Coca-Cola: $1 અબજનો IPO લાવશે, SEBI સમક્ષ DRHP ફાઈલ

Coca-Cola IPO: Thums Up, Maaza અને Kinley જેવી જાણીતી બ્રાન્ડ્સનું ઉત્પાદન અને વિતરણ કરતા વ્યવસાયની હોલ્ડિંગ કંપની હવે દલાલ સ્ટ્રીટ પર પ્રવેશવાની તૈયારીમાં છે. The Coca-Cola Company અને Jubilant Beveragesનું સમર્થન ધરાવતી Hindustan Coca-Cola Holdings Limited (HCCH)એ IPO માટે SEBI સમક્ષ ડ્રાફ્ટ રેડ હેરિંગ પ્રોસ્પેક્ટસ (DRHP) ફાઈલ કર્યો છે. કંપની 1 અબજ ડોલરનો IPO લાવશે. પ્રસ્તાવિત લિસ્ટિંગથી રોકાણકારોને ભારતના સૌથી મોટા બેવરેજ બોટલિંગ વ્યવસાયોમાંના એકમાં ભાગીદારીની તક મળી શકે છે.

IPOનું કદ ₹9500 કરોડનું હશે

Coca-Colaનાં IPOનું કદ અંદાજીત ₹9500 કરોડનું હશે. પ્રસ્તાવિત IPO સંપૂર્ણપણે ઓફર ફોર સેલ (OFS) હશે. તેમાં પ્રમોટર Hindustan Coca-Cola Overseas Holdings ₹10ની ફેસ વેલ્યૂ ધરાવતા 99.75 કરોડ સુધીના ઇક્વિટી શેર વેચશે. કંપની કોઈ નવા શેર બહાર પાડશે નહીં. તેથી IPOમાંથી મળતી રકમ શેર વેચતા પ્રમોટરને મળશે અને HCCHને કોઈ ભંડોળ પ્રાપ્ત થશે નહીં. કંપનીના શેર BSE અને NSE પર લિસ્ટ કરવાની દરખાસ્ત છે. હજુ ઇશ્યૂનો પ્રાઇસ બેન્ડ અને સબ્સ્ક્રિપ્શન માટેની તારીખો હજુ જાહેર થઈ નથી.

કંપનીની કામગીરીની વાત કરીએ તો, 30 જૂન, 2026ના રોજ પૂર્ણ થયેલા ક્વાર્ટરમાં HCCHના જાળવી રાખેલા એકમોની કામગીરીમાંથી આવક 20.46% વધીને ₹4,310.17 કરોડ થઈ હતી. વેચાણના જથ્થામાં વાર્ષિક ધોરણે 18.61%નો વધારો નોંધાયો હતો. અન્ય આવક અને અસાધારણ બાબતોને બાકાત રાખીને EBITDA માર્જિન અગાઉના 13.76%થી સુધરીને 17.20% થયું હતું. એટલે આવક અને વેચાણના જથ્થાની સાથે કામગીરીનું માર્જિન પણ સુધર્યું હતું.

HCCH: 60% કોકા-કોલા, 40% જ્યુબિલન્ટ ભારતીય

HCCH એ આવકની દ્રષ્ટિએ દેશની સૌથી મોટી બિન-આલ્કોહોલિક પીણાં (નોન-આલ્કોહોલિક ડ્રિંક) પૂરી પાડતી કંપની છે, જે મુખ્યત્વે દક્ષિણ અને પશ્ચિમ ભારતમાં કાર્યરત છે. આ કંપનીમાં 60% હિસ્સો 'ધ કોકા-કોલા કંપની'નો અને 40% હિસ્સો 'જ્યુબિલન્ટ ભારતીય ગ્રુપ'નો છે. કોટક મહિન્દ્રા કેપિટલ અને જે.પી. મોર્ગન જેવી નાણાકીય ક્ષેત્રની દિગ્ગજ સંસ્થાઓ આ IPO પ્રક્રિયાનું સંચાલન કરી રહી છે. જોકે, આ માત્ર 'ઓફર ફોર સેલ' હોવાથી આ પ્રક્રિયા દ્વારા HCCH ને કોઈ નવી મૂડી (ફ્રેશ ફંડ્સ) પ્રાપ્ત થશે નહીં.

કંપની શું કામ કરે છે?

HCCH, Hindustan Coca-Cola Beverages મારફતે પીણાંનું ઉત્પાદન અને વિતરણ કરે છે. તેનો વ્યવસાય સ્પાર્કલિંગ એટલે કે ગેસવાળાં પીણાં, પાણી સહિતની હાઇડ્રેશન પ્રોડક્ટ્સ અને જ્યૂસ જેવી શ્રેણીઓમાં ફેલાયેલો છે. કંપનીના પોર્ટફોલિયોમાં Thums Up, Maaza અને Kinley સહિત કુલ 41 પીણાંનો સમાવેશ થાય છે.

કંપનીનો વ્યવસાય

કંપનીનો વ્યવસાય 10 રાજ્યો અને ચાર કેન્દ્રશાસિત પ્રદેશોમાં ફેલાયેલો છે. આશરે 17 લાખ રિટેલ આઉટલેટ્સ સુધી પહોંચવા માટે તેની પાસે 2,273 ડિસ્ટ્રિબ્યુટર્સનું નેટવર્ક છે. ઉત્પાદન વ્યવસ્થામાં 14 ઉત્પાદન એકમો, આઠ સહયોગી પેકિંગ એકમો અને 90 બોટલિંગ લાઇનોનો સમાવેશ થાય છે.

માલિકીના માળખા મુજબ, The Coca-Cola Company HCCHમાં પરોક્ષ રીતે 60% હિસ્સો ધરાવે છે, જ્યારે બાકીનો 40% હિસ્સો Jubilant Beverages પાસે છે. Jubilant જુલાઈ 2025માં પ્રમોટર ગ્રુપમાં જોડાઈ હતી. Coca-Colaએ જૂન 2026ની સત્તાવાર જાહેરાતમાં પણ ભારતીય બોટલિંગ વ્યવસાયની સંભવિત લિસ્ટિંગ યોજના અને Jubilantના 40% હિસ્સાની માહિતી આપી હતી.

આ ઇન્વેસ્ટમેન્ટ બેંકો કરશે સંચાલન

IPOનું સંચાલન સાત ઇન્વેસ્ટમેન્ટ બેંકો કરશે, જેમાં Kotak Mahindra Capital, Citigroup અને J.P. Morganનો સમાવેશ થાય છે. KFin Technologies ઇશ્યૂના રજિસ્ટ્રાર તરીકે કામગીરી સંભાળશે. પ્રાઇસ બેન્ડ અને અરજીની તારીખો જાહેર થયા બાદ રોકાણકારો માટે ઇશ્યૂની કિંમત અને સમયપત્રક સ્પષ્ટ થશે.

આ પણ વાંચો: Amberની પેટાકંપની IL JIN Electronics ₹2,500 કરોડનો લાવશે IPO

આ પણ જુઓ:

Watch onYouTube