India-US Trade Deal: ભારતીય સામાનને અમેરિકામાં મળશે મોટી રાહત? પિયુષ ગોયલે આપ્યો મોટો સંકેત

ભારત અને અમેરિકા વચ્ચે ટ્રેડ એગ્રિમન્ટને લઈને ચાલી રહેલી ચર્ચામાં હવે વધુ સ્પષ્ટતા આવી છે. પિયુષ ગોયલે જણાવ્યું કે અમેરિકન માર્કેટમાં ભારતીય ઉત્પાદનોને બીજા સ્પર્ધક દેશોની સરખામણીએ વધુ સારી શરતો પર પ્રવેશ આપવાની બાબતે બંને દેશો વચ્ચે પહેલેથી જ સમજ બની ચૂકી છે. તેમના જણાવ્યા મુજબ આ મુદ્દે સહમતિ ત્યારે જ બની હતી જ્યારે અમેરિકાના રાષ્ટ્રપતિ ડોનાલ્ડ ટ્રમ્પ અને વડાપ્રધાન નરેન્દ્ર મોદીએ થોડા મહિના પહેલા વ્યાપક ટ્રેડ એગ્રિમેન્ટના ફ્રેમવર્કની જાહેરાત કરી હતી.

ભારતીય સામાન પર ઓછો ટેરિફ લાગી શકે

કેન્દ્રીય મંત્રી પિયુષ ગોયલના નિવેદનનો અર્થ એ છે કે અમેરિકન માર્કેટમાં ભારતીય માલ પર બીજા સ્પર્ધક દેશોની સરખામણીએ ઓછો આયાત ટેરિફ લાગવાની શક્યતા છે. જોકે આ લાભ કેટલો મોટો હશે તે હજી નક્કી નથી. બંને દેશો અંતિમ ટેરિફ સ્ટ્રક્ચર પર સહમત થયા પછી જ ચિત્ર સ્પષ્ટ થશે. એટલે હાલ દિશા સ્પષ્ટ છે, પરંતુ વાસ્તવિક ટેરિફ લાભ કેટલો મળશે તે અંતિમ કરાર પર આધારિત રહેશે.

પહેલા તબક્કાની વાતચીત હજી ચાલુ

ભારત અને અમેરિકાએ ફેબ્રુઆરીમાં દ્વિપક્ષીય વેપાર કરાર એટલે કે BTAના પહેલા તબક્કાનું ફ્રેમવર્ક તૈયાર કર્યું હતું. આ એગ્રિમેન્ટ પર પહેલા સહી થવાની અપેક્ષા હતી, પરંતુ અમેરિકાની ટેરિફ પોલિસીમાં બદલાવ આવતા ચર્ચા આગળ ધકેલાઈ હતી. હવે બંને દેશો પહેલા તબક્કાને ફાઈનલ કરવા માટે ફરી વાતચીત કરી રહ્યા છે. સરકારી અધિકારીના જણાવ્યા મુજબ બંને પક્ષો ચાલુ નાણાકીય વર્ષના અંત સુધી પહેલા તબક્કાને પૂર્ણ કરવાની દિશામાં કામ કરી રહ્યા છે.

US ટેરિફ પોલિસીમાં ફેરફારથી ચર્ચા બદલાઈ

ભારત-US ટ્રેડ એગ્રિમેન્ટની વાતચીત દરમિયાન અમેરિકાની ટેરિફ સિસ્ટમમાં પણ બદલાવ આવ્યો છે. અમેરિકન સુપ્રીમ કોર્ટે ડોનાલ્ડ ટ્રમ્પના રેસિપ્રોકલ ટેરિફ રદ કર્યા બાદ અમેરિકન વહીવટીતંત્ર હવે ટ્રેડ એક્ટની જોગવાઈઓનો ઉપયોગ કરીને નવી ટેરિફ ફ્રેમવર્ક તૈયાર કરી રહ્યું છે. તેના કારણે ભારત અને અમેરિકા વચ્ચે ચાલી રહેલી વેપાર વાટાઘાટોમાં ટેરિફ સ્ટ્રક્ચરને ફરીથી ગોઠવવાનો મુદ્દો મહત્વનો બની ગયો છે.

હવે સૌથી મહત્વની બાબત શું?

હાલ સૌથી મહત્વની બાબત ફાઈનલ ટેરિફ સ્ટ્રક્ચર છે. પિયુષ ગોયલે સ્પષ્ટ કર્યું છે કે ભારતીય સામાનને US માર્કેટમાં સ્પર્ધાત્મક લાભ આપવાની બાબતે સહમતિ થઈ ચૂકી છે, પરંતુ ચોક્કસ લાભ કેટલો હશે તે બંને દેશો અંતે કયા ટેરિફ રેટ નક્કી કરે છે તેના પર રહેશે. આથી હવે બજાર અને નિકાસકારોની નજર ટ્રેડ એગ્રિમેન્ટના પહેલા તબક્કાની ફાઈનલ ટર્મ પર રહેશે.

આ પણ જુઓ

Watch onYouTube