Credit Growth: ઑક્ટોબરમાં લોન વૃદ્ધિ 21% સુધી પહોંચી, HSBCએ FY27નો અંદાજ વધારી 18% કર્યો

ભારતીય બેન્કિંગ ક્ષેત્રમાં લોનની માંગમાં ફરી મજબૂત તેજી જોવા મળી રહી છે. HSBCના તાજા Asia Equity Strategy Report મુજબ ઑક્ટોબરમાં કુલ ક્રેડિટ ગ્રોથ વાર્ષિક ધોરણે 21% રહી છે. ખાસ કરીને મોટા ઉદ્યોગો અને MSME ક્ષેત્રમાંથી ધિરાણની માંગ વધતાં આ વૃદ્ધિ નોંધાઈ છે.

કોર્પોરેટ લોનમાં 24%નો વધારો

HSBCના રિપોર્ટ મુજબ કોર્પોરેટ ક્ષેત્રમાં ધિરાણ વાર્ષિક ધોરણે આશરે 24% વધ્યું છે. કંપનીઓમાં વર્કિગ કેપિટલની જરૂરિયાત વધવી, રૂપિયામાં નબળાઈ અને બોન્ડ માર્કેટના બદલે બેન્ક લોન તરફ વધેલો વલણ આ વૃદ્ધિના મુખ્ય કારણોમાં સામેલ છે. કંપનીઓ હવે ટૂંકા અને મધ્યમ ગાળાની નાણાકીય જરૂરિયાત માટે ફરી બેન્કિંગ ચેનલનો વધુ ઉપયોગ કરી રહી છે.

MSME લોનમાં 25% વૃદ્ધિ

Micro, Small and Medium Enterprises એટલે કે MSME ક્ષેત્રને આપવામાં આવેલા ધિરાણમાં 25%નો વધારો થયો છે. આ વૃદ્ધિ દર્શાવે છે કે લોનની માંગ માત્ર મોટા કોર્પોરેટ સુધી મર્યાદિત નથી, પરંતુ નાના અને મધ્યમ ઉદ્યોગોમાં પણ મજબૂત રહી છે. આ કારણે HSBCનું માનવું છે કે ક્રેડિટ ડિમાન્ડ વ્યાપક છે અને માત્ર એક-બે સેક્ટર પર આધારિત નથી.

FY27 માટે લોન વૃદ્ધિનો અંદાજ 18%

મજબૂત ધિરાણ માંગને ધ્યાનમાં રાખીને HSBCની બેન્કિગ ટીમે FY27 માટેનો લોન ગ્રોથ ઈસ્ટીમેન્ટ વધાર્યો છે. અગાઉ FY27માં આશરે 14% લોન વૃદ્ધિનો અંદાજ હતો, જેને હવે વધારીને લગભગ 18% કરવામાં આવ્યો છે. HSBCનું માનવું છે કે હાલમાં દેખાતી લોન માંગ આગામી મહિનાઓમાં પણ મજબૂત રહી શકે છે.

ડિપોઝિટ વૃદ્ધિ પણ 17%થી વધુ

લોનની સાથે બેન્કિંગ સિસ્ટમમાં ડિપોઝિટ વૃદ્ધિ પણ વધી છે. રિપોર્ટ મુજબ ડિપોઝીટ ગ્રોથ વાર્ષિક ધોરણે 17%થી વધુ થઈ છે, જ્યારે અગાઉ આ વૃદ્ધિ લગભગ 12-13% વચ્ચે હતી. FCNR(B) ડિપોઝીટ મારફતે થયેલી સારી જમા રકમથી પણ બેન્કિંગ સિસ્ટમમાં લિક્વિડીટીને ટેકો મળ્યો છે.

ખાનગી મૂડીરોકાણમાં સુધારાના સંકેત

HSBCએ private capital expenditureમાં પણ સુધારાના સંકેત નોંધ્યા છે. કેપિટલ ગુડ્સ, મશીનરી અને ઈલેક્ટ્રોનિક્સની યાતમાં વધારો થયો છે. RBIના ફિક્સ્ડ કેપિટલ ફોર્મેશનના આંકડા પણ ખાનગી મૂડીરોકાણમાં સુધારાની દિશા દર્શાવે છે. એટલે લોન વૃદ્ધિનો એક ભાગ માત્ર વર્કિગ કેપિટલ માટે નહીં, પરંતુ નવા મૂડીરોકાણ અને વિસ્તરણ સાથે પણ જોડાયેલો હોઈ શકે છે.

આ પણ વાંચો: Crude Oil Price: ટ્રમ્પનું એક નિવેદન અને ક્રૂડ ઓઈલમાં મોટો કડાકો, બ્રેન્ટ ક્રૂડ $91.88 પહોંચ્યું

સરકારના મૂડી ખર્ચથી પણ માંગને ટેકો

કેન્દ્ર સરકારના કેપિટલ expenditureએ પણ સ્થાનિક આર્થિક પ્રવૃત્તિને ટેકો આપ્યો છે. ઑગસ્ટ સુધી કેન્દ્ર સરકારે આખા વર્ષના capital expenditure budgetનો 42% ખર્ચ કર્યો હતો. ગયા વર્ષે સમાન સમયગાળામાં આ પ્રમાણ 38% હતું. HSBCના મતે સરકારના વધેલા ખર્ચથી સ્થાનિક માંગ અને અર્થતંત્રને મહત્વનો આધાર મળ્યો છે, જોકે વર્ષ આગળ વધતાં ખર્ચની ગતિ સામાન્ય થઈ શકે છે.

FTAથી નિકાસને પણ સહારો

તાજેતરના ત્રિમાસિકોમાં થયેલા ફ્રી ટ્રેડ એગ્રીમેન્ટની અસર નિકાસ પર દેખાવા લાગી હોવાનું HSBCનું કહેવું છે. રિપોર્ટ મુજબ તાજેતરમાં માલની નિકાસમાં વૃદ્ધિ સેવાઓની નિકાસ કરતાં વધુ જોવા મળી છે, જે ઘણા વર્ષો બાદ જોવા મળેલી સ્થિતિ છે. આ પણ ઉદ્યોગો અને લોન માંગ માટે સકારાત્મક પરિબળ બની શકે છે.

મોંઘવારી અને ગ્રામ્ય માંગ મોટું જોખમ

મજબૂત લોન વૃદ્ધિ છતાં HSBCએ કેટલાક જોખમો પણ દર્શાવ્યા છે. સપ્ટેમ્બરમાં Consumer Price Inflation 5.5% સુધી પહોંચી હતી, જે 23 મહિનાનું ઊંચું સ્તર હતું. નબળું ચોમાસું અને જળાશયોમાં ઓછું પાણી રવિ વાવેતર અને ગ્રામ્ય માંગને અસર કરી શકે છે. જો મોંઘવારી આગળ વધે તો ગ્રાહકોની ખરીદ ક્ષમતા પર દબાણ આવી શકે છે અને આવનારા ત્રિમાસિકોમાં કન્ઝ્યુમેશન ગ્રોથ ધીમો પડી શકે છે. કુલ મળીને HSBCના મતે મજબૂત ક્રેડિટ ગ્રોથ, સરકારનો capital expenditure અને ખાનગી મૂડીરોકાણમાં સુધારો ભારતીય અર્થતંત્રને ટેકો આપી રહ્યા છે, પરંતુ મોંઘવારી અને ગ્રામ્ય માંગ પરનું દબાણ આગળના સમયગાળા માટે મહત્વના જોખમ રહેશે.

આ પણ જુઓ

Watch onYouTube