Ravi Pushya Nakshatra: સોનું, ગાડી કે નવું ઘર ખરીદવાનું છે? 1 નવેમ્બરે બની રહ્યો છે આ ખાસ શુભ સંયોગ

Ravi Pushya Nakshatra: ધનતેરસ પર સોનું-ચાંદી ખરીદવાની પરંપરા છે, પરંતુ 2026માં ખરીદી માટે 6 નવેમ્બર સુધી રાહ જોવી જરૂરી નથી. 31 ઑક્ટોબરથી જ પુષ્ય નક્ષત્ર શરૂ થઈ ગયું છે અને 1 નવેમ્બરે રવિવાર સાથે પુષ્ય નક્ષત્રનો સંયોગ બનવાથી રવિ પુષ્ય યોગ સર્જાશે. જ્યોતિષ પરંપરા મુજબ આ દિવસોમાં સોનું, ચાંદી, જ્વેલરી અને અન્ય કિંમતી વસ્તુઓ ખરીદવી શુભ માનવામાં આવે છે.

કેમ ખાસ છે રવિ પુષ્ય નક્ષત્ર?

રવિવારનો સ્વામી સૂર્ય છે. જ્યોતિષશાસ્ત્રમાં સૂર્યને માન-સન્માન, પ્રતિષ્ઠા, નેતૃત્વ અને આત્મવિશ્વાસ સાથે જોડવામાં આવે છે. બીજી તરફ, પુષ્ય નક્ષત્રને સ્થિરતા, સમૃદ્ધિ અને શુભતા સાથે સંબંધિત માનવામાં આવે છે. આ બંનેનો સંયોગ બનતો હોવાથી રવિ પુષ્ય નક્ષત્રને ખરીદી અને શુભ કાર્યો માટે વિશેષ મહત્વ આપવામાં આવે છે. વેપારીઓ આ દિવસે નવા ચોપડા અથવા બહી ખાતાની શરૂઆત પણ કરે છે.

ઘર, પ્લોટથી લઈને ગાડી અને જ્વેલરી સુધી ખરીદી

1 નવેમ્બર 2026ના રોજ રવિવારના દિવસે પુષ્ય નક્ષત્રનો દુર્લભ સંયોગ બની રહ્યો છે, જેને જ્યોતિષશાસ્ત્રમાં અત્યંત પવિત્ર અને શુભ માનવામાં આવે છે. રવિવાર અને પુષ્ય નક્ષત્રના આ મિલનને 'રવિ પુષ્ય યોગ' કહેવામાં આવે છે. એવી માન્યતા છે કે આ શુભ યોગમાં સોનું, ચાંદી, જ્વેલરી, વાહન, પ્રોપર્ટી કે અન્ય કોઈપણ મૂલ્યવાન ચીજવસ્તુઓની ખરીદી કરવાથી ઘરમાં સુખ, સમૃદ્ધિ અને ધનમાં વધારો થાય છે. આ જ કારણ છે કે ઘણા લોકો ધનતેરસની રાહ જોયા વગર રવિ પુષ્ય યોગમાં જ ખરીદી કરવાનું વધુ પસંદ કરે છે. પંચાગ અનુસાર, 1 નવેમ્બર 2026ના રોજ આ યોગ સવારે 6:18 વાગ્યાથી શરૂ થઈને 2 નવેમ્બરના રોજ સવારે 4:30 વાગ્યા સુધી રહેશે. આ સમયગાળા દરમિયાન સોના-ચાંદીની ખરીદી કરવી ખૂબ જ ફળદાયી સાબિત થઈ શકે છે. જો તમે ધનતેરસ 2026 પહેલાં સોનું કે ચાંદી ખરીદવાનું આયોજન કરી રહ્યા હોવ, તો 1 નવેમ્બરનો આ રવિ પુષ્ય યોગ તમારા માટે સોનેરી તક સાબિત થઈ શકે છે.

સોનું કે ચાંદી, શું ખરીદવું?

સોનામાં સામાન્ય રીતે જ્વેલરી, સિક્કા અને બારની ખરીદી થાય છે. જ્યારે ધનતેરસ દરમિયાન ચાંદીના સિક્કા, વાસણો, દીવા, મૂર્તિઓ અને જ્વેલરી પણ લોકપ્રિય છે. કઈ ધાતુ ખરીદવી તે બજેટ, ઉપયોગ અને પરિવારની પરંપરા પર આધાર રાખે છે.

ખરીદી પહેલાં માત્ર શુભ મુહૂર્ત નહીં, આ બાબતો પણ તપાસો

શુભ દિવસ હોવા છતાં ખરીદી કરતાં પહેલાં તેની ગુણવત્તા અને કિંમત તપાસવી જરૂરી છે.

સોનામાં:-

• કેરેટ અને શુદ્ધતા તપાસો
• BIS હોલમાર્ક અને HUID તપાસો
• મેકિંગ ચાર્જની સરખામણી કરો
• તે દિવસનો સોનાનો ભાવ તપાસો
• વજન, શુદ્ધતા અને ચાર્જ સાથેનું બિલ લો

ચાંદીમાં:-

• શુદ્ધતા અને વજન તપાસો
• હોલમાર્કિંગ ઉપલબ્ધ હોય તો તપાસો
• સિલ્વર રેટ અને અન્ય ચાર્જની સરખામણી કરો
• સિક્કા, મૂર્તિ કે વાસણમાં નેટ ચાંદીનું વજન પૂછો
• ખરીદીનું બિલ સાચવી રાખો

આ પણ વાંચો : દિવાળીમાં વતન જવાની ચિંતા છોડો! ST દોડાવશે 1,150 વધારાની ટ્રિપ

આ પણ જુઓ:

Watch onYouTube