EV માર્કેટમાં Tata Motorsનો દબદબો! વેચાણમાં 75%નો જંગી વધારો

Tata Motors માટે ઑક્ટોબર 2026નો મહિનો પેસેન્જર વ્હીકલ વેચાણની દ્રષ્ટિએ મજબૂત રહ્યો છે. કંપનીએ ઘરેલુ અને આંતરરાષ્ટ્રીય બજારોને મળીને કુલ 75,426 પેસેન્જર વાહનો વેચ્યા છે. ગયા વર્ષે ઑક્ટોબરમાં આ આંકડો 61,295 યુનિટ હતો. એટલે કે કંપનીના કુલ વેચાણમાં 23%નો વધારો નોંધાયો છે. ખાસ વાત એ છે કે EV સેગમેન્ટે પણ કંપનીના આ પ્રદર્શનને મજબૂત ટેકો આપ્યો છે.

ઘરેલુ વેચાણમાં 21%નો વધારો

ઑક્ટોબર 2026માં Tata Motorsએ ભારતીય બજારમાં કુલ 73,894 પેસેન્જર વાહનો વેચ્યા હતા. ઑક્ટોબર 2025માં કંપનીનું ઘરેલુ વેચાણ 61,134 યુનિટ હતું. આ રીતે ઘરેલુ વેચાણમાં વાર્ષિક ધોરણે 21%નો વધારો થયો છે. કંપનીના આંતરરાષ્ટ્રીય બિઝનેસમાં પણ મોટો ઉછાળો નોંધાયો. ઑક્ટોબર 2026માં વિદેશી બજારોમાં કુલ 1,532 વાહનો વેચાયા, જ્યારે ગયા વર્ષે સમાન મહિનામાં 161 યુનિટનું વેચાણ થયું હતું. આ રીતે આંતરરાષ્ટ્રીય વેચાણમાં 852%નો વધારો નોંધાયો.

EV વેચાણમાં 75%નો જોરદાર ઉછાળો

Tata Motorsના EV સેગમેન્ટે ઑક્ટોબરમાં ખાસ પ્રદર્શન કર્યું. કંપનીએ ઘરેલુ અને આંતરરાષ્ટ્રીય બજારોમાં મળીને કુલ 16,244 ઈલેક્ટ્રિક વાહનો વેચ્યા હતા. ગયા વર્ષે ઑક્ટોબરમાં EV વેચાણ 9,286 યુનિટ હતું. એટલે કે આ વર્ષે EV વેચાણમાં 75%નો વધારો થયો છે. કંપનીના જણાવ્યા અનુસાર, Punch.evએ પણ નવો વેચાણ રેકોર્ડ બનાવ્યો છે. ઑક્ટોબર 2026 દરમિયાન તેની 5,000થી વધુ ઈલેક્ટ્રિક કાર વેચાઈ હતી.

Vahan રજિસ્ટ્રેશનમાં બીજું સ્થાન

કંપનીએ Vahan રજિસ્ટ્રેશનના આંકડામાં પણ બીજું સ્થાન મેળવ્યું છે. વાહનોની વધતી માંગને ધ્યાનમાં રાખીને Tata Motors હવે ઉત્પાદન અને સપ્લાય વધારવા પર કામ કરી રહી છે. કંપનીનો ઉદ્દેશ ગ્રાહકોને સમયસર વાહનો ઉપલબ્ધ કરાવવાનો છે. ઑક્ટોબરના વેચાણ આંકડા દર્શાવે છે કે કંપનીની પેટ્રોલ અને ડીઝલ કાર ઉપરાંત EV અને CNG સેગમેન્ટમાં પણ હાજરી મજબૂત થઈ રહી છે.

આ પણ વાંચો: 60,000 કર્મચારીઓને Buyout Offer, છતાં Microsoftને કેમ લેવું પડ્યું $25 બિલિયનનું દેવું?

આ પણ જુઓ:

Watch onYouTube