સેમી કંડક્ટર સેક્ટરઃ આ બે શેર અવગણવા જેવા નથી

ભારતની સેમી કંડક્ટર મહત્ત્વાકાંક્ષા ચિપ ફેબ્રિકેશનથી પણ આગળ વધી છે. સરકારે રૂ. 76,000 કરોડના ઇન્ડિયા સેમી કંડક્ટર મિશનની મદદથી ભારતમાં આ ઉદ્યોગનો પાયો નાખ્યો છે. ચિપ ડિઝાઇન, ચિપ એડવાન્સ્ડ પેકેજિંગ, સેમી કંડક્ટર ઇક્વિપમેન્ટ, મટીરિયલ્સ, કેમિકલ્સ અને અન્ય જીવનજરૂરી સાધનો માટે રૂ.1.27 લાખ કરોડનું પ્રોત્સાહન પેકેજ આપ્યું છે. આ બાબત મહત્વની એટલા માટે છે કેમકે ભારત હજી પણ સેમીકંડક્ટર સેક્ટરની મોટાભાગની જરૂરિયાતો આયાતથી જ પૂરી કરે છે. ભારતમાં સેમીકંડક્ટર અને ઇલેક્ટ્રોનિક મેન્યુફેક્ચરિંગ સેક્ટરનું વિસ્તરણ થવાની સાથે તેમને મહત્વના ઉપકરણો પૂરા પાડતી કંપનીઓનું મહત્વ વધ્યું છે. આ સંજોગોમાં બે એન્જિનિયરિંગ કંપનીઓ લાઇમલાઇટમાં આવી છે.

રત્નવીર પ્રીસિઝન

રત્નવીર પ્રીસિઝન એન્જિનીયરિંગ સ્ટેઇનલેસ સ્ટીલ (RPEL) એન્જિનીયરિંગ પ્રોડક્ટ્સનું ઉત્પાદન કરે છે. કંપની સ્ટેનલેસ સ્ટીલ વોશર્સની ભારતની સૌથી મોટી નિકાસકાર છે. કંપની 3,300થી વધુ વોશર એસકેયુ ઓફર કરે છે. કંપની વર્ષે 180 કરોડ રૂપિયાથી વધુ યુનિટ્સનું ઉત્પાદન કરે છે. તેના ફાસ્ટનર પોર્ટફોલિયોમાં નટ્સ, બોલ્ટ્સ અને સોલર માઉન્ટિંગનો સમાવેશ થાય છે.

કંપની આયાત પર નિર્ભરતા ઘટાડવા ગુજરાતમાં દેશની પ્રથમ ઇન્ટિગ્રેટેડ એફઆર-4 કોપર ક્લેડ લેમિનેટ (સીસીએલ) સ્થાપી રહી છે. સીસીએલ ઇલેક્ટ્રોનિક્સ ગ્રેડ બેઝ મટીરિયલ છે, જે દરેક પ્રિન્ટેડ સર્કિટ બોર્ડ (પીસીબી) માટે મુખ્ય સબસ્ટ્રેટ તરીકે કામ કરે છે. પીસીબીએ સેમીકંડક્ટર અને ઇલેક્ટ્રોનિક ઘટકોનો મુખ્ય આધાર છે. ભારતનું સીસીએલ માર્કેટ 2031 સુધીમાં લગભગ 30,000 કરોડ રૂપિયાએ પહોંચવાનો અંદાજ છે. કંપનીને સીસીએલ ડિવિઝનમાંથી રૂ. 750 કરોડની આવક થવાનો અંદાજ છે. તેમા કાર્યકારી નફા માર્જિન 20 ટકા અને ચોખ્ખા નફા માર્જિન 10થી 11 ટકા રહેશે.

કંપનીના ઉત્પાદનોનો ઉપયોગ ડિફેન્સ, રેલ્વે, એરોસ્પેસ, ફાર્માસ્યુટિકલ્સ અને કેમિકલ એન્જિનિયરિંગ જેવા સેક્ટરમાં થાય છે.  પ્રથમ ક્વાર્ટરમાં કંપનીની સંયુક્ત આવક વાર્ષિક ધોરણે 18.9 ટકા વધી રૂ. 314.6 કરોડ થઈ છે. કંપનીનો કાર્યકારી નફો 31.7 ટકા વધી રૂ. 35.9 કરોડ થયો છે. તેમા માર્જિન 11.4 ટકા રહ્યુ છે. જ્યારે ચોખ્ખો નફો 22 ટકા વધી રૂ. 18.2 કરોડ રહ્યો છે. કંપનીની માંગ બતાવી રહી છે કે તેનું ભાવિ ઉજળું છે. આ શેર લાંબા ગાળા માટે અવગણવા જેવો નથી. બીએસઈ પર કંપનીના શેરનો ભાવ રૂ. 334.20 પર બંધ આવ્યો હતો.

