PB Fintechના શેરમાં એક જ દિવસમાં 36%નો કડાકો, 20% સર્કિટનો નિયમ કેમ લાગુ ન પડ્યો? જાણો એવું કેમ થયું

શેરબજારમાં સામાન્ય રીતે રોકાણકારોની માન્યતા હોય છે કે કોઈપણ શેર એક દિવસમાં 20%થી વધુ તૂટી શકતો નથી. પરંતુ PB Fintechના શેરમાં ગુરુવારે જોવા મળેલા લગભગ 36%ના કડાકાએ આ માન્યતા પર સવાલ ઉભો કર્યો છે. Policybazaarની પેરેન્ટ કંપનીનો શેર ₹1,890ના અગાઉના બંધ ભાવ સામે ₹1,210 સુધી આવી ગયો હતો. જોકે આ કોઈ નિયમનું ઉલ્લંઘન નહોતું, પરંતુ F&O કેટેગરીના શેર માટે લાગુ થતી ડાયનેમિક પ્રાઇસ બેન્ડ સિસ્ટમ અને ક્લોઝિંગ ઓક્શન મિકેનિઝમના કારણે આટલો મોટો ઘટાડો શક્ય બન્યો.

IRDAIના પ્રસ્તાવથી PB Fintechમાં મોટો કડાકો

PB Fintechના શેરમાં ઘટાડાની શરૂઆત ઇન્શ્યોરન્સ રેગ્યુલેટર IRDAIના કન્સલ્ટેશન પેપર બાદ થઈ હતી. IRDAIએ ‘Recalibrating Economics of Insurance Distribution’ નામથી કન્સલ્ટેશન પેપર રજૂ કર્યું છે, જેમાં ઇન્શ્યોરન્સ ડિસ્ટ્રિબ્યુશન મોડલ, કમિશન સ્ટ્રક્ચર, ખર્ચ અને પારદર્શિતા સાથે જોડાયેલા સુધારાઓ અંગે પ્રસ્તાવ મૂકવામાં આવ્યા છે. PB Fintechનો બિઝનેસ ઇન્શ્યોરન્સ પોલિસીના વેચાણમાંથી મળતા કમિશન સાથે જોડાયેલો હોવાથી રોકાણકારોમાં કંપનીની આવક અને માર્જિન પર અસર અંગે ચિંતા વધી અને શેરમાં ભારે વેચવાલી જોવા મળી.

દરેક શેરમાં 20% સર્કિટનો નિયમ લાગુ નથી થતો

રોકાણકારોમાં સામાન્ય માન્યતા છે કે કોઈપણ શેર એક દિવસમાં માત્ર 20% સુધી જ વધી કે ઘટી શકે છે. પરંતુ વાસ્તવમાં પ્રાઇસ બેન્ડ દરેક શેર માટે અલગ હોય છે. કેટલાક શેરમાં 2%, 5%, 10% અથવા 20%ની મર્યાદા હોય છે. પરંતુ જે શેરમાં Futures & Options એટલે કે F&O ટ્રેડિંગ ઉપલબ્ધ હોય છે, તેમાં સામાન્ય 20% ફિક્સ પ્રાઇસ બેન્ડ લાગુ થતું નથી. PB Fintech પણ F&O કેટેગરીનો શેર હોવાથી તેના પર ડાયનેમિક પ્રાઇસ બેન્ડ સિસ્ટમ લાગુ થઈ હતી.

F&O શેરમાં ડાયનેમિક પ્રાઇસ બેન્ડ કેવી રીતે કામ કરે છે?

F&O શેર માટે એક ડાયનેમિક પ્રાઇસ બેન્ડ સિસ્ટમ હોય છે. આ સિસ્ટમમાં શરૂઆતમાં 10%ની ઓપરેટિંગ રેન્જ હોય છે. જો શેર આ મર્યાદાની નજીક પહોંચે અને નિર્ધારિત શરતો પૂર્ણ થાય તો બેન્ડ ધીમે-ધીમે આગળ ખસે છે. PB Fintechમાં પણ આવું જ થયું. શેરમાં ઘટાડા દરમિયાન પ્રાઇસ બેન્ડ અલગ-અલગ તબક્કામાં ખસતું ગયું.

