Crude oil price : ક્રૂડ ઓઈલ 108 ડોલરની સપાટી વટાવી ચાર મહિનાની ટોચે

Crude oil price : પશ્ચિમ એશિયામાં યુદ્ધની સ્થિતિ વધુ વણસતા શુક્રવારે બ્રેન્ટ ક્રૂડ ઓઈલ પ્રાઈસ ઉછળીને પ્રતિ બેરલ 108.77 ડોલરની સપાટીએ ચાર મહિનાની ટોચે પહોંચ્યો હતો. અમેરિકન પ્રમુખ ડોનાલ્ડ ટ્રમ્પે અમેરિકામાં મધ્યવર્તી ચૂંટણી પર વિપરિત અસર છતાં ઈરાન સામે યુદ્ધથી તેમને કોઈ ખેદ નહીં હોવાનું નિવેદન કરતાં વૈશ્વિક સ્તરે યુદ્ધની અનિશ્ચિતતા વધી છે. પશ્ચિમ એશિયામાં યુદ્ધના કારણે ભારતના અર્થતંત્ર પર ઊંચા એનર્જી ભાવ, ફુગાવો અને બાહ્ય પરિબળોની વિપરિત અસરે ચિંતા વધારી છે.

હોર્મુઝની ખાડીમાં પૂર્ણ સ્તરના સીધા યુદ્ધના આશંકા

પશ્ચિમ એશિયામાં યુદ્ધની સ્થિતિ ખૂબ જ ગંભીરત તબક્કામાં પ્રવેશી છે. અમેરિકા અને ઈરાન વચ્ચે ફરી એક વખત પૂર્ણ સ્તરનું સીધું યુદ્ધ શરૂ થવાની આશંકા વ્યક્ત થઈ રહી છે. હોર્મુઝની ખાડીમાં બંને દેશો વચ્ચે ઘર્ષણ વધતા વૈશ્વિક એનર્જી કોરીડોર્સ પર ક્રૂડ ઓઈલ અને ગેસનું પરિવહન ખોરવાઈ ગયા છે. આ સાથે ખાડી દેશોમાં સૈન્ય મોબિલાઈઝનના પગલે ક્રૂડ ઓઈલના ભાવ પર વધુ દબાણ સર્જાયું છે.

મે મહિનામાં ક્રૂડ ઓઈલ વર્તમાન સ્તરે હતું

યુદ્ધની અનિશ્ચિતતાની આ સ્થિતિ વચ્ચે ક્રૂડ ઓઈલ પ્રતિ બેરલ 108.77 ડોલરના સ્તરે ચાર મહીનાની ટોચે પહોંચ્યું હતું. જોકે, આ લખાય છે ત્યારે બ્રેન્ટ ક્રૂડ પ્રતિ બેરલ 107.75 ડોલરે ટ્રેડ થઈ રહ્યું છે. ગયા સપ્તાહે એનર્જી સપ્લાયની ચિંતા અને મહત્વના એનર્જી કોરિડોર્સમાં સ્થિરતાની ચિંતા વચ્ચે બ્રેન્ટ ક્રૂડ 12 ટકાથી વધુ ઉછળ્યું હતું. વૈશ્વિક સ્તરે તણાવજનક સ્થિતિના કારણે ક્રૂડ ઓઈલમાં ફરી એક વખત ઊછાળો જોવા મળી રહ્યો છે. અગાઉ મે મહિનામાં ક્રૂડ ઓઈલ આ સ્તરે પહોંચ્યું હતું. જોકે, પાછળથી અમેરિકા અને ઈરાન વચ્ચે શાંતિની આશા અને ભૂ-રાજકીય તણાવ ઘટવાના કારણે ક્રૂડ ઓઈલ પ્રતિ બેરલ 80 ડોલરથી નીચે જતું રહ્યું હતું.

હવે ફરી એક વખત અમેરિકા અને ઈરાન વચ્ચે સીધા યુદ્ધની સ્થિતિ સર્જાઈ છે. અમેરિકા અને ઈરાને આ સપ્તાહે એકબીજાના ઓઈલ જહાજો પર હુમલા કરતાં સ્થિતિ વણસી છે. આ કારણોથી ફરી એક વખત ક્રૂડ ઓઈલના ભાવમાં વધારો જોવા મળી રહ્યો છે. ભારત જેવા વિદેશી આયાત પર નિર્ભર અર્થતંત્રો માટે વર્તમાન સ્થિતિ ચિંતાજનક છે.

ભારતની આર્થિક વૃદ્ધિ પર દબાણની આશંકા

નેશનલ કાઉન્સિલ ઓફ એપ્લાઈડ ઈકોનોમિક રિસર્ચના પૂર્વ સીનિયર ઈકોનોમિસ્ટ સુનિલ સિંહાએ જણાવ્યું કે ક્રૂડ ઓઈલના ભાવમાં સતત વધારાથી મોંઘવારી, આયાત ખર્ચ અને કરન્ટ એકાઉન્ટ સંબંધિત જોખમ વધી શકે છે, જેનાથી આગામી ત્રિમાસિકમાં ભારતની આર્થિક વૃદ્ધિ પર દબાણ પડી શકે છે. ફરીથી વધતા ભૂ-રાજકીય તણાવ વચ્ચે બ્રેન્ટ ક્રૂડ ઓઈલના ભાવ પ્રતિ બેરલ 100 ડોલરથી ઉપર જવાથી આગામી ત્રિમાસિકમાં ભારતની આર્થિક વૃદ્ધિ પર દબાણ પડી શકે છે. સિંહાનું માનવું છે કે આંતરરાષ્ટ્રીય સ્તરે ક્રૂડ ઓઈલના ભાવમાં પ્રત્યેક 10 ડોલરની વૃદ્ધિથી ભારતના જીડીપી ગ્રોથમાં અંદાજે 20-30 બેસીસ પોઈન્ટનો ઘટાડો આવી શકે છે.

ભારતનો જીડીપી વૃદ્ધિદર ધીમો પડી શકે

ભારત માટે આ અસર ઘણી જ ગંભીર બાબત છે, કારણ કે ક્રૂડ ઓઈલના ઊંચા ભાવથી દેશનું આયાત બિલ વધી શકે છે અને મોંઘવારી પર પણ દબાણ પડી શકે છે. ઈનપુટ અને ટ્રાન્સપોર્ટેશનના ઊંચા ખર્ચથી વેપાર અને કન્ઝ્યુમર પર વધુ અસર પડી શકે છે જ્યારે આયાત બિલ વધવાથી કરન્ટ એકાઉન્ટ પર દબાણ પડી શકે છે. આમ, ક્રૂડના ભાવમાં વધારાથી ભારતનો જીડીપી વૃદ્ધિદર ધીમો પડી શકે છે.

બ્રેન્ટ ક્રૂડ હવે 100 ડોલર પ્રતિ બેરલથી ઉપર હોવાથી અને માત્ર એક સપ્તાહમાં 12 ટકાથી વધુની વૃદ્ધિ નોંધાઈ હોવાની સાથે ઓઈલના ભાવમાં તાજેતરમાં થયેલો વધારો લાંબો સમય ટકવાની સંભાવના ભારત માટે આર્થિક આઉટલૂક માટે મહત્વનું પરિબળ બની રહેશે.

અમારી WhatsApp ચેનલમાં જોડાવા નીચે આપેલી લિંક પર ક્લિક કરો

https://whatsapp.com/channel/0029VbDPNhHISTkJEDTirJ16