લોકો ઈ-ચલણ ના ભરે તો લાઈટ બિલમાં એડ કરીને મોકલો: સુપ્રીમ કોર્ટ

દેશભરમાં ટ્રાફિક નિયમોના ભંગ બદલ આપવામાં આવેલા ઈ-ચલણની મોટી રકમ બાકી છે. આ મામલે સુપ્રીમ કોર્ટે રાજ્યો અને કેન્દ્રશાસિત પ્રદેશોને બાકી દંડની વસૂલાત માટે વધુ અસરકારક વ્યવસ્થા અંગે વિચાર કરવા જણાવ્યું છે. દેશમાં લગભગ ₹20,000 કરોડના ઈ-ચલણની વસૂલાત બાકી હોવાનું કોર્ટમાં રજૂ કરવામાં આવ્યું હતું.

બાકી ઈ-ચલણ વસૂલવા સુપ્રીમ કોર્ટનું સૂચન

સુપ્રીમ કોર્ટે સુનાવણી દરમિયાન સૂચન કર્યું હતું કે બાકી ઈ-ચલણની વસૂલાત માટે નવી વ્યવસ્થા વિકસાવી શકાય છે. કોર્ટ દ્વારા ઈ-ચલણને વીજ બિલ સાથે જોડીને વસૂલાત કરવાની શક્યતા અંગે વિચાર કરવા જણાવાયું હતું. કોર્ટનું કહેવું હતું કે ટ્રાફિક નિયમોના ભંગ બદલ ફટકારવામાં આવેલા દંડની વસૂલાત સુનિશ્ચિત કરવા માટે યોગ્ય વ્યવસ્થા જરૂરી છે.

દેશભરમાં કરોડો રૂપિયાના દંડ બાકી

રિપોર્ટ મુજબ, રાજ્યો અને કેન્દ્રશાસિત પ્રદેશોમાં ઈ-ચલણ પેટે લગભગ ₹20,000 કરોડની રકમ બાકી છે. આ બાકી રકમની વસૂલાત માટે ટ્રાફિક વિભાગો દ્વારા વિવિધ પગલાં લેવામાં આવી રહ્યા છે. કોર્ટમાં રજૂઆત દરમિયાન જણાવાયું હતું કે ઘણા કેસોમાં ઈ-ચલણ જારી થયા બાદ પણ દંડની રકમ ભરવામાં આવતી નથી.

સમગ્ર દેશમાં ₹45,000 કરોડથી વધુ મૂલ્યના ટ્રાફિક ઈ-ચલણ પેન્ડિંગ છે, જેમાંથી માત્ર ₹25 હજાર કરોડની વસૂલાત શક્ય બની છે. આટલી જંગી રકમ અટવાયેલી હોવાથી અને વાહનચાલકો દ્વારા ટ્રાફિક નિયમોની સતત અવગણના થતી જોઈને સુપ્રીમ કોર્ટે આ કડક વલણ અપનાવ્યું છે.

ઈ-ચલણ અને વીજ બિલ જોડવાની શક્યતા

સુપ્રીમ કોર્ટે સૂચવ્યું હતું કે ઈ-ચલણની વસૂલાત માટે વીજ બિલ જેવી વ્યવસ્થાનો ઉપયોગ કરી શકાય છે. જો કે, આ અંગે અંતિમ નિર્ણય અથવા અમલની માહિતી જાહેર કરવામાં આવી નથી. આ મુદ્દે સંબંધિત વિભાગો દ્વારા આગળની કાર્યવાહી અને વ્યવસ્થાની સમીક્ષા કરવામાં આવશે.

આ પણ વાંચો : ક્રૂડ ઓઇલમાં તેજીનો ભડકો! વેસ્ટ એશિયા તણાવ વચ્ચે બ્રેન્ટ $106ને પાર

આ પણ જુઓ :

Watch onYouTube