કલાકોની સફર હવે મિનિટોમાં: 16 નવેમ્બરથી Namo Bharat નો નવો રૂટ શરૂ

Namo Bharat Fast Trains: દિલ્હી-મેરઠ રૂટ પર રોજ મુસાફરી કરતા લોકો માટે મહત્વપૂર્ણ ફેરફાર થવા જઈ રહ્યો છે. NCRTC 16 નવેમ્બરથી પીક અવર્સ દરમિયાન 8 વધારાની ફાસ્ટ Namo Bharat ટ્રેન સેવા શરૂ કરશે. આ લિમિટેડ-સ્ટોપ ટ્રેનોના કારણે આનંદ વિહારથી ગાઝિયાબાદની મુસાફરીનો સમય ઘટીને માત્ર 8 મિનિટ થઈ જશે. સમગ્ર દિલ્હી-મેરઠ કોરિડોર પણ 50 મિનિટથી ઓછા સમયમાં કવર કરી શકાશે.

ફાસ્ટ Namo Bharat ટ્રેન માત્ર 5 સ્ટેશને રોકાશે

NCRTCના જણાવ્યા અનુસાર, નવી ફાસ્ટ સેવાઓનો હેતુ દિલ્હી-મેરઠ કોરિડોર પર મુસાફરોનો સમય બચાવવાનો છે.

આ ટ્રેનો માત્ર પાંચ મુખ્ય સ્ટેશનો પર રોકાશે:

- સરાય કાલે ખાં

- આનંદ વિહાર

- ગાઝિયાબાદ

- બેગમપુર

- મોદીપુરમ

નવી સેવા બાદ આનંદ વિહારથી બેગમપુરનું અંતર 36 મિનિટમાં, જ્યારે ગાઝિયાબાદથી બેગમપુરનું અંતર માત્ર 28 મિનિટમાં પૂર્ણ થશે.

નિયમિત Namo Bharat સેવા પણ ચાલુ રહેશે

આ 8 વધારાની ફાસ્ટ ટ્રેનો હાલની નિયમિત Namo Bharat સેવાઓ ઉપરાંત ચલાવવામાં આવશે. એટલે કે નિયમિત ટ્રેન સેવાની ફ્રીક્વન્સી પર તેની અસર નહીં પડે. નિયમિત Namo Bharat ટ્રેનો પહેલાની જેમ દર 10 મિનિટના અંતરે ઉપલબ્ધ રહેશે.

સવારે અને સાંજે પીક અવર્સમાં સેવા

મુસાફરોની વધુ ભીડને ધ્યાનમાં રાખીને બંને ટર્મિનલ સ્ટેશન—સરાય કાલે ખાં અને મોદીપુરમ—થી સવારે અને સાંજે ફાસ્ટ ટ્રેનો દોડશે.

સવારના સમયમાં: બંને ટર્મિનલ પરથી સવારે 8:00 વાગ્યે અને 8:30 વાગ્યે ટ્રેન દોડશે. બંને દિશામાં બે-બે ટ્રેન મળીને કુલ ચાર સેવા રહેશે.

સાંજના સમયમાં: બંને ટર્મિનલ પરથી સાંજે 6:00 વાગ્યે અને 6:30 વાગ્યે ટ્રેન રવાના થશે. આ રીતે સાંજના પીક અવર્સમાં પણ કુલ ચાર વધારાની સેવા રહેશે.

રોજ 1.1 લાખ મુસાફરો કરે છે મુસાફરી

આ કોરિડોર પર હાલમાં દરરોજ આશરે 1.1 લાખ મુસાફરો મુસાફરી કરે છે. Namo Bharat સિસ્ટમે અત્યાર સુધીમાં 5 કરોડ પેસેન્જર ટ્રિપ્સનો આંકડો પણ પાર કર્યો છે. છેલ્લા ત્રણ મહિનામાં સરેરાશ માસિક રાઇડરશિપ 32 લાખથી વધુ રહી છે. વધારાની ફાસ્ટ ટ્રેન સેવા શરૂ કરવાનો હેતુ દિલ્હી-NCRમાં વધતા વાયુ પ્રદૂષણ વચ્ચે લોકોને ખાનગી વાહનોની જગ્યાએ જાહેર પરિવહન તરફ પ્રોત્સાહિત કરવાનો અને રસ્તાઓ પર ટ્રાફિકનું દબાણ ઘટાડવાનો પણ છે.

મુસાફરોએ ફાસ્ટ અને નિયમિત સેવા વચ્ચે ધ્યાન રાખવું

NCRTCએ મુસાફરોને સલાહ આપી છે કે ટ્રેનમાં ચઢતા પહેલાં ફાસ્ટ અને નિયમિત Namo Bharat સેવા વચ્ચેનો તફાવત જાણી લે. મુસાફરોએ સ્ટેશન પરના ડિસ્પ્લે બોર્ડ ધ્યાનથી જોવા અને પ્લેટફોર્મ પર થતી અનાઉન્સમેન્ટ સાંભળવા સલાહ આપવામાં આવી છે.

આ પણ વાંચો: NTC 1.0: અમદાવાદમાં ટ્રેડર્સનો મહાકુંભ, શેરબજારની રણનીતિ પર થશે મંથન

આ પણ જુઓ :