INDO-MIM

INDO-MIM એ વૈશ્વિક સ્તરની પ્રિસિઝન એન્જિનિયરિંગ કમ્પોનન્ટ્સ ઉત્પાદક કંપની છે, જે એન્ડ-ટુ-એન્ડ કમ્પોનન્ટ સોલ્યુશન્સ પૂરા પાડે છે. તે વિશ્વમાં મેટલ ઇન્જેક્શન મોલ્ડિંગ (MIM) ની સૌથી મોટી સ્થાપિત ક્ષમતા ધરાવે છે અને CY25 માં 6.8% માર્કેટ શેર સાથે વૈશ્વિક ઉદ્યોગનું નેતૃત્વ કરે છે. શુક્રવારે બીએસઈ પર કંપનીના શેરનો ભાવ 1,275.35 પર બંધ આવ્યો હતો.

આ કંપની પ્રોડક્ટ ડિઝાઇન અને મોલ્ડ ટૂલિંગથી લઈને મટિરિયલની પસંદગી, સેકન્ડરી ફિનિશિંગ, એસેમ્બલી અને પેકેજિંગ સુધીના ટર્નકી મેન્યુફેક્ચરિંગ સોલ્યુશન્સ ઓફર કરે છે. INDO-MIM ઓટોમોટિવ, મેડિકલ, એરોસ્પેસ, ડિફેન્સ, કન્ઝ્યુમર પ્રોડક્ટ્સ અને ઔદ્યોગિક ક્ષેત્ર જેવા વિવિધ ક્ષેત્રોમાં કમ્પોનન્ટ્સ સપ્લાય કરે છે.

સૌથી મોટો MIM પ્લાન્ટ ધરાવવા ઉપરાંત, INDO-MIM સંલગ્ન ટેક્નોલોજીઓમાં વિસ્તરણ કરીને વૃદ્ધિને વેગ આપી રહી છે. જેમાં સિરામિક ઇન્જેક્શન મોલ્ડિંગ, પ્રિસિઝન ઇન્વેસ્ટમેન્ટ કાસ્ટિંગ, પ્રિસિઝન મશીનિંગ, એડિટિવ મેન્યુફેક્ચરિંગ/3D પ્રિન્ટિંગ અને પાવડર મેન્યુફેક્ચરિંગનો સમાવેશ થાય છે.

વૈશ્વિક વ્યાપ અને સંલગ્ન ટેક્નોલોજી વિસ્તરણ

વધુમાં, સંપૂર્ણ એન્ડ-ટુ-એન્ડ સોલ્યુશન્સ પૂરા પાડવાથી એવા માર્કેટ સેગમેન્ટ્સના રસ્તા ખૂલે છે જે ફક્ત MIM બનાવતી કંપનીઓ માટે ઉપલબ્ધ નથી હોતા. INDO-MIM વૈશ્વિક સ્તરે 15 મેન્યુફેક્ચરિંગ ફેસિલિટીઝ ધરાવે છે, જેમાં ભારતમાં 6, યુ.એસ.માં 6, યુનાઇટેડ કિંગડમમાં 2 અને મેક્સિકોમાં 1 ફેસિલિટી સામેલ છે. આ ઉપરાંત, કર્ણાટકના ગૌરીબિદાનુર ખાતે એક વધારાની આયર્ન પાવડર મેન્યુફેક્ચરિંગ ફેસિલિટી તૈયાર થઈ રહી છે.

સેક્ટર ડાયવર્સિફિકેશન અને સેમિકન્ડક્ટર ક્ષેત્રનો ટેકો

તેની આવક વિવિધ અંતિમ-વપરાશ ઉદ્યોગોમાં વહેંચાયેલી છે, જેમાં ઓટોમોટિવ (24.6%), ડિફેન્સ (18.7%), મેડિકલ (18.1%), કન્ઝ્યુમર પ્રોડક્ટ્સ (10.8%) અને એરોસ્પેસ (11.9%) શામેલ છે. સેમિકન્ડક્ટર ઉદ્યોગમાં, તે સેમિકન્ડક્ટર ડિવાઇસિસને ઘેરી રાખતા, રક્ષણ આપતા અને ઠંડા રાખતા મહત્વપૂર્ણ હાર્ડવેર કમ્પોનન્ટ્સનું ઉત્પાદન કરે છે. INDO-MIM ની મેન્યુફેક્ચરિંગ ક્ષમતાઓમાં ઇલેક્ટ્રોનિક કમ્પોનન્ટ ઉત્પાદન અને સબ-એસેમ્બલી સેવાઓનો સમાવેશ થાય છે. કંપનીને ISM 1.0 અને ISM 2.0 પોલિસીઓથી પણ વૃદ્ધિનો વેગ મળી રહ્યો છે.

આ ઉપરાંત કંપની વ્યાપક ઇલેક્ટ્રોનિક્સ ઇકોસિસ્ટમ માટે પ્રીસિઝન-એન્જિનિયર્ડ કમ્પોનન્ટ્સ સપ્લાય કરે છે. તેના પોર્ટફોલિયોમાં પ્રીસિઝન કનેક્ટર્સ, ઇન્ટરફેસ શેલ, કૂલિંગ ફેનના પાર્ટ્સ, કેમેરા સ્ટેન્ડ્સ અને કમ્પ્યુટિંગ તેમજ પહેરી શકાય તેવા (વેરેબલ) ડિવાઇસિસમાં વપરાતા સ્માર્ટફોન હિંજિસ (મિજાગરા) નો સમાવેશ થાય છે.