળાં! MCA ડેટામાં ચોંકાવનારો મોટો ખુલાસો

Company Closures in India: વર્તમાન નાણાકીય વર્ષમાં ભારતનો કોર્પોરેટ જગત એક મોટી ચિંતાનો સામનો કરી રહ્યો છે. એપ્રિલ અને ઓક્ટોબર 2026 વચ્ચેના માત્ર સાત મહિનાના ટૂંકા ગાળામાં 21,800 થી વધુ કંપનીઓએ તેમના કામકાજ સત્તાવાર રીતે બંધ કરી દીધા છે અને તેમને સરકારી રજિસ્ટરમાંથી કાયમ માટે દૂર કરવામાં આવી છે. કોર્પોરેટ બાબતોના મંત્રાલય (MCA) દ્વારા જારી કરાયેલા આંકડા દર્શાવે છે કે ગયા વર્ષના આ જ સમયગાળાની સરખામણીમાં આ આંકડો લગભગ 80 ટકા જેટલો મોટો ઉછાળો સૂચવે છે. સૌથી આશ્ચર્યની વાત એ છે કે માત્ર સાત મહિનામાં બંધ થયેલી કંપનીઓની આ સંખ્યા છેલ્લા ત્રણ આખા નાણાકીય વર્ષોમાં બંધ થયેલી કંપનીઓની કુલ સંખ્યા કરતાં પણ વધુ છે.

આંકડા શું કહે છે?

મળતી માહિતી મુજબ, નાણાકીય વર્ષ 24 માં 16,464, નાણાકીય વર્ષ 25 માં 15,837 અને નાણાકીય વર્ષ 26 માં આશરે 16,850 કંપનીઓ બંધ થઈ હતી. તેની સામે ચાલુ વર્ષના માત્ર સાત મહિનામાં જ 21,800 નો આંકડો પાર થઈ જવો એ એક ગંભીર બાબત છે. એપ્રિલ અને મે મહિનામાં સરેરાશ દર મહિને 1,700 કંપનીઓ બંધ થતી હતી. જૂનમાં આ સંખ્યામાં મોસમી વધારો જોવા મળ્યો, ત્યારબાદ ઓગસ્ટમાં 3,797 અને સપ્ટેમ્બરમાં 4,933 કંપનીઓ ડિલિસ્ટ (યાદીમાંથી દૂર) થઈ હતી. ઓક્ટોબરમાં પણ આ સિલસિલો ચાલુ રહ્યો અને 4,351 કંપનીઓને રજિસ્ટરમાંથી હટાવવામાં આવી હતી.

કંપનીઓ કેમ મોટી સંખ્યામાં બંધ થઈ રહી છે?

નિષ્ણાતોના મતે, બંધ થતી કંપનીઓની સંખ્યામાં આવેલા આ અચાનક વધારા પાછળનું મુખ્ય કારણ MCA દ્વારા લાવવામાં આવેલી 'કંપનીઝ કમ્પ્લાયન્સ ફેસિલિટેશન સ્કીમ' (CCFS) છે. આ યોજના 15 એપ્રિલથી 15 સપ્ટેમ્બર સુધી અમલમાં હતી. આ સ્કીમ હેઠળ, લાંબા સમયથી નિષ્ક્રિય પડેલી કંપનીઓને માત્ર 10 ટકા પેનલ્ટી (વધારાની ફી) ચૂકવીને તેમના બાકી રહેલા સરકારી કાગળિયા પૂરા કરવાની છૂટ આપવામાં આવી હતી. આ ઉપરાંત, કંપનીને કાયમ માટે બંધ કરવાની અરજી ફી પણ ઘટાડીને સામાન્ય ફીના 25 ટકા કરી દેવામાં આવી હતી, જેનાથી કંપની બંધ કરવાનો ખર્ચ ઘણો ઓછો થઈ ગયો. મંત્રાલયે લોકસભામાં આપેલી માહિતી અનુસાર, 13 જુલાઈ સુધીમાં 92,859 કંપનીઓએ આ સ્કીમનો લાભ લીધો હતો અને તેમાંથી 11,829 કંપનીઓએ તો પોતાની કંપની ડિલિસ્ટ કરવા માટે સીધી અરજી જ કરી દીધી હતી.

આ પણ વાંચોઃ શેરબજારમાં રોકેટ ગતિ: મિનિટોમાં ₹4.5 લાખ કરોડની કમાણી, જાણો ઉછાળાના 3 કારણો

આ પણ જુઓ

Watch onYouTube