મિડલ ઈસ્ટમાં મોટો વળાંક: ટ્રમ્પે કહ્યું ઈરાન સાથે યુદ્ધ પૂરું, પણ ઈરાનની 7 શરતોએ વધાર્યું ટેન્શન

US Iran US Conflict: તાજેતરમાં યોજાયેલી મધ્યવર્તી ચૂંટણીઓમાં હારનો સામનો કર્યા પછી, અમેરિકન રાષ્ટ્રપતિ ડોનાલ્ડ ટ્રમ્પના વલણમાં નરમાશ જોવા મળી રહી છે. તેમણે એક મોટી જાહેરાત કરતા જણાવ્યું છે કે અમેરિકા અને ઈરાન વચ્ચે ચાલી રહેલું યુદ્ધ હવે અસરકારક રીતે સમાપ્ત થઈ ગયું છે. અમેરિકા હવે પશ્ચિમ એશિયામાં શાંતિ અને યથાસ્થિતિ જાળવી રાખવા માંગે છે અને હાલમાં કોઈ લશ્કરી કાર્યવાહીની જરૂર જણાતી નથી. જોકે, આ શાંતિના પ્રયાસો વચ્ચે ઈરાને અમેરિકા સમક્ષ પોતાની 7 આકરી શરતો મૂકીને શરણાગતિ સ્વીકારવાની ચેતવણી આપી દીધી છે.

વ્હાઇટ હાઉસમાં મહત્વપૂર્ણ મુલાકાત

સોમવારે વ્હાઇટ હાઉસ ખાતે રાષ્ટ્રપતિ ટ્રમ્પે કતારના વડા પ્રધાન શેખ મોહમ્મદ બિન અબ્દુલરહેમાન અલ થાની સાથે મુલાકાત કરી હતી. આ બેઠક પૂર્ણ થયા બાદ યોજાયેલી મીડિયા બ્રીફિંગમાં ટ્રમ્પે સ્પષ્ટ કર્યું કે ઈરાન સાથેનો લશ્કરી સંઘર્ષ હવે પૂર્ણ થઈ ગયો છે. તેમણે દાવો કર્યો હતો કે અમેરિકન સૈન્યની કાર્યવાહીથી ઈરાનની તાકાત નોંધપાત્ર રીતે નબળી પડી ચૂકી છે અને હવે ઈરાન વાટાઘાટોના ટેબલ પર આવી રહ્યું છે. છતાં પણ, ભવિષ્યમાં જો પરિસ્થિતિ બગડે તો યુએસ સૈન્ય કોઈપણ પ્રકારની કાર્યવાહી કરવા માટે સંપૂર્ણપણે સજ્જ છે.

ઈરાનનો અમેરિકાને જડબાતોડ જવાબ

બીજી તરફ, ઈરાને અમેરિકાના આ દાવાઓને સંપૂર્ણપણે ફગાવી દીધા છે. ઈરાનની સુપ્રીમ નેશનલ સિક્યુરિટી કાઉન્સિલના સેક્રેટરી મેજર જનરલ મોહસેન રેઝાઈએ સ્પષ્ટતા કરી છે કે અમેરિકા સાથે કોઈ જ વાટાઘાટો ચાલી રહી નથી. તેમણે વોશિંગ્ટન પર કાલ્પનિક વાતો ફેલાવવાનો આરોપ લગાવ્યો હતો અને કહ્યું હતું કે અમેરિકાએ પશ્ચિમ એશિયાની નવી પરિસ્થિતિને સ્વીકારીને ઈરાનની શરતો સામે શરણાગતિ સ્વીકારવી જ પડશે.

ઈરાને અમેરિકા સમક્ષ રજૂ કરેલી 7 આકરી શરતો:

તમામ મોરચે ચાલી રહેલા લશ્કરી સંઘર્ષનો તાત્કાલિક અંત લાવવામાં આવે.

હોર્મુઝ સ્ટ્રેટ (સમુદ્રધુની) પરથી યુએસ નૌકાદળની નાકાબંધી સંપૂર્ણપણે દૂર કરવામાં આવે.

હોર્મુઝ સ્ટ્રેટમાં વેપારી જહાજો માટેની શિપિંગ લાઈન તાત્કાલિક ધોરણે ફરીથી ખોલવામાં આવે.

ઈરાન પર અમેરિકા દ્વારા લાદવામાં આવેલા તમામ આર્થિક પ્રતિબંધો હટાવી લેવામાં આવે.

વિદેશી બેંકો અને સંસ્થાઓમાં રોકી રાખવામાં આવેલી ઈરાનની અબજો ડોલરની સંપત્તિઓને મુક્ત કરવામાં આવે.

ઈરાનની આંતરિક બાબતોમાં અમેરિકાની કોઈપણ પ્રકારની દખલગીરી કે હસ્તક્ષેપનો અંત આવે.

આ યુદ્ધ દરમિયાન ઈરાનને થયેલા વ્યાપક નુકસાન માટે અમેરિકા યોગ્ય વળતર ચૂકવે.

પરમાણુ કાર્યક્રમ અને અમેરિકાની તૈયારી

અમેરિકાનો મુખ્ય ઉદ્દેશ્ય એ સુનિશ્ચિત કરવાનો છે કે ઈરાન કોઈપણ સંજોગોમાં પરમાણુ શસ્ત્રો ન બનાવી શકે. ટ્રમ્પના મતે, ઈરાનના પરમાણુ કાર્યક્રમ પર લગામ કસતો કોઈ નવો કરાર થાય તે અત્યારની અમેરિકાની સૌથી મોટી પ્રાથમિકતા છે. કતાર, સાઉદી અરેબિયા, યુએઈ (UAE), બહેરીન અને કુવૈત જેવા પશ્ચિમ એશિયાના મિત્ર દેશો પણ આ યથાસ્થિતિ જળવાઈ રહે તેનું સમર્થન કરી રહ્યા છે. યુદ્ધ સમાપ્ત થવાના સંકેતો ભલે મળ્યા હોય, પરંતુ અમેરિકાએ હજુ સુધી ઈરાની બંદરો પર લગાવેલી નૌકાદળની નાકાબંધી હટાવી નથી. યુએસ સૈન્ય હજુ પણ માલસામાનની હેરફેર રોકવા માટે બંદરો પર ચાંપપતી નજર રાખી રહ્યું છે.

નોંધનીય છે કે ગયા અઠવાડિયે જ અમેરિકી સૈન્યએ ઈરાનની હવાઈ સંરક્ષણ પ્રણાલીઓને નિશાન બનાવીને કેટલાક મર્યાદિત હુમલાઓ કર્યા હતા. શનિવારે પણ એક વાણિજ્યિક જહાજને નિશાન બનાવવામાં આવ્યું હતું, જેના પર નાકાબંધી તોડવાનો આરોપ હતો. ટ્રમ્પના આ નિવેદનથી બંને દેશો વચ્ચેનો લશ્કરી તણાવ ચોક્કસપણે ઓછો થયો છે, પરંતુ જ્યાં સુધી ઈરાનની 7 શરતો, અમેરિકાની નાકાબંધી અને પરમાણુ કાર્યક્રમ મુદ્દે કોઈ સત્તાવાર અને ઠોસ કરાર નહીં થાય, ત્યાં સુધી પરિસ્થિતિ ગમે ત્યારે બદલાઈ શકે છે.

આ પણ વાંચોઃ પેન્શનરો સાવધાન: 30 નવેમ્બર પહેલા આ કામ નહીં કરો તો ડિસેમ્બરથી પેન્શન બંધ!

આ પણ જુઓ

Watch onYouTube