GST Collection: સપ્ટેમ્બરમાં ₹2.03 લાખ કરોડની વસૂલાત, ગુજરાતમાં 17% વધ્યું

સપ્ટેમ્બર 2026માં દેશનું કુલ ગ્રોસ GST કલેક્શન વાર્ષિક ધોરણે 14.7% વધીને ₹2,03,521 કરોડ થયું છે. ચાલુ નાણાકીય વર્ષના પ્રથમ છ મહિનામાં કુલ વસૂલાત ₹12,46,278 કરોડ રહી છે. ગુજરાતનું GST કલેક્શન 17% વધીને ₹12,222 કરોડ થયું, જ્યારે મહારાષ્ટ્ર ₹29,986 કરોડની વસૂલાત સાથે રાજ્યોમાં અગ્રેસર રહ્યું.

ગુરુવારે જાહેર થયેલા આંકડા મુજબ, સપ્ટેમ્બરમાં કેન્દ્ર સરકારે ₹2,03,521 કરોડનું ગ્રોસ ગુડ્સ એન્ડ સર્વિસિસ ટેક્સ એટલે કે GST કલેક્શન નોંધાવ્યું હતું. ગયા વર્ષના સમાન મહિનાની સરખામણીએ તેમાં 14.7%નો વધારો થયો છે. ચાલુ નાણાકીય વર્ષના એપ્રિલથી સપ્ટેમ્બર સુધીના પ્રથમ છ મહિનામાં કુલ ગ્રોસ GST વસૂલાત ₹12,46,278 કરોડ રહી છે, જે વાર્ષિક ધોરણે 11.6% વધારે છે. સપ્ટેમ્બરમાં GST રિફંડ 3% ઘટીને ₹27,001 કરોડ રહ્યા હતા. કુલ ગ્રોસ વસૂલાતમાંથી રિફંડ બાદ કરતાં ચોખ્ખું કલેક્શન ₹1,76,520 કરોડ થાય છે. સપ્ટેમ્બરની કુલ વસૂલાતમાં સૌથી મોટો હિસ્સો IGSTનો રહ્યો હતો.

સપ્ટેમ્બરનું કલેક્શન

• CGST  ₹37,762 કરોડ
• SGST  ₹45,363 કરોડ
• IGST  ₹1,20,396 કરોડ
• કુલ ગ્રોસ GST ₹2,03,521 કરોડ

સ્થાનિક વ્યવહારોમાંથી આવક વધી

દેશના સ્થાનિક વ્યવહારોમાંથી ગ્રોસ GST આવક 10.1% વધીને ₹1,37,996 કરોડ થઈ હતી. ગયા વર્ષના સમાન મહિનામાં તે ₹1,25,334 કરોડ હતી. રિફંડ બાદની ચોખ્ખી સ્થાનિક GST આવક 13.5% વધીને ₹1,24,491 કરોડ રહી હતી. આ આંકડો માત્ર સ્થાનિક વ્યવહારોનો છે, જ્યારે કુલ ગ્રોસ GST કલેક્શનમાં આયાત સંબંધિત વસૂલાત પણ સામેલ હોય છે.

ગુજરાતમાં 17% વૃદ્ધિ, મહારાષ્ટ્ર સૌથી આગળ

મુખ્ય રાજ્યોમાં મહારાષ્ટ્રે સપ્ટેમ્બરમાં ₹29,986 કરોડનું GST કલેક્શન નોંધાવ્યું હતું, જે ગયા વર્ષના ₹25,973 કરોડ કરતાં 15% વધારે છે. કર્ણાટકમાં વસૂલાત 16% વધીને ₹13,884 કરોડ રહી હતી. ગુજરાતનું GST કલેક્શન 17% વધીને ₹12,222 કરોડ થયું હતું. ઉત્તર પ્રદેશ, તેલંગાણા અને પંજાબમાં પણ 18%ની વૃદ્ધિ નોંધાઈ હતી. ઉત્તર પ્રદેશની વસૂલાત ગયા વર્ષના ₹7,516 કરોડથી વધીને ₹8,882 કરોડ થઈ હતી. તેલંગાણામાં તે ₹4,512 કરોડથી વધીને ₹5,327 કરોડ રહી હતી. આસામનું GST કલેક્શન 88% વધીને ₹2,415 કરોડ થયું હતું, જે ગયા વર્ષના સમાન મહિનામાં ₹1,287 કરોડ હતું. મણિપુરમાં 145% વૃદ્ધિ સાથે વસૂલાત ₹92 કરોડ રહી હતી. અરુણાચલ પ્રદેશ અને નાગાલેન્ડમાં અનુક્રમે 46% અને 39%નો વધારો નોંધાયો હતો.

કેટલા રાજ્યોમાં વસૂલાત ઘટી?

દેશનું કુલ કલેક્શન વધ્યું હોવા છતાં કેટલાક રાજ્યો અને કેન્દ્રશાસિત પ્રદેશોમાં ઘટાડો જોવા મળ્યો હતો. સિક્કિમમાં સૌથી મોટો 51% ઘટાડો નોંધાયો હતો. રાજસ્થાનની વસૂલાત લગભગ સ્થિર રહી હતી. ગયા વર્ષના ₹4,165 કરોડ સામે આ વર્ષે ₹4,151 કરોડનું કલેક્શન નોંધાયું હતું.

આ પણ વાંચો: ઓગસ્ટનું GST કલેકશન 14.8 ટકા વધીને બે લાખ કરોડ નજીક

આ પણ જુઓ:

Watch onYouTube