Effect on Exports : ઇન્ડોનેશિયાની નવી નીતિથી ભારતની સીંગદાણાની નિકાસમાં 25% ઘટાડો

ઇન્ડોનેશિયાની બદલાયેલી આયાત નીતિના કારણે ભારતની સીંગદાણાની નિકાસ પર અસર પડી છે. નાણાકીય વર્ષ 2026-27ના પ્રથમ ત્રિમાસિક ગાળામાં ભારતની સીંગદાણાની કુલ નિકાસમાં જથ્થા પ્રમાણે 24.60%નો ઘટાડો નોંધાયો છે. એપ્રિલથી જૂન 2026 દરમિયાન ભારતે કુલ 1,33,861 ટન સીંગદાણા નિકાસ કર્યા હતા, જેનું મૂલ્ય 164.19 મિલિયન ડોલર હતું. ગત નાણાકીય વર્ષના સમાન સમયગાળામાં ભારતની કુલ સીંગદાણાની નિકાસ 1,77,541 ટન અને 180.27 મિલિયન ડોલરની હતી.

ઇન્ડોનેશિયાની નિકાસમાં મોટો ઘટાડો

ઇન્ડોનેશિયાની બદલાયેલી નીતિની સૌથી વધુ અસર ભારતના સીંગદાણા નિકાસકારો પર પડી છે. FY26ના પ્રથમ ત્રિમાસિકમાં ભારતે ઇન્ડોનેશિયામાં 71,826 ટન અને 70.75 મિલિયન ડોલરના સીંગદાણા મોકલ્યા હતા. જોકે FY27ના પ્રથમ ત્રિમાસિકમાં આ નિકાસ ઘટીને 30,843 ટન અને 39.52 મિલિયન ડોલર રહી છે. એટલે કે જથ્થા પ્રમાણે 57% અને મૂલ્ય પ્રમાણે 44%નો ઘટાડો નોંધાયો છે.

ઇન્ડોનેશિયાની સરકારી કંપની પાસેથી મર્યાદિત ખરીદી

નિકાસકારોના જણાવ્યા અનુસાર, ઇન્ડોનેશિયાની સરકારે ત્યાંના નિયમિત આયાતકારોને ઓછી માત્રામાં આયાતની પરવાનગી આપી છે. હાલમાં ઇન્ડોનેશિયાની સરકારી કંપની PT Perusahaan Persero (PPP) ભારતની એક-બે કંપનીઓ પાસેથી જ મોટા પાયે સીંગદાણાની આયાત કરી રહી છે, જેના કારણે અન્ય ભારતીય નિકાસકારોના કારોબાર પર અસર પડી છે.

આ પણ વાંચો: Upcoming Ipo: Elevate Campuses IPO 23 સપ્ટેમ્બરથી ખુલશે, જાણો સમગ્ર વિગત

મલેશિયામાં નિકાસ વધી

બીજી તરફ ભારતની મલેશિયામાં સીંગદાણાની નિકાસમાં વધારો નોંધાયો છે. એપ્રિલથી જૂન 2026 દરમિયાન ભારતે મલેશિયામાં 18,235 ટન અને 22.59 મિલિયન ડોલરના સીંગદાણા નિકાસ કર્યા છે. ગત વર્ષના સમાન સમયગાળાની સરખામણીએ મલેશિયામાં નિકાસમાં જથ્થા પ્રમાણે 41% અને મૂલ્ય પ્રમાણે 78%નો વધારો થયો છે.

નિકાસકારોમાં ચિંતા

ઉદ્યોગના વર્તુળોના જણાવ્યા અનુસાર, કેટલાક નિકાસકારો મલેશિયા મારફતે ઇન્ડોનેશિયામાં સીંગદાણા મોકલતા હતા. જોકે તાજેતરમાં 50 ટન સીંગદાણાના વેપાર અંગે તપાસ શરૂ થતાં આ માર્ગ પણ અસરગ્રસ્ત થવાની શક્યતા છે. નિકાસકારોને આશંકા છે કે આગામી ત્રિમાસિકોમાં ભારતની સીંગદાણાની નિકાસ વધુ ઘટી શકે છે, જેના કારણે નિકાસ માટે કરાયેલા રોકાણ પર અસર પડી શકે છે.

Watch onYouTube