SBI Q2 Results: નફો 14.28% વધીને ₹23,038 કરોડ, કૃષિ અને SME લોનમાં 20%થી વધુ વૃદ્ધિ

SBI Q2 Results: SBIના બીજા ત્રિમાસિક પરિણામોમાં નફા સાથે લોન અને થાપણોમાં પણ વૃદ્ધિ જોવા મળી છે. નાણાકીય વર્ષ 2026–27ના બીજા ત્રિમાસિકમાં બેન્કનો સ્ટેન્ડઅલોન ચોખ્ખો નફો 14.28% વધીને ₹23,037.95 કરોડ થયો છે. ગયા વર્ષના સમાન સમયગાળામાં તે ₹20,159.67 કરોડ હતો. કૃષિ અને નાના-મધ્યમ ઉદ્યોગોની લોનમાં 20%થી વધુ વૃદ્ધિ પરિણામનું મહત્વનું પાસું રહ્યું છે.

સ્ટેટ બેંક ઓફ ઈન્ડિયાએ મંગળવારે નાણાકીય વર્ષ 2026-27 ના બીજા ત્રિમાસિક ગાળા (Q2 FY27) માટે તેના સ્ટેન્ડઅલોન ચોખ્ખા નફામાં વાર્ષિક ધોરણે (YoY) 14.28 ટકાનો વધારો નોંધાવ્યો છે. આ નફો ₹23,037.95 કરોડ રહ્યો છે, જ્યારે ગયા વર્ષના સમાન ગાળામાં તે ₹20,159.67 કરોડ હતો. બેંકની ચોખ્ખી વ્યાજ આવક (NII) ₹ 49,142.85 કરોડ રહી છે. નાણાકીય વર્ષ 2025-26ના બીજા ત્રિમાસિક ગાળામાં (Q2 FY26) NII ₹42,847 કરોડ હતી, જેમાં વાર્ષિક ધોરણે 14.69 ટકાનો વધારો થયો છે. આ ત્રિમાસિક ગાળા દરમિયાન SBIની કુલ આવક 6.53 ટકા વધીને ₹1,43,796.01 કરોડ થઈ છે, જે એક વર્ષ પહેલાં ₹1,34,979.47 કરોડ હતી. વ્યાજમાંથી થતી આવક 10.46 ટકા વધીને ₹1,32,018.55 કરોડ થઈ છે; ગયા વર્ષના સમાન ગાળામાં આ આંકડો ₹1,19,516.87 કરોડ હતો.

નોન-પર્ફોર્મિંગ એસેટ

ગ્રોસ NPA રેશિયો 1.39% અને નેટ NPA રેશિયો 0.36% રહ્યો છે. નવી ખરાબ લોન બનવાનો સ્લિપેજ રેશિયો 0.41% તથા ક્રેડિટ કોસ્ટ 0.22% રહી છે. મૂડીની મજબૂતી દર્શાવતો CRAR રેશિયો 16.09% નોંધાયો છે.

ચોખ્ખો નફો અને આવક

બેંકનો વ્યાજ ખર્ચ ગયા વર્ષના સમાન ત્રિમાસિક ગાળાના ₹76,669.87 કરોડથી 8.09 ટકા વધીને ₹82,875.70 કરોડ થયો છે. તેનો ઓપરેટિંગ પ્રોફિટ વાર્ષિક ધોરણે ₹34,226 કરોડ થયો છે. કુલ ખર્ચ 8.54 ટકા વધીને ₹1,16,858.77 કરોડ થયો છે, જે એક વર્ષ પહેલાં ₹1,07,668.55 કરોડ હતો. ઓપરેટિંગ ખર્ચ 9.63 ટકા વધીને ₹30,998.68 કરોડથી ₹33,983.07 કરોડ થયો છે. કર્મચારીઓ પાછળનો ખર્ચ ₹16,605.95 કરોડથી વધીને ₹17,451.95 કરોડ થયો છે, જ્યારે અન્ય સંચાલન ખર્ચ ₹14,392.73 કરોડથી વધીને ₹16,531.12 કરોડ થયો છે.

કૃષિ અને SME લોનમાં મજબૂત વધારો

SBIની સમગ્ર બેન્કની લોનમાં 17.84%, જ્યારે સ્થાનિક લોનમાં 16.94%ની વાર્ષિક વૃદ્ધિ નોંધાઈ છે. કૃષિ લોન 22.64% અને SME લોન 21.97% વધી છે. રિટેલ પર્સનલ લોનમાં 14.54% તથા કોર્પોરેટ લોનમાં 16.12%નો વધારો થયો છે. રિટેલ, કૃષિ અને SMEને મળીને ઓળખાતા RAM સેગમેન્ટની લોન 17.34% વધી છે. આમ, બેન્કના મુખ્ય ધિરાણ વિભાગોમાં વૃદ્ધિ જોવા મળી છે. SBI Mutual Fund, NSE અને ARCILમાં હિસ્સેદારી વેચાણનો exceptional gain તથા જોગવાઈઓમાં ઘટાડો પણ નફો વધવાના કારણોમાંનાં એક છે.

થાપણો ₹63 લાખ કરોડ પર

બેન્કની થાપણો 12.27% વધીને આશરે ₹63 લાખ કરોડ થઈ છે. લોન આશરે ₹52 લાખ કરોડ સાથે કુલ બિઝનેસ ₹115 લાખ કરોડ રહ્યો છે. ચાલુ અને બચત ખાતાંની CASA થાપણો 8.13% વધી છે. 30 સપ્ટેમ્બર, 2026ના રોજ CASA રેશિયો 38.32% રહ્યો છે. રિટેલ ટર્મ ડિપોઝિટમાં 16.74%ની વૃદ્ધિ નોંધાઈ છે. સમગ્ર બેન્કનું ચોખ્ખું વ્યાજ માર્જિન અગાઉના ત્રિમાસિકથી 8 બેસિસ પોઇન્ટ વધીને 2.94% થયું છે. સ્થાનિક માર્જિન 11 બેસિસ પોઇન્ટ સુધરીને 3.11% રહ્યું છે.