• શરૂઆતમાં 10% બેન્ડ
• ત્યારબાદ 15%
• પછી 20%
• ત્યારબાદ 23%, 26%, 28%, 30% અને આગળ
• આ કારણે શેર 20%થી વધુ ઘટ્યો

PB Fintechનો શેર દિવસ દરમિયાન કેવી રીતે નીચે આવ્યો?

PB Fintechનો અગાઉનો બંધ ભાવ ₹1,890 હતો. કારોબાર શરૂ થયા બાદ શેરમાં સતત ઘટાડો જોવા મળ્યો. શરૂઆતમાં શેર લગભગ ₹1,696 સુધી આવ્યો. ત્યારબાદ પ્રાઇસ બેન્ડ બદલાતા શેર વધુ નીચે સરક્યો અને શેર ₹1,600, ₹1,500 અને ત્યારબાદ ₹1,400ના સ્તર સુધી પહોંચ્યો. અંતે શેર ₹1,210 આસપાસ બંધ થયો. આ ઘટાડો એક જ વખતમાં થયો નહોતો, પરંતુ ડાયનેમિક પ્રાઇસ બેન્ડના અલગ-અલગ તબક્કાઓમાંથી પસાર થયો હતો.

ક્લોઝિંગ ઓક્શનથી અંતિમ ભાવ નક્કી થયો

PB Fintechના ક્લોઝિંગ ભાવમાં ક્લોઝિંગ ઓક્શન સેશનની પણ મહત્વની ભૂમિકા રહી. F&O શેર માટે 2026થી ક્લોઝિંગ ઓક્શન સેશનની વ્યવસ્થા લાગુ કરવામાં આવી છે. તેમાં 3:15 વાગ્યા બાદ અલગ ઓક્શન પ્રક્રિયા દ્વારા શેરનો અંતિમ ક્લોઝિંગ ભાવ નક્કી થાય છે. આ પ્રક્રિયામાં બજારના ઓર્ડરના આધારે યોગ્ય ભાવ નક્કી કરવામાં આવે છે અને ત્યારબાદ તે દિવસનો અંતિમ ક્લોઝિંગ ભાવ જાહેર થાય છે.

આ પણ વાંચો: IRDAIના નવા નિયમોથી Insurance Stocks દબાણમાં

માર્કેટ વાઇડ સર્કિટ અને શેર સર્કિટ બંને અલગ

શેરના વ્યક્તિગત પ્રાઇસ બેન્ડ સિવાય સમગ્ર બજાર માટે અલગ પ્રકારનો સર્કિટ બ્રેકર હોય છે. માર્કેટ વાઇડ સર્કિટ Sensex અને Nifty જેવા મુખ્ય ઇન્ડેક્સમાં 10%, 15% અને 20%ની હિલચાલ પર લાગુ થાય છે. આ સર્કિટ લાગુ થાય ત્યારે સમગ્ર ઇક્વિટી અને ડેરિવેટિવ્સ માર્કેટમાં ટ્રેડિંગ રોકાઈ શકે છે. PB Fintechમાં ઘટાડો માત્ર એક શેર પૂરતો હતો, તેથી સમગ્ર બજાર માટેનો સર્કિટ બ્રેકર લાગુ થયો નહોતો.

રોકાણકારો માટે શું સમજવું જરૂરી છે?

PB Fintechના કિસ્સાએ બતાવ્યું છે કે શેરબજારમાં દરેક શેર માટે એકસરખા નિયમો લાગુ થતા નથી. F&O કેટેગરીના શેરમાં 20%ની ફિક્સ મર્યાદા હોતી નથી. આવા શેરમાં ડાયનેમિક પ્રાઇસ બેન્ડ સિસ્ટમ હેઠળ ભાવમાં મોટો ફેરફાર થઈ શકે છે. આથી રોકાણ કરતા પહેલા કોઈપણ શેર કઈ કેટેગરીમાં આવે છે, તેના પર કયા પ્રાઇસ બેન્ડ લાગુ છે અને તેમાં F&O ટ્રેડિંગ છે કે નહીં તે સમજવું મહત્વપૂર્ણ છે.

આ પણ જુઓ

Watch onYouTube