કઠોળની આયાતમાં 67%નો ઉછાળો, રશિયન સંકટથી સપ્લાય ખોરવાવાની ભીતિ!

ભારતમાં કઠોળની આયાતમાં વધારો નોંધાયો છે, પરંતુ રશિયા-યુક્રેન સંઘર્ષને કારણે વૈશ્વિક સપ્લાય પર ઊભી થયેલી અસર હવે ભારતીય બજાર માટે ચિંતાનો વિષય બની શકે છે. નાણાકીય વર્ષ 2027ના એપ્રિલથી ઓગસ્ટ દરમિયાન ભારતની કઠોળની આયાત 6% વધીને 2.05 મિલિયન ટન થઈ છે. વેપારીઓના મતે આગામી મહિનાઓમાં આયાતની ગતિ ધીમી પડી શકે છે.

કઠોળની આયાત 2.05 મિલિયન ટન સુધી પહોંચી

નાણાકીય વર્ષ 2027ના એપ્રિલ-ઓગસ્ટ દરમિયાન ભારતે 2.05 મિલિયન ટન કઠોળની આયાત કરી હતી, જે અગાઉના સમાન સમયગાળાની સરખામણીએ 6% વધારે છે. આયાતનું મૂલ્ય વધીને 1.18 અબજ ડોલર થયું છે.ભારતની કઠોળની આયાત નાણાકીય વર્ષ 2026માં વાર્ષિક ધોરણે 34% ઘટીને 3.63 અબજ ડોલર રહી હતી.

મસૂર અને પીળા વટાણાની આયાતમાં મોટો વધારો

વિવિધ કઠોળની વાત કરીએ તો નાણાકીય વર્ષ 2027ના એપ્રિલ-ઓગસ્ટ દરમિયાન મસૂર અને પીળા વટાણાની આયાતમાં અગાઉના વર્ષના સમાન સમયગાળાની સરખામણીએ અનુક્રમે 200% અને 111%નો વધારો થયો છે. આ સમયગાળા દરમિયાન મસૂરની આયાત 0.56 મિલિયન ટન અને પીળા વટાણાની આયાત 0.62 મિલિયન ટન નોંધાઈ છે. ચાલુ નાણાકીય વર્ષના પ્રથમ પાંચ મહિનામાં તુવેરની આયાત 10% વધીને 0.35 મિલિયન ટન થઈ છે, જ્યારે આ જ સમયગાળા દરમિયાન અડદની આયાત 9% ઘટીને 0.27 મિલિયન ટન રહી છે.

રશિયા-યુક્રેન સંઘર્ષથી પુરવઠા પર અસર

વેપારીઓના મત મુજબ આગામી થોડા મહિનામાં કઠોળની આયાત ધીમી પડી શકે છે. રશિયા-યુક્રેન સંઘર્ષને કારણે રશિયાથી પુરવઠો ખોરવાતા કેનેડાથી મંગાવવામાં આવતા પીળા વટાણા અને મસૂરના ભાવમાં છેલ્લા મહિનામાં વધારો થયો છે. ભારત વૈશ્વિક કઠોળની આયાતમાં આશરે 14%થી 15% હિસ્સો ધરાવે છે, જ્યારે વૈશ્વિક કઠોળના વપરાશમાં તેનો હિસ્સો લગભગ 27% છે. ભારત મુખ્યત્વે મસૂર, તુવેર, પીળા વટાણા, અડદ, મગ અને ચણાની આયાત કરે છે. ભારતના મુખ્ય કઠોળ સપ્લાયર દેશોમાં કેનેડા, ઓસ્ટ્રેલિયા, મ્યાનમાર, રશિયા, અમેરિકા, મોઝામ્બિક અને મલાવીનો સમાવેશ થાય છે.

સ્થાનિક ઉત્પાદન અને બફર સ્ટોક પર પણ નજર

ભારત વિશ્વમાં કઠોળનો સૌથી મોટો ઉત્પાદક દેશ છે અને વૈશ્વિક ઉત્પાદનમાં તેનો હિસ્સો આશરે 25% છે. જોકે, વિશાળ શાકાહારી વસ્તીને કારણે સ્થાનિક માંગ પૂરી કરવા ભારતને વધારાની આયાત કરવી પડે છે. ભારતમાં કઠોળનો સ્થાનિક બફર સ્ટોક રેકોર્ડ 4.5 મિલિયન ટન છે. પૂરતી વૈશ્વિક ઉપલબ્ધતા અને બફર સ્ટોકને ધ્યાનમાં રાખીને સરકાર હાલની આયાત જકાત ઘટાડે તેવી શક્યતા નથી. નાણાકીય વર્ષ 2027 સુધી પીળા વટાણા પર 30% ડ્યૂટી અને મસૂર પર 10% ડ્યૂટી રાખવામાં આવી છે. દરમિયાન ખરીફ કઠોળનું વાવેતર વિસ્તાર વધીને 11.68 મિલિયન હેક્ટર સુધી પહોંચ્યું છે, જે વાર્ષિક ધોરણે 1.42% વધારે છે. જોકે, અસમાન અથવા અપૂરતા વરસાદને કારણે મહારાષ્ટ્ર અને કર્ણાટકના કેટલાક વિસ્તારોમાં પાકને અસર થઈ છે.

આ પણ વાંચો : અમદાવાદીઓ માટે ખુશખબર! કોટેશ્વરથી અમદાવાદ એરપોર્ટ સુધી દોડશે મેટ્રો

આ પણ જુઓ:

Watch onYouTube