Jefferies Report: રિલાયન્સથી લઈને HDFC બેંક સુધી, વિદેશી રોકાણ વધતા આ 12 શેરો રોકેટ બનશે!

Stock Market India: ભારતીય શેરબજારમાં લાંબા સમયથી ચાલી આવતી વેચવાલીના ટ્રેન્ડમાં હવે મોટો વળાંક આવ્યો છે. છેલ્લા બે વર્ષથી ભારતીય બજારમાંથી પોતાના નાણાં પાછા ખેંચી રહેલા વિદેશી પોર્ટફોલિયો રોકાણકારો (FPIs) એ ફરી એકવાર જંગી ખરીદી શરૂ કરી છે. રોકાણકારોના આ બદલાયેલા વલણને ધ્યાનમાં રાખીને ગ્લોબલ બ્રોકરેજ ફર્મ જેફરીઝે 12 એવા લાર્જ-કેપ શેર પસંદ કર્યા છે, જે વિદેશી રોકાણના આ નવા પ્રવાહથી સીધો અને મોટો લાભ મેળવી શકે છે. આ યાદીમાં રિલાયન્સ ઇન્ડસ્ટ્રીઝ, HDFC બેંક, એક્સિસ બેંક, કોટક મહિન્દ્રા બેંક, મેક્સ હેલ્થકેર અને JSW એનર્જી જેવી દિગ્ગજ કંપનીઓના નામ સામેલ છે.

વિદેશી રોકાણકારોએ 61 બિલિયન ડોલર કાઢ્યા, 8.2 બિલિયન પાછા લાવ્યા

આંકડાઓ પર નજર કરીએ તો, સપ્ટેમ્બર 2024 થી ભારતીય શેરબજારમાંથી વિદેશી રોકાણકારોએ આશરે 61 બિલિયન ડોલર (લગભગ 5 લાખ કરોડ રૂપિયા) પાછા ખેંચી લીધા હતા. પરંતુ ઓક્ટોબરના મધ્યભાગથી પરિસ્થિતિ બદલાઈ છે. અત્યાર સુધીમાં તેઓએ 8.2 બિલિયન ડોલરનું નવું રોકાણ કર્યું છે, જેમાંથી માત્ર નવેમ્બર મહિનાના છ ટ્રેડિંગ સેશનમાં જ 5.8 બિલિયન ડોલરની માતબર ખરીદી નોંધાઈ છે. આથી બજારના નિષ્ણાતો અને રોકાણકારો હવે એવી કંપનીઓ પર મીટ માંડીને બેઠા છે જ્યાં વિદેશી રોકાણકારોનો હિસ્સો નોંધપાત્ર રીતે ઘટ્યો હતો, કારણ કે હવે ત્યાંથી જ સૌથી વધુ વળતર મળવાની સંભાવના છે.

જેફરીઝે કયા 12 શેરોમાં રોકાણની સલાહ આપી?

જેફરીઝના મતે રિલાયન્સ ઇન્ડસ્ટ્રીઝ, HDFC બેંક, એક્સિસ બેંક, કોટક મહિન્દ્રા બેંક, મેક્સ હેલ્થકેર, JSW એનર્જી, અલ્ટ્રાટેક સિમેન્ટ, ઇન્ડિગો, વરુણ બેવરેજીસ, ઇન્ડિયન હોટેલ્સ, DLF અને સોના BLW એવા શેર છે જે FPI ના પાછા ફરવાથી મોટો નફો કરાવી શકે છે. બ્રોકરેજ ફર્મે આ કંપનીઓની પસંદગી ઘટતા વિદેશી રોકાણ, તેમની ઓછી થયેલી સ્ટોક પોઝિશન અને મોટા રોકાણકારો દ્વારા સંભવિત મોટી ખરીદીના આધારે કરી છે.

કયા સેક્ટરમાંથી કેટલું રોકાણ પાછું ખેંચાયું હતું?

