ભારતની વેપાર ખાધ ઘટીને $26.86 અબજ, સોનાની આયાતમાં મોટો ઘટાડો

ભારતના વિદેશ વેપાર માટે ઓગસ્ટના આંકડા રાહત આપનારા રહ્યા છે. ઓગસ્ટમાં ભારતની માલસામાનની વેપાર ખાધ ઘટીને $26.86 અબજ થઈ છે, જે એક વર્ષ અગાઉના $27.2 અબજ કરતાં ઓછી છે. મુખ્ય કારણ સોનાની આયાતમાં મોટો ઘટાડો અને નિકાસમાં મજબૂત વૃદ્ધિ છે. ઓગસ્ટમાં ભારતની માલસામાનની નિકાસ વાર્ષિક ધોરણે 26.1% વધીને $43.81 અબજ થઈ છે. બીજી તરફ આયાત 14.1% વધીને $70.76 અબજ રહી હતી.

સોનાની આયાતમાં મોટો ઘટાડો

વેપાર ખાધ ઘટાડવામાં સોનાની આયાતમાં થયેલો ઘટાડો મહત્વનો રહ્યો છે. ઓગસ્ટમાં સોનાની આયાત ઘટીને માત્ર $2.3 અબજ રહી, જે ઓગસ્ટ 2025માં $5.4 અબજ હતી. એટલે કે એક વર્ષમાં સોનાની આયાતમાં 57.7%નો ઘટાડો થયો છે. જુલાઈમાં સોનાની આયાત $4.16 અબજ રહી હતી. તહેવારોની સિઝન પહેલાં જથ્થો વધારવાને કારણે જુલાઈમાં સોનાની આયાતમાં વધારો થયો હતો.

નિકાસમાં કયા ક્ષેત્રો આગળ રહ્યા?

ભારતની નિકાસમાં એન્જિનિયરિંગ સામાન, પેટ્રોલિયમ ઉત્પાદનો, રસાયણો અને કાપડ જેવા ક્ષેત્રોએ મજબૂત કામગીરી કરી છે. અમેરિકા, યુરોપિયન યુનિયન, બ્રિક્સ દેશો અને અન્ય ઊભરતા બજારોમાંથી ભારતીય ઉત્પાદનોની માંગ રહી છે. ઓટોમોબાઇલ નિકાસમાં પણ ઓગસ્ટમાં 22.2%નો વધારો નોંધાયો છે. જોકે પેસેન્જર વાહનોની નિકાસમાં 17%નો ઘટાડો થયો હતો.

સેવાઓની નિકાસ પણ મજબૂત

માલસામાન ઉપરાંત સેવાઓની નિકાસ પણ ભારતના વિદેશ વેપારને ટેકો આપી રહી છે. ઓગસ્ટમાં સેવાઓની નિકાસ $38.87 અબજ રહી, જ્યારે સેવાઓની આયાત $21.42 અબજ હતી. પરિણામે સેવાઓમાં $17.45 અબજનો સરપ્લસ રહ્યો. માલસામાન અને સેવાઓને સાથે ગણવામાં આવે તો ઓગસ્ટમાં ભારતની કુલ નિકાસ લગભગ 25% વધીને $82.68 અબજ થઈ છે.

આ પણ વાંચો: ભારતમાં બેરોજગારી ઘટીને છેલ્લા 6 મહિનાના સૌથી નીચા સ્તરે પહોંચી, ગામડાંમાં રોજગારમાં સુધારો

ક્રૂડ ઓઈલનો ખર્ચ ચિંતાનો વિષય

બીજી તરફ, ક્રૂડ ઓઈલના વધતા ભાવ ભારત માટે પડકાર બની શકે છે. ઓગસ્ટમાં ભારતીય ક્રૂડ બાસ્કેટનો સરેરાશ ભાવ $90.19 પ્રતિ બેરલ હતો, જે જુલાઈના $82.04 કરતાં ઊંચો છે. સપ્ટેમ્બરમાં અત્યાર સુધીમાં તે $109.76 પ્રતિ બેરલ સુધી પહોંચી ગયો છે. પશ્ચિમ એશિયામાં વધતા તણાવને કારણે ક્રૂડના ભાવ ઊંચા રહે તો આગામી મહિનાઓમાં ભારતના આયાત ખર્ચ અને વેપાર ખાધ પર ફરી દબાણ આવી શકે છે.