Anthropic IPO લાવવાની તૈયારીમાં, અમેરિકી SEC સમક્ષ IPO માટે કરી અરજી

Claude AI ચેટબોટ બનાવતી Anthropic શેરબજારમાં તૈયારી શરૂ કરી દીધી છે. કંપનીએ અમેરિકામાં IPO માટે સત્તાવાર અરજી કરી છે. 26 ઑક્ટોબરે US SEC સમક્ષ કરેલી ફાઇલિંગ મુજબ કંપનીના શેર Nasdaq ગ્લોબલ સેલેક્ટ માર્કેટ પર ANT નામથી લિસ્ટ કરવાની યોજના છે. Anthropicએ જૂન મહિનામાં જ ગુપ્ત રીતે લિસ્ટિંગ માટે દસ્તાવેજો જમા કરાવ્યા હતા. હવે સત્તાવાર અરજી સાથે કંપની IPO લાવવાની તરફ આગળ વધી છે.

પ્રથમ frontier AI કંપની બની શકે

જો Anthropicનું IPO સફળતાપૂર્વક પૂર્ણ થાય તો અદ્યતન AI મોડલ વિકસાવતી મોટી કંપનીઓમાં જાહેર શેરબજારમાં પ્રવેશ કરનારી તે પ્રથમ કંપની બની શકે છે. હાલ OpenAI સહિત મોટાભાગની મોટી AI કંપનીઓ ખાનગી માલિકીની છે.

કેટલી રકમ ઊભી કરશે?

Anthropicએ IPOથી કેટલી રકમ ઊભી કરવાની યોજના છે તેની વિગતો હાલ જાહેર કરી નથી. આગામી સુધારેલી ફાઇલિંગમાં IPOનું કદ, પ્રાઈઝ બેન્ડ અને શેરની સંખ્યા જેવી વિગતો સામે આવી શકે છે.

AI બનાવવાનો ખર્ચ વધી રહ્યો છે

Anthropicનું IPO એવા સમયે આવી રહ્યું છે જ્યારે અદ્યતન AI મોડલ બનાવવા અને ચલાવવા માટે કંપનીઓને મોટા પ્રમાણમાં નાણાંની જરૂર પડી રહી છે. ડેટા સેન્ટર, કમ્પ્યુટિંગ ક્ષમતા, AI chips, મોડલ ટ્રેનિંગ અને સંશોધન પાછળ ભારે ખર્ચ થઈ રહ્યો છે. આ કારણે આવકમાં વધારો થતો હોવા છતાં AI કંપનીઓ પર ખર્ચનું દબાણ યથાવત છે.

પ્રથમ છ મહિનામાં મોટું નુકસાન

ફાઇલિંગમાં આપવામાં આવેલા આંકડા મુજબ Anthropicએ 2026ના પ્રથમ છ મહિનામાં $16.29 અબજની આવક નોંધાવી હતી. આ સમયગાળા દરમિયાન કંપનીએ $80.75 અબજનું ચોખ્ખું નુકસાન દર્શાવ્યું છે. કંપનીએ હજી ત્રીજા ત્રિમાસિકના નાણાકીય પરિણામોની વિગતો ફાઇલિંગમાં આપી નથી. IPOની કિંમત નક્કી થાય તે પહેલાં સુધારેલી ફાઇલિંગમાં વધુ નાણાકીય આંકડા જાહેર થઈ શકે છે.

Goldman Sachs અને Morgan Stanleyની મોટી ભૂમિકા

IPOનું નેતૃત્વ Goldman Sachs અને Morgan Stanley કરશે. આ ઉપરાંત અન્ય 20 બેન્કોના નામ પણ IPO સંબંધિત ફાઇલિંગમાં સામેલ છે. આથી Anthropicનો IPO અમેરિકાના મોટા ટેક્નોલોજી IPOમાં સામેલ થઈ શકે તેવી તૈયારી જોવા મળી રહી છે.

આ પણ વાંચો: Expert Speaks : સોનું $4,000ની નીચે, દિવાળી પહેલાં શું કરવું?

SpaceX પછી Anthropic પર નજર

Anthropicના સંભવિત IPOની સરખામણી તાજેતરના મોટા ટેક્નોલોજી IPO સાથે થઈ રહી છે. SpaceXએ તાજેતરમાં આશરે $86 અબજ ઊભા કર્યા હતા અને તેની શરૂઆતની વેલ્યુએશન આશરે $1.77 ટ્રિલિયન રહી હતી. SpaceXનો IPO હાલમાં સૌથી મોટા IPOમાંથી એક ગણાય છે.

OpenAI પણ IPOની તૈયારીમાં

Anthropicની પ્રતિસ્પર્ધી OpenAIએ પણ અગાઉ ગુપ્ત રીતે લિસ્ટિંગ સંબંધિત દસ્તાવેજો જમા કરાવ્યા હતા. જોકે OpenAIએ હાલ 2027 પહેલાં IPO લાવવાની અપેક્ષા નથી એવું જણાવ્યું છે. OpenAI ખાનગી બજારમાં વધુ $30 અબજ ઊભા કરવાની તૈયારીમાં હોવાનું પણ અહેવાલોમાં જણાવાયું છે, જેમાં કંપનીની સંભવિત વેલ્યુએશન $1.25 ટ્રિલિયન ગણવામાં આવી રહી છે.

AI ઉદ્યોગ માટે કેમ મહત્વનું?

Anthropicનું IPO માત્ર એક કંપનીનું લિસ્ટિંગ નહીં પરંતુ AI ઉદ્યોગ માટે પણ મહત્વપૂર્ણ બની શકે છે. જો કંપની શેરબજારમાં પ્રવેશ કરે તો પ્રથમ વખત જાહેર રોકાણકારોને frontier AI મોડલ બનાવતી કંપનીમાં સીધું રોકાણ કરવાની તક મળી શકે છે. આ સાથે AI કંપનીઓના વધતા ખર્ચ, કમાણીની ક્ષમતા અને વેલ્યુએશન અંગે પણ બજારને વધુ પારદર્શક માહિતી મળી શકે છે.

આ પણ જુઓ

Watch onYouTube