દર્દીઓને મોટી રાહત: 137 કેન્સરની દવાઓના ભાવમાં 96% સુધીનો ઘટાડો, 9 નવેમ્બરથી લાગુ

Cancer Medicine Prices: કેન્સર જેવી ગંભીર બીમારીનો સામનો કરી રહેલા દર્દીઓ અને તેમના પરિવારો માટે એક ખૂબ જ રાહતના સમાચાર સામે આવ્યા છે. કેન્દ્ર સરકારના રસાયણ અને ખાતર મંત્રાલય દ્વારા તાજેતરમાં એક મોટો અને ઐતિહાસિક નિર્ણય લેવામાં આવ્યો છે. આ નિર્ણય અંતર્ગત રાષ્ટ્રીય ફાર્માસ્યુટિકલ પ્રાઇસિંગ ઓથોરિટી (NPPA) દ્વારા કેન્સરની સારવારમાં વપરાતી કુલ 137 જેટલી જીવનરક્ષક દવાઓના વેપાર માર્જિન પર મર્યાદા નક્કી કરી દેવામાં આવી છે. આ નવા સુધારેલા અને ઘટાડેલા દરો આગામી 9 નવેમ્બરથી સમગ્ર દેશમાં સત્તાવાર રીતે અમલમાં આવી જશે.

પ્રાપ્ત માહિતી અનુસાર, 17 ઓક્ટોબરના રોજ ડિરેક્ટોરેટ જનરલ ઓફ હેલ્થ સર્વિસીસ (DGHS) ના નેતૃત્વ હેઠળ નિષ્ણાતોની એક ખાસ સમિતિની રચના કરવામાં આવી હતી. આ સમિતિએ દવાઓના ભાવને તર્કસંગત બનાવવા માટે કેટલાક મહત્ત્વપૂર્ણ સૂચનો કર્યા હતા. આ ભલામણોનો સ્વીકાર કરીને સરકારે કિંમતો પર મોટો કાપ મૂક્યો છે. આ પગલાને કારણે ભારતના સામાન્ય નાગરિકોને વાર્ષિક આશરે 3502.31 કરોડ રૂપિયાની જંગી બચત થવાનો અંદાજ છે.

આ નિર્ણય બાદ ફાર્માસ્યુટિકલ ક્ષેત્રે મોટો બદલાવ જોવા મળ્યો છે. અત્યાર સુધીમાં દેશની 76 જેટલી ફાર્મા કંપનીઓએ 121 મુખ્ય દવાઓના 1225 ફોર્મ્યુલેશન માટે તેમની નવી મહત્તમ છૂટક કિંમત (MRP) સરકાર સમક્ષ રજૂ કરી દીધી છે. આ પૈકી 1031 ફોર્મ્યુલેશનના ભાવમાં સીધો ઘટાડો નોંધાયો છે. બજારમાં ઉપલબ્ધ 600 થી વધુ જાણીતી બ્રાન્ડ્સની દવાઓના ભાવ 50 ટકા કરતા પણ વધુ ઘટી ગયા છે. અમુક દવાઓમાં તો આ ઘટાડો 96.45 ટકા સુધીનો નોંધાયો છે. ભારતમાં હજુ જે 10 થી 15 નવી દવાઓ લોન્ચ થવાની બાકી છે, તેમના પર પણ બજારમાં મુકાતાની સાથે જ ટ્રેડ માર્જિન રેશનલાઇઝેશન (TMR) ની નીતિ લાગુ પડશે.

કેન્સરની સારવારને સસ્તી બનાવતા આ નિર્ણયથી કઈ દવા કેટલી સસ્તી થઈ તેના કેટલાક સીધા ઉદાહરણો નીચે મુજબ છે:

પાલ્બોપ્રોલ (Palbociclib 125 mg): RPG લાઇફ સાયન્સની સ્તન કેન્સરની આ કેપ્સ્યુલની કિંમત 40421.33 રૂપિયાથી ઘટાડીને માત્ર 2720 રૂપિયા કરી દેવામાં આવી છે.

એબિરોન (Abiraterone Acetate 250 mg): આર્વિનકેર ફાર્માની પ્રોસ્ટેટ કેન્સરની ટેબ્લેટ હવે 41250 રૂપિયાને બદલે 3218.23 રૂપિયામાં મળશે.

બ્રિક્સ્ટા (Bevacizumab 100 mg): ઝાયડસ લાઇફસાયન્સની ફેફસાં અને સર્વાઇકલ કેન્સરની દવાની કિંમત 25995 રૂપિયાથી ઘટીને 3318 રૂપિયા થઈ ગઈ છે.

ડેનોસ્ટેઓરેલ (Denosumab 60 mg): રિલાયન્સ લાઇફ સાયન્સની આ દવાનો ભાવ 24955 રૂપિયાથી ઘટીને 6240 રૂપિયા થયો છે.

લુપીહર્બ 2 (Pertuzumab 420 mg): લ્યુપિન લિમિટેડના સ્તન કેન્સરના ઇન્જેક્શનની કિંમત જે પહેલા 83520 રૂપિયા હતી, તે હવે ઘટાડીને 37358.30 રૂપિયા કરવામાં આવી છે.

નવા નિયમો મુજબ, તમામ દવા વિક્રેતાઓ, ડીલરો અને હોસ્પિટલોએ તેમના પરિસરમાં તેમજ તેમની સત્તાવાર વેબસાઇટ પર આ નવા સુધારેલા ભાવો ગ્રાહકોને સ્પષ્ટ દેખાય તે રીતે દર્શાવવા ફરજિયાત છે. આ નિયમોનું કડક પાલન કરાવવાની જવાબદારી દરેક રાજ્યના ડ્રગ કંટ્રોલર્સને સોંપવામાં આવી છે. ગ્રાહકો અને દર્દીઓના સગાઓ NPPA ના ઓનલાઇન પોર્ટલ અથવા 'ફાર્મા સહી દામ' મોબાઇલ એપ્લિકેશન દ્વારા આ નવી કિંમતોની ખરાઈ કરી શકે છે. જો કોઈ વેપારી વધુ ભાવ વસૂલે તો નિયુક્ત કરેલા હેલ્પલાઇન નંબરો પર તેની ફરિયાદ પણ કરી શકાશે.

આ પણ વાંચોઃ દરેક શેર પર થશે ₹90 કમાણી, આ કંપનીએ કરી મોટી જાહેરાત; 12 નવેમ્બર પહેલાં રાખવું પડશે આ ધ્યાન

આ પણ જુઓ

Watch onYouTube