સપ્ટેમ્બર 2024 થી નાણાકીય ક્ષેત્રમાં (ફાઇનાન્સ સેક્ટર) સૌથી વધુ 17 બિલિયન ડોલરનો FPI આઉટફ્લો (નાણાં પાછા ખેંચવા) જોવા મળ્યો હતો. ગ્રાહક લક્ષી કંપનીઓમાંથી આશરે 11 બિલિયન ડોલર પાછા ખેંચાયા હતા. સ્ટોક લેવલ પર જોઈએ તો, રિલાયન્સ ઇન્ડસ્ટ્રીઝ અને HDFC બેંકમાંથી 8 બિલિયન ડોલર, ICICI બેંક અને એક્સિસ બેંકમાંથી 5 બિલિયન ડોલર અને મહિન્દ્રા એન્ડ મહિન્દ્રામાંથી 3 બિલિયન ડોલરનો આઉટફ્લો નોંધાયો હતો. આ સમયગાળા દરમિયાન BSE 500 કંપનીઓમાં FPI નો હિસ્સો 19.6% થી ઘટીને 17.3% થઈ ગયો હતો, જે છેલ્લા દસ વર્ષનું સૌથી નીચું સ્તર છે.

FPI ના આઉટફ્લોનો સેક્ટર વાઇઝ અંદાજ:

નાણાકીય ક્ષેત્ર - 17 બિલિયન ડોલર

ગ્રાહક લક્ષી કંપનીઓ - 11 બિલિયન ડોલર

ઊર્જા (એનર્જી) - 9 બિલિયન ડોલર

ઓટોમોબાઇલ - 9 બિલિયન ડોલર

IT (ઇન્ફોર્મેશન ટેકનોલોજી) - 9 બિલિયન ડોલર

વિદેશી રોકાણ ફરીથી કેમ વધી શકે? જેફરીઝે આપ્યા 5 કારણો:

જેફરીઝના જણાવ્યા અનુસાર, વિદેશી રોકાણમાં વધારા પાછળ મુખ્ય 5 કારણો જવાબદાર છે:

AI રોકાણોમાં પરિવર્તન: વૈશ્વિક બજારોમાં અત્યાર સુધી આર્ટિફિશિયલ ઇન્ટેલિજન્સ (AI) કંપનીઓમાં જ રોકાણ થઈ રહ્યું હતું. જો આ રોકાણ હવે અન્ય સેક્ટરમાં વિસ્તરશે, તો ભારતને તેનો મોટો ફાયદો થશે.

સસ્તું ક્રૂડ ઓઇલ: ઓક્ટોબર 2026 માં ક્રૂડ ઓઇલના ભાવમાં ટોચના સ્તરેથી 20% નો ઘટાડો થયો છે. ભારત મોટો તેલ આયાતકાર દેશ હોવાથી સસ્તું ક્રૂડ દેશનું આયાત બિલ ઘટાડશે અને રૂપિયા પરનું દબાણ પણ ઓછું કરશે.

મજબૂત ભારતીય અર્થતંત્ર: તાજેતરની તહેવારોની સિઝનમાં ઓટોમોબાઈલનું બમ્પર વેચાણ, વીજળીની વધેલી માંગ અને મજબૂત બેંકિંગ ક્રેડિટ ભારતીય અર્થતંત્રની મજબૂતાઈ દર્શાવે છે.

શેરોનું આકર્ષક વેલ્યુએશન (મૂલ્યાંકન): નિફ્ટી 100 ઇન્ડેક્સનો પ્રાઇસ-ટુ-અર્નિંગ (P/E) રેશિયો અત્યારે 18.6 ગણો છે, જે તેની 10 વર્ષની સરેરાશ કરતા લગભગ 5% ઓછો છે, જે રોકાણ માટે ખૂબ આકર્ષક ગણાય છે.

ઇક્વિટી ટેક્સ રાહતની અપેક્ષા: ભવિષ્યમાં ઇક્વિટી રોકાણો પર સંભવિત કર રાહત (ટેક્સ બેનિફિટ) મળવાની શક્યતા પણ વિદેશી રોકાણકારોને આકર્ષી રહી છે.

આ પણ વાંચોઃ શેરબજારમાં રોકેટ ગતિ: મિનિટોમાં ₹4.5 લાખ કરોડની કમાણી, જાણો ઉછાળાના 3 કારણો

આ પણ જુઓ

Watch onYouTube