SBI Cyber Alert: વીજળી-ગેસ બિલના નામે KYC અપડેટનો મેસેજ આવ્યો છે? ખાતું ખાલી થઈ શકે છે!

Cyber Fraud Alert: આજના ડિજિટલ યુગમાં દેશ અને દુનિયાભરમાં ઓનલાઈન છેતરપિંડીના બનાવો ખૂબ જ ઝડપથી વધી રહ્યા છે. રોજબરોજ સાયબર છેતરપિંડીના નવા નવા કિસ્સાઓ પ્રકાશમાં આવી રહ્યા છે, જેને પગલે સરકારી એજન્સીઓ અને બેંકો દ્વારા નાગરિકોને સતત સતર્ક રહેવાની સલાહ આપવામાં આવે છે. તાજેતરમાં જ, દેશની સૌથી મોટી બેંક સ્ટેટ બેંક ઓફ ઈન્ડિયા (SBI) દ્વારા તેના ગ્રાહકોને એક વિશેષ ચેતવણી આપવામાં આવી છે. SBI એ સોશિયલ મીડિયા પ્લેટફોર્મ X (અગાઉનું ટ્વિટર) પર એક પોસ્ટ શેર કરીને લોકોને જણાવ્યું છે કે છેતરપિંડી કરનારાઓ હવે યુટિલિટી સેવાઓ (જેમ કે વીજળી, પાણી કે ગેસ) ના KYC અપડેટના બહાને લોકોને નિશાન બનાવી રહ્યા છે. આવા કોઈપણ કોલ કે મેસેજ સાયબર કૌભાંડનો ભાગ હોઈ શકે છે.

KYC ના નામે કેવી રીતે થાય છે છેતરપિંડી?

SBI દ્વારા શેર કરવામાં આવેલી માહિતી મુજબ, સાયબર ગુનેગારો વીજળી કંપની, ગેસ એજન્સી કે વોટર સપ્લાય વિભાગના અધિકારી તરીકે ઓળખ આપીને સામાન્ય લોકોને ફોન કે મેસેજ કરે છે. તેઓ ગ્રાહકોને તાત્કાલિક તેમનું KYC અપડેટ કરવાનું કહે છે. જો ગ્રાહક આનાકાની કરે કે સમય માંગે, તો તેઓ વીજળી કે ગેસ કનેક્શન કાપી નાખવાની ધમકી પણ આપે છે. ડરનો માહોલ ઊભો કર્યા બાદ, તેઓ KYC અપડેટ કરવાના નામે એક લિંક મેસેજ દ્વારા શેર કરે છે અથવા કોઈ એપ ડાઉનલોડ કરવાનું કહે છે.

જેવો કોઈ ગ્રાહક ગભરાઈને આ લિંક પર ક્લિક કરે છે કે તરત જ તેનો સ્માર્ટફોન હેક થઈ શકે છે. ફોન હેક થતાં જ છેતરપિંડી કરનારાઓ ગ્રાહકની વ્યક્તિગત અને બેંક ખાતાને લગતી તમામ ખાનગી નાણાકીય માહિતી મેળવી લે છે અને ગણતરીની મિનિટોમાં બેંક ખાતું ખાલી કરી શકે છે.

સાયબર છેતરપિંડીથી બચવા માટે આટલું અચૂક કરો:

ક્યારેય પણ અજાણ્યા નંબરો પરથી આવતા કોલ કે મેસેજમાં મોકલવામાં આવેલી કોઈપણ લિંક, ઈમેજ કે ફાઈલ પર ક્લિક કરવાનું ટાળો.

જો કોઈ સરકારી અધિકારી કે યુટિલિટી વિભાગના નામે ફોન કરીને KYC માટે દબાણ કરે, તો તેનો ક્યારેય વિશ્વાસ ન કરો.

સરકારી અધિકારીઓ કે બેંક કર્મચારીઓ ક્યારેય ફોન પર KYC અપડેટ કરવા માટે તમારો OTP માંગતા નથી. તમારો OTP કે ખાનગી બેંકિંગ માહિતી કોઈની પણ સાથે શેર ન કરો.

જો તમારો કોઈ મિત્ર કે સગું સોશિયલ મીડિયા (વોટ્સએપ કે ફેસબુક) પર મેસેજ કરીને અચાનક પૈસાની માંગણી કરે, તો સીધા પૈસા ટ્રાન્સફર કરવાને બદલે પહેલા તે વ્યક્તિને ફોન કરીને પરિસ્થિતિની ખાતરી કરો, કારણ કે સાયબર ગુનેગારો લોકોના એકાઉન્ટ હેક કરીને પૈસા માંગતા હોય છે.

જો તમારી સાથે છેતરપિંડી થાય તો શું કરવું?

તમામ સાવચેતી રાખવા છતાં જો તમે સાયબર ક્રાઇમનો ભોગ બનો, તો ગભરાશો નહીં અને તાત્કાલિક પગલાં લો:

સૌથી પહેલા રાષ્ટ્રીય સાયબર ક્રાઇમ હેલ્પલાઇન નંબર 1930 પર કૉલ કરીને ફરિયાદ નોંધાવો.

તમે ભારત સરકારના સત્તાવાર પોર્ટલ www.cybercrime.gov.in પર જઈને પણ ઓનલાઈન ફરિયાદ કરી શકો છો.

ઘટના બન્યા બાદ તરત જ તમારી બેંકનો સંપર્ક કરો અને તમારા તમામ એટીએમ કાર્ડ, ક્રેડિટ કાર્ડ અને UPI આઈડી બ્લોક કરાવો જેથી વધુ નુકસાન ન થાય.

તમારા નજીકના પોલીસ સ્ટેશન કે સાયબર ક્રાઇમ સેલમાં જઈને FIR નોંધાવવાનું ક્યારેય ચૂકશો નહીં.

પુરાવા તરીકે છેતરપિંડી કરનાર સાથેની ચેટ, મેસેજ, કોલ રેકોર્ડિંગ, બેંક ટ્રાન્ઝેક્શનના સ્ક્રીનશોટ અને ઈમેઈલ અચૂક સાચવી રાખો.

આ પણ વાંચોઃ Amul Milk Price Hike: આજથી અમૂલ દૂધ મોંઘું, જાણો ગોલ્ડ અને તાજાના નવા ભાવ

આ પણ જુઓ

Watch onYouTube