તહેવારો પહેલાં બમ્પર ભરતી! Myntraએ કરી 26,000થી વધુ નોકરીઓની જાહેરાત

ફેસ્ટિવ સીઝન દરમિયાન વધતી ખરીદીની માંગને પહોંચી વળવા ફેશન ઈ-કોમર્સ કંપની Myntraએ પોતાની મોસમી વર્કફોર્સને વધુ મજબૂત બનાવી છે. કંપનીએ Big Fashion Festival પહેલાં 26,000થી વધુ રોજગારની તકો તૈયાર કરી છે. Myntra અનુસાર, આ સંખ્યા ગયા વર્ષની સરખામણીમાં બે ગણાથી વધુ છે. આ મોસમી ભરતીમાં ફુલફિલમેન્ટ સેન્ટર, લાસ્ટ માઈલ ડિલિવરી અને કસ્ટમર સર્વિસ સાથે જોડાયેલી ભૂમિકાઓ સામેલ છે.

મહિલાઓ અને દિવ્યાંગ લોકો પર ખાસ ફોકસ

Myntraએ જણાવ્યું કે આ વખતે મોસમી વર્કફોર્સમાં સમાવેશિતા પર ખાસ ધ્યાન આપવામાં આવ્યું છે. કંપની અનુસાર, ફુલફિલમેન્ટ સેન્ટરની કુલ વર્કફોર્સમાં મહિલાઓની ભાગીદારી 30% રહેશે. જ્યારે દિવ્યાંગ વ્યક્તિઓ માટે 350થી વધુ ભૂમિકાઓ ઉપલબ્ધ કરાવવામાં આવી છે. કંપનીનો હેતુ વધુ લોકોને રોજગાર અને આવકની તકો ઉપલબ્ધ કરાવવાનો છે.

પાંચ ફુલફિલમેન્ટ સેન્ટરમાં થશે તૈનાતી

મોસમી કર્મચારીઓને દેશના અલગ-અલગ વિસ્તારોમાંથી પસંદ કરવામાં આવશે. જેમાં ઓડિશા, કર્ણાટક, બિહાર, ઉત્તર પ્રદેશ, મધ્ય પ્રદેશ, ઝારખંડ સહિતના રાજ્યો સામેલ છે. આ કર્મચારીઓને Myntraના પાંચ ફુલફિલમેન્ટ સેન્ટરમાં તૈનાત કરવામાં આવશે. આ સેન્ટર બેંગલુરુ, મુંબઈ, કોલકાતા, બિલાસપુર અને બિનોલામાં સ્થિત છે. અહીં કર્મચારીઓ સામાનની છટણી, ગ્રેડિંગ અને પેકિંગ જેવી કામગીરી સંભાળશે. આ ઉપરાંત 8,000 ડિલિવરી પાર્ટનર અને 2,700 કસ્ટમર સર્વિસ કર્મચારીઓ પણ ફેસ્ટિવ ઓપરેશનનો ભાગ રહેશે.

કર્મચારીઓ માટે ખાસ કાર્યક્રમોની યોજના

ફેસ્ટિવ સીઝન દરમિયાન કર્મચારીઓને પ્રોત્સાહિત કરવા Myntraએ વિવિધ કાર્યક્રમોની યોજના બનાવી છે. કંપનીના જણાવ્યા અનુસાર, સેન્ટરો પર સારું પ્રદર્શન કરનારા કર્મચારીઓને SPOT Rewards અને Recognition આપવામાં આવશે. આ ઉપરાંત ટીમ ચેલેન્જ અને સેલિબ્રેશન કાર્યક્રમો પણ યોજવામાં આવશે. બિનોલા ફુલફિલમેન્ટ સેન્ટરમાં ‘She Warrior’ નામની પિચ સ્પર્ધાનું આયોજન કરવામાં આવ્યું છે, જેમાં મહિલા કર્મચારીઓના નવા વિચારોને પ્રોત્સાહન આપવામાં આવશે.

ઝડપી ડિલિવરી માટે ક્ષમતા વધારશે

Big Fashion Festival દરમિયાન ગ્રાહકોને વધુ સારો અનુભવ આપવા માટે Myntra પોતાની ફુલફિલમેન્ટ, ડિલિવરી અને કસ્ટમર સર્વિસ ક્ષમતાને મજબૂત કરી રહી છે. કંપની M-Express સેવા મારફતે યોગ્ય વિસ્તારોમાં 24 થી 48 કલાકમાં ડિલિવરીની સુવિધા પણ ઉપલબ્ધ કરાવી રહી છે. Myntraના CHRO ગોવિંદરાજ એમકેએ જણાવ્યું કે ફેસ્ટિવ સીઝન દરમિયાન હજારો લોકો ગ્રાહકોના સારા અનુભવ માટે કામ કરે છે. કંપની આ વર્ષે વધેલી મોસમી વર્કફોર્સ સાથે રોજગારની તકો અને કર્મચારીઓને સપોર્ટ આપવા પર ધ્યાન આપી રહી છે.

આ પણ વાંચો : Ola Electricના શેરને વાગી 'બ્રેક'! 4 દિવસની તેજી બાદ શેર 9% તૂટ્યો!

આ પણ જુઓ :

Watch onYouTube