Denza D9 Price in India: 730 કિમી રેન્જ અને મસાજ સીટ સાથે BYD ની લક્ઝરી કાર ભારતમાં આવી

BYD Auto: જો તમે લક્ઝરી કારના શોખીન છો અને એક દમદાર તેમજ આરામદાયક ઇલેક્ટ્રિક કારની શોધમાં છો, તો તમારા માટે એક જબરદસ્ત સમાચાર છે. ચીનની જાણીતી ઓટોમોબાઇલ કંપની BYD ની લક્ઝરી સબ-બ્રાન્ડ Denza એ સત્તાવાર રીતે ભારતીય બજારમાં એન્ટ્રી મારી દીધી છે. કંપનીએ ભારતમાં પોતાની પહેલી પ્રીમિયમ ઇલેક્ટ્રિક MPV કાર Denza D9 લોન્ચ કરી છે. આ શાનદાર કારની શરૂઆતી એક્સ-શોરૂમ કિંમત 90 લાખ રૂપિયા રાખવામાં આવી છે. જો તમે આ કાર ખરીદવા માંગતા હોવ, તો તમે 10 લાખ રૂપિયા આપીને તેનું પ્રી-બુકિંગ કરાવી શકો છો.

આ એક 7 સીટર કાર છે, જેને ભારતમાં સંપૂર્ણપણે બિલ્ટ-અપ યુનિટ (CBU) તરીકે વિદેશથી આયાત કરીને વેચવામાં આવશે. ભારતમાં મોટા અને લક્ઝરી વાહનોનો ક્રેઝ ઝડપથી વધી રહ્યો છે, ત્યારે આ કાર માર્કેટમાં આવતાની સાથે જ ટોયોટા વેલફાયર, લેક્સસ LM 350h અને MG M9 જેવા અલ્ટ્રા-લક્ઝરી વાહનોને સીધી ટક્કર આપશે.

કારના લુક અને ડિઝાઇન વિશે વાત કરીએ તો, Denza D9 નો દેખાવ એકદમ ક્લાસિક અને ભવ્ય છે. તેમાં આગળના ભાગે એક મોટી અને બોલ્ડ ક્રોમ ગ્રિલ, શાર્પ પ્રોજેક્ટર હેડલાઇટ્સ અને LED DRLs આપવામાં આવ્યા છે. મજબૂત બમ્પર અને 18 ઇંચના સ્પોર્ટી એલોય વ્હીલ્સ કારને દમદાર લુક આપે છે. કારની સાઈઝ પણ ઘણી મોટી છે, તેની લંબાઈ 5250 mm, પહોળાઈ 1960 mm અને ઊંચાઈ 1920 mm છે. કારનો વ્હીલબેઝ 3110 mm છે, જેનાથી અંદર ઘણી ખુલ્લી જગ્યા મળે છે. સામાન્ય રીતે આમાં 410 લિટરની બૂટ સ્પેસ મળે છે, પણ પાછળની સીટો ફોલ્ડ કરવાથી આ જગ્યા વધીને સીધી 2310 લિટર થઈ જાય છે.

આ લક્ઝરી MPV માં ગ્રાહકોને 4 આકર્ષક કલર ઓપ્શન મળશે, જેમાં વ્હેલ સી બ્લુ, કોસ્મોસ બ્લુ, સ્ટેરી નાઇટ ગ્રે અને આર્ક્ટિક વ્હાઇટનો સમાવેશ થાય છે. આ 7 સીટર કારમાં 2+2+3 સીટિંગ લેઆઉટ છે. પાછળ બેસનારા મુસાફરોની આરામદાયક મુસાફરી માટે બીજી હરોળમાં ખાસ કેપ્ટન સીટ આપવામાં આવી છે, જેમાં મસાજ, હીટિંગ અને વેન્ટિલેશનની સુવિધા છે. મનોરંજન માટે પાછળ પણ ટચસ્ક્રીન કંટ્રોલ અપાયા છે. ડેશબોર્ડ પર 15.6 ઇંચની મોટી ઇન્ફોટેનમેન્ટ સિસ્ટમ અને ડ્રાઇવર માટે 10.25 ઇંચનું ડિજિટલ ડિસ્પ્લે છે. સાથે જ 14 સ્પીકર વાળી પ્રીમિયમ સાઉન્ડ સિસ્ટમ, 3 ઝોન ક્લાઇમેટ કંટ્રોલ, પેનોરેમિક સનરૂફ અને 360 ડિગ્રી કેમેરા જેવી અદ્યતન સુવિધાઓ છે.

પાવર અને બેટરીની વાત કરીએ તો, Denza D9 માં 115 kWh નું મોટું અને શક્તિશાળી બેટરી પેક લગાવવામાં આવ્યું છે. કંપનીનો દાવો છે કે આ કાર સિંગલ ચાર્જમાં 730 કિલોમીટર સુધીની શાનદાર રેન્જ આપશે. ભારતમાં આ કાર ફ્રન્ટ-વ્હીલ-ડ્રાઇવ (FWD) સેટઅપ સાથે વેચાશે, જેની ઇલેક્ટ્રિક મોટર 455 hp નો પાવર અને 365 Nm નો ટોર્ક જનરેટ કરે છે. સલામતી માટે કારમાં અદ્યતન ADAS ફીચર્સ પણ આપવામાં આવ્યા છે.

આ પણ વાંચોઃ ₹4.69 લાખથી શરૂ થતી બેસ્ટ ઇલેક્ટ્રિક કાર્સ: BaaS સ્કીમ સાથે મેળવો 449 km ની રેન્જ

આ પણ જુઓ

Watch onYouTube