ભારત-EUના નાણાકીય સંબંધો મજબૂત થશે: SEBI અને ESMA વચ્ચે થયા મહત્ત્વપૂર્ણ કરાર

ભારતીય મૂડીબજાર માટે મહત્વપૂર્ણ પગલું ભરતાં સિક્યોરિટીઝ એન્ડ એક્સચેન્જ બોર્ડ ઓફ ઈન્ડિયા (SEBI) અને યુરોપિયન સિક્યોરિટીઝ એન્ડ માર્કેટ્સ ઓથોરિટી (ESMA)એ સેન્ટ્રલ કાઉન્ટરપાર્ટીઝ (CCPs) સંબંધિત બાબતોમાં સહયોગ અને માહિતીની આપ-લે માટે કરાર કર્યો છે. બંને નિયમનકારી સંસ્થાઓએ સમજૂતી કરાર (MoU) પર હસ્તાક્ષર કર્યા છે.

આજના સમયમાં નાણાકીય બજારો કોઈ એક દેશ સુધી મર્યાદિત નથી. વિવિધ દેશોના રોકાણકારો, શેરબજારો અને નાણાકીય સંસ્થાઓ એકબીજા સાથે જોડાયેલા છે. તેથી આંતરરાષ્ટ્રીય સ્તરે નાણાકીય વ્યવહારોને સુરક્ષિત અને અસરકારક રીતે પૂર્ણ કરવા માટે નિયમનકારો વચ્ચે મજબૂત સહયોગ જરૂરી છે. આ કરારનો હેતુ ભારત અને યુરોપિયન યુનિયન (EU)નાં નાણાકીય બજારો વચ્ચે સહયોગ વધુ મજબૂત કરવાનો છે. આંતરરાષ્ટ્રીય સ્તરે થનારી ક્લિયરિંગ ગતિવિધિઓ માટે MoU મહત્વનો ગણવામાં આવે છે.

આ કરારમાં શું છે?

SEBI અને ESMA વચ્ચેનો આ કરાર ભારતમાં SEBIની દેખરેખ હેઠળ કાર્યરત CCPs સંબંધિત બાબતોમાં બંને નિયમનકારો વચ્ચે સહયોગનું માળખું દર્શાવે છે. CCPs નાણાકીય બજારમાં ખરીદનાર અને વેચનાર વચ્ચે મધ્યસ્થ બની નાણાકીય વ્યવહાર સુરક્ષિત અને વ્યવસ્થિત રીતે પૂર્ણ કરવામાં મહત્વની ભૂમિકા ભજવે છે. જ્યારે કોઈ વ્યવહાર અલગ-અલગ દેશોનાં બજારો સાથે જોડાયેલો હોય ત્યારે સંબંધિત નિયમનકારો વચ્ચે માહિતીની આપ-લે અને દેખરેખમાં વધુ સારો સમન્વય જરૂરી બને છે. આ કરાર પર SEBIના ચેરમેન તુહિન કાંત પાંડે અને ESMAનાં ચેરપર્સન વેરિના રોસે હસ્તાક્ષર કર્યા છે.

જૂના કરારનું સ્થાન લેશે નવો MoU

SEBI અને ESMA વચ્ચે અગાઉ 21 જૂન 2017ના રોજ કરાર કરવામાં આવ્યો હતો. હવે જૂના કરારનાં બદલે નવો કરાર અમલમાં આવશે. બદલાતા નાણાકીય બજાર અને નિયમનકારી જરૂરિયાતોને ધ્યાનમાં રાખીને બંને સંસ્થાઓ વચ્ચેના સહયોગનું માળખું સુધારવામાં આવ્યું છે.

ESMAને કેવી રીતે મદદ મળશે?

નવો MoU SEBI અને ESMA દ્વારા કરવામાં આવતી રેગ્યુલેટરી સંબંધિત કામગીરી પર આધાર રાખી શકશે. એટલે કે ભારતમાં SEBIની દેખરેખ હેઠળ કામ કરતી CCPs અંગે ESMAને જરૂરી નિયમનકારી માહિતી મેળવવા અને ભારતની દેખરેખ વ્યવસ્થાને સમજવામાં મદદ મળશે. તેમજ યુરોપિયન યુનિયનની નાણાકીય સ્થિરતાને પણ ધ્યાનમાં રાખવામાં આવશે.

આ પણ વાંચો: ગુજરાતમાં NLC India સ્થાપશે 275 MWનો મોટો બેટરી પ્રોજેક્ટ

અમારી WhatsApp ચેનલમાં જોડાવા નીચે આપેલી લિંક પર ક્લીક કરો

https://whatsapp.com/channel/0029VbDPNhHISTkJEDTirJ16