સુરતની રિસાયક્લિંગ ક્ષેત્રની કંપની JB Ecotexએ ₹400 કરોડનો DRHP ફાઇલ કર્યો

ભારતમાં રિસાયક્લિંગ અને ગ્રીન મેન્યુફેક્ચરિંગ ક્ષેત્રમાં ઝડપથી વિસ્તરણ કરી રહેલી સુરત સ્થિત કંપની JB Ecotex હવે શેરબજારમાં પ્રવેશવાની તૈયારી કરી રહી છે. કંપનીએ પ્રાથમિક જાહેર ભરણા (IPO) માટે માર્કેટ રેગ્યુલેટર સિક્યોરિટીઝ એન્ડ એક્સચેન્જ બોર્ડ ઓફ ઇન્ડિયા (SEBI) પાસે ડ્રાફ્ટ રેડ હેરિંગ પ્રોસ્પેક્ટસ (DRHP) ફાઇલ કર્યો છે. કંપની આ IPO દ્વારા ₹400 કરોડ સુધીની નવી મૂડી એકત્ર કરવાની યોજના ધરાવે છે, જ્યારે ઓફર ફોર સેલ (OFS) મારફતે પ્રમોટરો પોતાના કેટલાક શેર વેચશે.

JB Ecotexનો પ્રસ્તાવિત IPO ₹5ના ફેસ વેલ્યૂ ધરાવતા શેરો સાથે આવશે. IPOમાં ₹400 કરોડ સુધીનો ફ્રેશ ઈશ્યૂ અને 12.95 મિલિયન ઇક્વિટી શેરનું ઓફર ફોર સેલ સામેલ હશે. OFS હેઠળ કંપનીના પ્રમોટરો પોતાના હિસ્સાના કેટલાક શેર વેચશે. કંપની IPO પહેલાં ₹80 કરોડ સુધીના પ્રી-IPO પ્લેસમેન્ટ પર પણ વિચાર કરી શકે છે. જો આ પ્લેસમેન્ટ પૂર્ણ થશે તો તેમાંથી મળેલી રકમ ફ્રેશ ઈશ્યૂના કદમાંથી ઘટાડવામાં આવશે.

DRHP અનુસાર, ફ્રેશ ઈશ્યૂમાંથી મળનારી રકમમાંથી આશરે ₹320 કરોડનો ઉપયોગ કંપની અને તેની મહત્વપૂર્ણ સબસિડિયરી દ્વારા લેવામાં આવેલા દેવાની ચુકવણી અથવા પ્રી-પેમેન્ટ માટે કરવામાં આવશે. બાકીની રકમનો ઉપયોગ સામાન્ય કોર્પોરેટ હેતુઓ માટે કરવામાં આવશે. IPO બુક બિલ્ડિંગ પ્રક્રિયા દ્વારા લાવવામાં આવશે. તેમાં નેટ ઓફરના 50% સુધીના શેર ક્વોલિફાઇડ ઇન્સ્ટિટ્યૂશનલ બાયર્સ (QIBs) માટે અનામત રહેશે. જ્યારે ઓછામાં ઓછા 15% શેર નોન-ઇન્સ્ટિટ્યૂશનલ રોકાણકારો અને 35% શેર રિટેલ રોકાણકારો માટે ફાળવવામાં આવશે.

JB Ecotexની સ્થાપના વર્ષ 2012માં કરવામાં આવી હતી. કંપની PET એટલે કે પોલિઇથિલિન ટેરેફ્થાલેટ વેસ્ટના રિસાયક્લિંગના ક્ષેત્રમાં કાર્યરત છે. 31 ઓગસ્ટ 2026 સુધીની ઇન્સ્ટોલ્ડ ક્ષમતાના આધારે કંપની ભારતની બીજી સૌથી મોટી PET રિસાયક્લિંગ કંપની છે. કંપની જૂની PET બોટલ અને અન્ય PET કચરાને રિસાયકલ કરીને રિસાયકલ્ડ PET પ્રોડક્ટ્સનું ઉત્પાદન કરે છે. આ પ્રોડક્ટ્સનો ઉપયોગ મુખ્યત્વે ટેક્સટાઇલ ઉદ્યોગ, ફૂડ ગ્રેડ પેકેજિંગ અને અન્ય પેકેજિંગ ક્ષેત્રોમાં થાય છે.

1Lattice Report અનુસાર, JB Ecotex ભારતની એવી એકમાત્ર કંપની છે જેની પાસે મેકેનિકલ અને કેમિકલ બંને પ્રકારની PET રિસાયક્લિંગ ક્ષમતા ઉપલબ્ધ છે. કંપની દેશની બે એવી કંપનીઓમાં સામેલ છે જે વ્યાવસાયિક સ્તરે કેમિકલ રિસાયક્લિંગ ક્ષમતા ધરાવે છે. સુરતના ધામડોદ વિસ્તારમાં કંપનીના બે મેન્યુફેક્ચરિંગ પ્લાન્ટ કાર્યરત છે. તેમાં JB Ecotex Manufacturing Facility અને JB rPET Manufacturing Facilityનો સમાવેશ થાય છે.

કંપની રિન્યુએબલ એનર્જીનો ઉપયોગ વધારવા પર પણ ધ્યાન આપી રહી છે. 31 ઓગસ્ટ 2026 સુધી JB Ecotex પાસે 7.20 મેગાવોટની કેપ્ટિવ વિન્ડ પાવર ક્ષમતા અને 6.60 મેગાવોટની કેપ્ટિવ સોલાર પાવર ક્ષમતા હતી. FY26 દરમિયાન કંપનીની કુલ વીજ વપરાશમાં 63.52% હિસ્સો કેપ્ટિવ પાવર અને કોન્ટ્રાક્ટેડ રિન્યુએબલ એનર્જી સ્ત્રોતોમાંથી આવ્યો હતો. નાણાકીય રીતે પણ કંપનીએ વૃદ્ધિ નોંધાવી છે. કંપનીની ઓપરેશનલ આવક FY24ના ₹527.3 કરોડથી વધીને FY26માં ₹827.6 કરોડ થઈ છે. જ્યારે નફો FY24ના ₹21.1 કરોડથી વધીને FY26માં ₹22.4 કરોડ થયો છે.

આ પણ વાંચો: October 2026 Rules changes: બેંકિંગથી ટેક્સ સુધી 10 મોટા નિયમોમાં ફેરફાર, જાણો શું બદલાશે

આ પણ જુઓ:

Watch onYouTube