Iran Nuclear Programmeની માહિતી આપનારને $20 મિલિયન સુધીનું ઇનામ, અમેરિકાની મોટી જાહેરાત

Iran Nuclear Programme: ઈરાનના પરમાણુ કાર્યક્રમ અંગે માહિતી મેળવવા અમેરિકા (CENTCOM)એ મોટા ઇનામની જાહેરાત કરી છે. પરમાણુ મથકો, સાધનો અને વૈજ્ઞાનિકો સહિત સંબંધિત કર્મચારીઓ વિશે માહિતી આપનારને $20 મિલિયન એટલે કે 2 કરોડ અમેરિકી ડોલર સુધીનું ઇનામ મળી શકે છે. સાથે જ માહિતી આપનારને અન્ય સ્થળે વસાવવાની સંભવિત સુવિધા પણ આપવામાં આવી શકે છે. જોકે, મહત્તમ ઇનામ મેળવવા માટે કેવી માહિતી જરૂરી છે તેની ચોક્કસ શરતો જાહેર કરવામાં આવી નથી.

અમેરિકી સૈન્યના સેન્ટ્રલ કમાન્ડે શુક્રવારે સોશિયલ મીડિયા પ્લેટફોર્મ X પર આ જાહેરાતની માહિતી આપી હતી. અમેરિકાના વિદેશ વિભાગના ‘રિવોર્ડ્સ ફોર જસ્ટિસ’ કાર્યક્રમ હેઠળ આ ઓફર કરવામાં આવી છે. તેમાં ઈરાનના પરમાણુ કાર્યક્રમ સાથે સંકળાયેલાં મથકો, સાધનો, વૈજ્ઞાનિક સમુદાયના સભ્યો તથા અન્ય કર્મચારીઓ અંગેની માહિતી આવરી લેવાઈ છે. આ મથકો સાથે સંબંધિત સાધનો અને કર્મચારીઓની હિલચાલ અંગેની માહિતી પણ કાર્યક્રમના દાયરામાં આવે છે.

‘Rewards for Justice’ કાર્યક્રમની સ્થાપના 1984માં કરવામાં આવી હતી. અમેરિકાનાં નાગરિકો અને દેશના હિતોના રક્ષણમાં મદદરૂપ બને તેવી માહિતી માટે આ કાર્યક્રમ હેઠળ નાણાકીય ઇનામ આપવામાં આવે છે. અમેરિકાના વિદેશ વિભાગે પોતાના નિવેદનમાં ઈરાન પર આંતરરાષ્ટ્રીય પરમાણુ ઊર્જા એજન્સી (IAEA) પ્રત્યેની સુરક્ષા દેખરેખ સંબંધિત જવાબદારીઓનું પાલન ન કરવાનો આરોપ મૂક્યો છે. વિભાગના જણાવ્યા અનુસાર, તેના કારણે એજન્સી ઈરાનમાં સેન્ટ્રિફ્યુજ સહિતના મહત્વના ઘટકોનું કેટલું ઉત્પાદન થાય છે અને તેનો કેટલો જથ્થો છે તેની સતત જાણકારી જાળવી શકી નથી. વિભાગે આ સ્થિતિને માહિતીની સાતત્યપૂર્ણ કડી તૂટવા તરીકે વર્ણવી છે.

આ જાહેરાત એવા સમયે થઈ છે જ્યારે અમેરિકી રાષ્ટ્રપતિ ડોનાલ્ડ ટ્રમ્પ વારંવાર દાવો કરી રહ્યા છે કે અમેરિકાના સૈન્ય હુમલાથી ઈરાનના પરમાણુ કાર્યક્રમને ભારે નુકસાન પહોંચ્યું છે. શુક્રવારે રાત્રે ફ્લોરિડાના વેસ્ટ પામ બીચમાં તેમણે કહ્યું હતું કે અમેરિકા ઈરાન પર હુમલો ન કરત તો ઇઝરાયલનું અસ્તિત્વ જોખમમાં હોત. ઈરાન પાસે પરમાણુ હથિયાર હોત તો તેણે તેનો ઉપયોગ કરીને સમગ્ર મધ્ય પૂર્વમાં વિનાશ સર્જ્યો હોત એવો પણ તેમણે દાવો કર્યો હતો.

ટ્રમ્પે યુદ્ધ સમાપ્ત કરવા માટે ઈરાન સાથે વાતચીત ચાલી રહી હોવાનું ફરી જણાવ્યું હતું. તેમના જણાવ્યા અનુસાર, ઈરાન સમજૂતી કરવા માટે ખૂબ જ ઉત્સુક છે. બીજી તરફ, ઈરાનના રાષ્ટ્રપતિ મસૂદ પેઝેશ્કિયાને મંગળવારે જણાવ્યું હતું કે તેમની સરકાર સંકટનો રાજદ્વારી ઉકેલ શોધવાના પ્રયાસો ચાલુ રાખી રહી છે.

આ પણ વાંચો: Cristiano Ronaldoના ગોલ પાછળ અબજોનો ખેલ: ફૂટબોલની ખ્યાતિમાંથી ઊભું કર્યું Business Empire

આ પણ જુઓ:

Watch onYouTube