FTAથી ગુજરાતના ઉદ્યોગો માટે ખુલશે નવા બજારો, નિકાસને મળશે મોટો ફાયદો

ભારતના વધતા મુક્ત વેપાર કરારો ગુજરાતના ઉદ્યોગો માટે નવી વૈશ્વિક તકો ઊભી કરી શકે છે. રાજ્યનો મજબૂત ઔદ્યોગિક આધાર, બંદરોનું નેટવર્ક અને નિકાસલક્ષી અર્થતંત્ર તેને FTA આધારિત વૃદ્ધિ માટે મહત્વપૂર્ણ સ્થાન આપે છે. આગામી વાયબ્રન્ટ ગુજરાત ગ્લોબલ સમિટ 2027માં પણ આ મુદ્દા પર ખાસ ધ્યાન આપવામાં આવશે.

ગુજરાતની નિકાસ ₹9.77 લાખ કરોડે પહોંચી

નાણાકીય વર્ષ 2025-26માં ગુજરાતે US$110.6 અબજની કિંમતનો માલ નિકાસ કર્યો હતો. રાજ્યની નિકાસ FY 2013-14માં ₹4.44 લાખ કરોડ હતી, જે FY 2025-26માં વધીને ₹9.77 લાખ કરોડ થઈ છે. ગુજરાત દેશની કુલ માલ નિકાસમાં આશરે 25% હિસ્સો ધરાવે છે.

FTA દેશોમાં પહેલેથી US$37.8 અબજની નિકાસ

ગુજરાત ભારતના FTA ભાગીદાર દેશોમાં પહેલેથી US$37.8 અબજની નિકાસ કરે છે, જે રાજ્યની કુલ નિકાસના લગભગ 34% જેટલી છે. આ બજારોમાં ગુજરાત માટે સંબંધિત ક્ષેત્રોની કુલ આયાત માંગ US$1.08 ટ્રિલિયનથી વધુ હોવાનું જણાવાયું છે.

ભારતની કુલ નિકાસ પણ રેકોર્ડ સ્તરે

નાણાકીય વર્ષ 2025-26માં ભારતની માલ અને સેવાઓની સંયુક્ત નિકાસ US$863.1 અબજના રેકોર્ડ સ્તરે પહોંચી હતી. તેમાં માલ-સામાનની નિકાસ US$441.8 અબજ રહી હતી. આ વૃદ્ધિ FY 2026-27માં પણ ચાલુ રહી છે. એપ્રિલથી જૂન 2026 દરમિયાન ભારતની સંયુક્ત નિકાસ આશરે US$232.37 અબજ રહી, જે ગયા વર્ષની સમાન અવધિ કરતાં 11.37% વધુ છે.

આ પણ વાંચો: ₹5થી શરૂ થશે Relianceના નવા બિસ્કિટ, Independence હેઠળ 9 વેરિઅન્ટ લોન્ચ કર્યા

કયા ઉદ્યોગોને ફાયદો?

FTAથી ગુજરાતના કેમિકલ્સ અને પેટ્રોકેમિકલ્સ, મરીન પ્રોડક્ટ્સ, એગ્રો-પ્રોસેસ્ડ ફૂડ, જેમ્સ અને જ્વેલરી, ટેક્સટાઇલ, ગાર્મેન્ટ્સ, એન્જિનિયરિંગ અને ઓટોમોબાઇલ ક્ષેત્રને ખાસ લાભ મળી શકે છે. MSME અને મહિલા ઉદ્યોગસાહસિકોને પણ ટેક્સટાઇલ, ચામડાના ઉત્પાદનો અને હસ્તકળા જેવી વસ્તુઓ વધુ સ્પર્ધાત્મક કિંમતે નિકાસ કરવાની તક મળી શકે છે.

Vibrant Gujarat 2027માં FTA પર ફોકસ

10થી 12 જાન્યુઆરી 2027 દરમિયાન યોજાનાર 11મી Vibrant Gujarat Global Summitમાં FTA અને વૈશ્વિક વેપાર તકો પર વિશેષ સત્રો યોજાશે. ઉદ્દેશ ગુજરાતની ઔદ્યોગિક ક્ષમતાને આંતરરાષ્ટ્રીય બજારો અને Global Value Chains સાથે વધુ મજબૂત રીતે જોડવાનો છે.

આ પણ જુઓ

Watch onYouTube